DIOSAR JAKʼACHASIPJJAM
Kunjam Diosasa ukjja, luratanakap toqew uñachtʼayi
¿Jumatak Diosajj cheqapunit utji? Ukhamächi ukhajja, ¿kunjamsa uk qhanañchasma? Cheqas taqe cheqanwa mä munasiri, yatiñäni ukat wali chʼamani Diosan utjatapajj amuyasi. Ukampis ¿kunjamsa uk amuysna?, ukat ¿atinisiñjamati? Uka jisktʼanakar qhanañchañatakejj kuntï apóstol Pablojj Roma markankir cristianonakar qellqkäna uka arunakapat yatjjatañäni.
Jupajj akham sänwa: “Diosan jan uñjkay yänakapajj jupan luratanakap toqew uñachtʼayasi. Qhanpachwa uñachtʼayasi kunapachatejj aka oraqejj luratäkäns ukürutpacha jupajj Diosätapa, chʼamapajj jan tukuskirirakïtapa. Ukatpï jaqenakajj jan kunjämats jupat jaltapkaspatejja” sasa (Romanos 1:20). Kunjamtï apóstol Pablojj qhanañchkejja, luratanakapaw Diosar jachʼar apti. Ukhamajj uka arunakat jukʼamp yatjjataskakiñäni.
“Aka oraqejj luratäkäns ukürutpacha[w]” kunjam Diosäkiti uk uñachtʼayasi sasaw Pablojj qellqatayna. Uka qellqatarjamajja, griego arut ‘oraqe’ sasin jaqokipatäki uka arojj jaqenakatwa parlaskäna, janiw aka Oraqjjat a parlkänti, mä arunjja, jaqenakajj qalltaskän ukhatpachwa Diosan luratanakapat amuyjjapjjasapäna uk sañ Pablojj munaskäna.
Cheqas luratanakapajj janiw imantatäkiti jan ukasti “qhanpachwa uñachtʼayasi”. Ukat aka Oraqen jiskʼa ukhamarak jachʼa luratanakapanwa kunjam Diosäkitï ukajj qhan amuyasi. Taqe ukanakaw Diosan wali yatiñanïtap uñachtʼayistu. Ukampis ¿warawaranakat kamsasispasa? ¿Lamar qotan jachʼa uma mathapinakat kamsasispasa? ¿Janit wali chʼamanïtap uñachtʼayki?, maysa toqet mojjsa, kʼallkʼu, chʼapaqa, jaru ukat yaqha ukhamanaksa sum amuyaraktanjja. Ukat inti jalsu inti jalanta uñjasas wal kusisiraktanjja. Taqe ukanak uñjasajj qawqsa Jehová Diosajj munasistu uk uñachtʼayistu (Salmo 104:24; Isaías 40:26).
Diosan utjatapajj qhan amuyasi, ukat ukar jan iyawsapki ukanakajj ‘janiw utjkiti’ sasajj janiw sapkaspati. Uka toqet mä yatjjattʼat jaqejj akham qhanañchi: ukatakejj kunjamsa mä auto apnaqerejj thakin mä señal uñjas ukhamak pasawayaspa ukham amuytʼañäni, uka señalajj akham sänwa: “Chʼeqa toqnam saram” sasa. Ukat multa apsuñatak policiajj saytʼayaspa ukhajja, janiw auto apnaqerejj “janiw señal uñjkti” sasin siskaspati, kunattejj señalajj qhanaw uñjasi ukat auto apnaqeris janiw juykhükarakiti, ukatwa policiajj uka arunakar jan istʼkaspati. Cheqas uka auto apnaqerejj señalanak uñjasajj istʼañapänwa. Niya ukhamarakiw Diosat parlkasajja, Jupan cheqpachapuni utjatapajj luratanakapanwa qhan amuyasi. Jïsa, amuytʼasir jaqenakjamajj taqe ukanak sum uñjsna, janiw jan kun amuyir tukksnati.
Luratanakapaw Diosar jachʼar apti
Ukhamajj taqe kunatï aka Oraqen utjki ukanakaw Diosat jukʼamp qhanañchistu. Ukat jukʼampis Biblianwa Jupat sum yatjjatsna. Ukat ukanarakwa aka wakiskir jisktʼar qhanañchasi, ¿kunas Diosan amtapajj aka Oraqetakis ukat jaqenakatakisa? Cheqas Jehová Diosamp sum apasiñatakejj uka jisktʼan qhanañchäwip yatiñajj wali wakiskiriwa, kunattejj ‘kunjam Diosasa ukjja, luratanakap toqew uñachtʼayi’.
Aka phajjsin biblia liytʼañataki:
Romanos 1 jaljat 16 jaljakama
a Bibliarjamajja, ‘aka oraqejj jan ukajj akapachajj’ juchararawa ukat mä qhespiyiriw wakisi sasinjja, janiw aka Oraqjjat parlkiti, jan ukasti jaqenakat parlaskatapaw qhan amuyasi (Juan 1:29; 4:42; 12:47).
