¿Diosar kusisiyañatak chʼamachasipki ukanakarojj Jupajj askit uñjpachati? Yaqhepajj janiwa sasaw sapjje, kunattejj Diosajj janis jiwasan askis munkaspa ukhamwa amuyapjje. Ukham amuyasajj Diosar jan uñtʼapjjatapwa uñachtʼayapjje. Ukampis Jehová Diosajj servirinakapan chʼamachasitap wali askitwa uñji sasaw Bibliajj qhanañchistu. Kuntï apóstol Pablojj Hebreos 11:6 qellqatan siskäna uk jichhajj yatjjatañäni.

¿Kunas Diosar kusisiyañatakejj wakisi? “Janiw Diosarojj jan iyawsañampejj kunapachas kusisiyksnati” sasaw Pablojj säna. Kunjamtï amuyktanjja, Pablojj janiw “chʼamawa” siskiti, jan ukasti janiw “kunapachasa” sasaw säna. Ukhamajja, Diosar kusisiyañatakejj iyawsäwinïñajj wali wakiskiripuniwa.

Ukampis ¿iyawsäwinïñatakejj kunas wakisi? Nayraqatjja, ‘Diosan utjatapwa iyawsañasa’, kunattejj Jupan utjatapat pächasna ukhajj janiw Diosarojj kusisiyksnati. Ukampis janiw ukakïkiti, “supayanakas” jan ukajj sajjranakas Diosan utjatap ‘iyawsapjjarakiwa’ (Santiago 2:19). Jiwasatï ‘Diosan utjatap iyawsañäni’ ukhajja, munañaparjam sarnaqañatakiw chʼamachasiñäni (Santiago 2:20, 26).

Ukatjja, Diosajj jaqenakar “bendecirïtapa” iyawsañasarakiwa. Diosar iyawsir jaqejja, kuntï Jupar kusisiyañatak lurki ukajj jan inamayätap qhan amuyi (1 Corintios 15:58). Diosajj bendicirïtap pächasna ukhajj janiw Juparojj kusisiyksnati (Santiago 1:17; 1 Pedro 5:7). Diosajj janiw churasirïkiti, janiw jiwasan askis munkiti, janirakiw askit uñjkistuti sasin amuyasksna ukhajja, janiw Juparojj cheqpachapun uñtʼktänti.

¿Khitinakarus Diosajj bendici? “Jupar thaqerinaka[ruw]” bendici sasaw Pablojj säna. Biblia jaqokipañatak mä yanaptʼajj akham siwa: ‘thaqhaña’ sasin griego arut jaqokipatäki uka arojja, janiw “thaqher saraña” sañ munkiti, jan ukasti Diosar “yupaychaña” sañ muni. Yaqha qellqatasti akham sarakiwa, uka griego arojja, taqe chuym chʼamachasisa ukat jan qarjtasa yupaychaña sasaw amuytʼayi. Ukhamajja, Jehová Diosajj khitinakarutï Jupar taqe chuyma munasiñat yupaychapki ukanakaruw bendici (Mateo 22:37).

¿Kuna bendicions katoqapjjani? Paraisoptayat Oraqenwa wiñay jakañ katoqapjjani, ukasti Diosajj kunja munasirisa ukat churasirisa ukwa uñachtʼayani (Apocalipsis 21:3, 4). Ukat jichhürunakansa, khitinakatï Diosar thaqhapki ukanakajj walja bendicionanakwa katoqapjje. Diosan qollan ajayupampi ukat Biblian yanaptʼapampejj wali kusisitaw jakasipjje (Salmo 144:15; Mateo 5:3).

Kunjamtï yateqawayktanjja, Jehová Diosajj Jupar yupaychañataki chʼamachasipki ukanakarojj wali askitwa uñji. Ukaw Jupar jukʼamp jakʼachasiñatak yanaptʼistu. Ukhamajj Jehová Diosan bendicionanakap katoqañatakejj kuna kasta iyawsäwinïñas wakisi uk ¿janit yatjjatañ munkasma?