Antonio: Luis kamisaraki. Jumamp wasitat jikisiñajj wali askiwa.

Luis: Kamisaraki, nayatakis ukhamarakiwa.

Antonio: Jichhak mistki uka Yatiyañataki ukat ¡Despertad! sat revistanak apanirapsma. Kuna yatichäwinakanisa ukanakajj jumatakejj wali askipunïniwa.

Luis: Yuspära, walikpun jichhürojj jutawaytajja, may jisktʼasiñ munaskayasma.

Antonio: Jisktʼaskakita.

Luis: Mä urojja, trabajir masijaruw ‘aka revistanakajj wali khusapuniwa’ sasin sista. Ukampis jupajja, ‘janiw uka revistanak liytʼañamäkiti, Jehová Diosan Qhanañchirinakapajj janiw Jesusar creyipkiti’ sasaw situ. ‘Visitʼkitu uka jilataruw uka toqet jisktʼasï’ sasakiw jupar sista. ¿Cheqapunit jumanakajj Jesusar jan creyipkta?

Antonio: Walik nayar uka toqet jisktʼistajja. Cheqas maynejj kunarus creyi uk yatiñatakejj jupa pachpar jisktʼañaw wakisi. ¿Janich ukhamäki?

Luis: Jïsa, ukham lurañaw jukʼamp askejja.

Antonio: Nanakajj Jesusar creyipjjtwa. Janitï jupan utjatapar iyawsksna ukhajja, janiw qhespiyasksnati.

Luis: Ukhampun amuyaskayäta, ukampis trabajojankir masijan mayj parlatap laykuw uka toqet jukʼamp yatjjatañ munayäta. Janirakis uka toqet parlktantejjä.

Antonio: Kunatsa Jesusar creyiñasajj wakisi uk Bibliaw sum qhanañchi, mä qawqha qellqatanak uñakiptʼañäni. Uka qellqatanakampejj jaqenakar yatiyapjjapunirïtwa.

Luis: ¿Kawkïr qellqatanakarakisti?

Antonio: Maynïrejj Juan 14:6 qellqatawa, ukanjja akham sasaw Jesusajj arkirinakaparojj säna: “Nayätwa thakejja, cheqasa, jakañasa. Naya toqekiw Awkin ukar puriñajj utji” sasa. Aka qellqatarjamajja, ¿khiti toqekis Awkir jakʼachassna?

Luis: Jesús toqe.

Antonio: Ukhamapï. Ukwa nanakajj amuyapjjta. Ukatwa Jesusan sutipjjaru Diosar mayisipjjta.

Luis: Uk janiw yatkayätti.

Antonio: Nayajj taqe oracionanakaj-jja Jesusan sutipjjaruw mayista. Ukat Jehová Diosan Qhanañchirinakapajja, ukhamwa mayisipjjaraki.

Luis: Uk yatiñajj wali askiwa.

Antonio: Jichhajj Juan 3:16 qellqat liytʼarakiñäni. Uka qellqatajj kunarus Jesusajj aka Oraqer jutawayi ukwa mä qawqha arunakamp qhanañchi. Uka jiskʼa tʼaqarojja, wali askïtap laykojj “jiskʼa evangelio” sas kunaw sutichapjje. ¿Liytʼasmati?

 Luis: Walikiwa. Akham siwa: “Diosajj akapachar wal munatap laykuw mä sapa Yoqapar khitani, taqe khitinakatejj jupar iyawsapki ukanakajj jan chhaqañapataki, jan ukasti wiñay jakañanïñapataki”.

Antonio: Yuspära. ¿Uka arunak jumajj istʼirïtati?

Luis: Jïsa, walja kutiw uka arunak istʼirïta.

Antonio: Jïsa, wali uñtʼatawa. Jichhajj sumpach uka qellqatat amuytʼañäni. Diosan munasirïtap laykuw wiñay jakañ jikjjatsna sasaw Jesusajj säna, ukampis uk jikjjatañatakejj ¿kunaw wakisi sänsa?

Luis: Iyawsaña.

Antonio: Jïsa, Jesusaruw iyawsañasa, mä arunjja, jupan utjatap creyiñasa. Yatiyañataki sat revista churksmas ukaw uka toqet sum qhanañchi. Ukanjja payïr janapan akham siwa: “[Diosan] Apnaqäwi[pan] Apnaqeri Jesucristor iyawsapjjañapatakiw yanaptʼaskaraki, kunattejj wiñay jakañ jikjjatapjjañasatakiw Jesusajj jiwäna” sasa.

Luis: Pachpa revistarakis ‘Jesusar iyawsapjjta’ sasin saskataynajjä.

Antonio: Ukhamapï.

Luis: Ukhamajj ¿kunatsa jaqenakajj jumanakat mayj parlapjjpacha?

Antonio: Inas yaqha jaqenakan parlatap istʼasak ukham parlapjjchi. Jan ukajj inas iglesiapan pʼeqtʼirinakapajj ukham yatichapjjarakchi.

Luis: ¿Janit Jehová Diosan Qhanañchirinakapa sasin uñtʼatäpjjatam laykojj ukham sapkpacha?

Antonio: Inas ukatächi.

Luis: ¿Kunatsa jumanakajj Jehová Diosat wal parlapjjta?

Antonio: Diosajj Jehová satawa. Ukat uka suti aytañajj wali wakiskirïtapwa amuyapjjta. Jesús pachpaw uka suti aytäna, mä kutejj Awkipar mayiskasaw akham sasin Juan 17:26 qellqatan säna, ¿liytʼañ munasmati?

Luis: Akham siwa: “Jupanakarojj [sutim] uñtʼay[twa], ukampis uñtʼayaskakïmawa, kunjämtejj nayaru munasista uka munasiñajj jupanakampïñapataki, nayasti jupanakampïñajjatakiraki”.

Antonio: Yuspära. ¿Amuytati? Jesusajj Diosan sutip uñtʼayänwa, mä arunjja, yatiyänwa. ¿Kunatsa uk lurpachäna?

Luis: Janiw uk yatkti.

Antonio: Uk sum amuyañatakejja, Hechos 2:21 qellqat liytʼañäni, ukanjja akham siwa: “Taqe khitinakatejj [Jehová] Tatitun sutip artʼaskanejja, qhespiyatäniwa” sasa. Kunjamtï akan siskejja, qhespiyasiñatakejj Diosan sutipjja artʼañasawa, mä arunjja, aytañasawa. Uksti Jesusajj sum yatïna.

Luis: Jïsa, ukhamäpachänwa.

Antonio: Arkirinakapan Diosan sutip yatipjjañapasa ukat aytapjjañapasa Jesusatakejj wali wakiskirïnwa, ukhamatakwa jupanakajj qhespiyasipjjasapäna. Ukatwa nanakajj Jehová Diosat wal parlapjjta. Cheqas walja jaqenakajj uka suti uñtʼapjjaspa ukhamarak aytapjjaspa ukwa munapjjta.

Luis: Ukampis jaqenakajj janiw Diosan sutip yatipkiti ni aytapkarakisa, ukhampachasa Diosajj khitisa uk sum yatipjje.

Antonio: Inas ukhamächi. Ukampis Diosajj Jupar jukʼamp jakʼachasiñasatakiw sutip yatiyistu.

Luis: Janiw uk sum amuykti.

Antonio: Akanakat amuytʼam: khitis Wila qota payar jaljtayäna, Tunka Mandamientonaks  katoqäna uk taqeniw yattanjja. Ukat khitis animalanakampi familiapampi qhespiyasipjjañapatak mä arca luräna uk taqeniw yatiraktanjja. Ukampis uka jaqenakan sutinakap yatiñajj ¿wakisipunpachati? ¿Ukat juchanakasat qhespiyañatak alajjpachat jutawayki uka jaqen sutip yatiñajj wakisirakpachati? Cheqas janiw wakiskapunispati.

Luis: Jïsa.

Antonio: Ukampis jupanakajj kamsatäpjjänsa uk Diosajj sum qhanañchistu: Moisés, Noé ukat Jesús satäpjjänwa. Janiw jupanakar uñtʼawayktanti, ukampis sutinakap yatisaw jupanakar sumpach uñtʼtanjja.

Luis: Janiw ukham amuykatätti.

Antonio: Ukatwa nanakajj Diosan sutip wal aytapjjta. Cheqas jaqenakajj Jehová Diosar confiyapjjaspa, mä munat amigoparjam uñjapjjaspa ukwa munapjjta. Ukampis qhespiyasiñatakejj Jesusar creyiñasajj wali wakiskirirakiwa. Uk sum amuyañatakejj Bibliankir aka qellqatamp liytʼañäni.

Luis: Walikiwa.

Antonio: Ninkhärajj Juan 14:6 qellqat liytʼawaytanjja. Ukanjja, “Nayätwa thakejja, cheqasa, jakañasa” sasaw Jesusajj säna. Jichhajj Juan 14:1 qellqat liytʼañäni. ¿Qhep qhepäkis uk liytʼasmati?

Luis: Jïsa, akham siwa: “Iyawsapjjam Diosaru, nayarus iyawsapjjarakita”.

Antonio: Yuspära Luis. Aka qellqatarjamajja, ¿khitirus iyawsañäni uk ajlliñasäspati?

Luis: Janiwa, panpachaniruw iyawsañasa.

Antonio: Ukhamawa. Ukampis nayajj Diosaru ukat Jesusar iyawstwa sañat sipansa, luratanakasampiw iyawsatas uñachtʼayañasa, ¿janich ukhamäki?

Luis: Ukhamäskapuniwa.

Antonio: Jichhajj ¿kunjamsa maynejj Diosaru ukat Jesusar confiyatap uñachtʼayaspa? ¿Mayan uka toqet parltʼsnasti? *

Luis: Walikïspawa.