Jutïr urunakajj kunjamänisa uk taqeniw yatiñ muntanjja, ukatwa familiasat llakisisajj akham jisktʼastanjja: “¿Wawanakajajj sumakit jakasipjjpachäni? ¿Aka Oraqejj tukjatapachäniti? Sum jakasiñatakejj ¿kun lurañas wakisispa?” sasa. Cheqas taqeniw ukanak yatiñ muntanjja, kuna laykutejj jan ajjsarasa sum jakasiñwa suytanjja. Jiwasatï kunas jutïrin pasani uk yatsna ukhajja, uka urunakatakiw sum wakichtʼassna.

Ukhamajj ¿kunas jutïr urunakan paspachäni? ¿Khitis uk yatispa? Kuntï jaqenakajj jutïrit arsuwayapki ukanakajj yaqhepajj phoqasiwa, ukampis jila partejj janiw phoqasiwaykiti. Cheqansa, Diosakiw kunas jutïrin pasani uk sum qhanañchaspa. Bibliajj akham siwa: “Nayaw taqe kunan tukusiñapsa, qalltatpach yatiyta, nayratpachrakwa kunatejj qhepat luraskani ukanaksa yatiytjja” sasa (Isaías 46:10). Ukhamajj ¿Diosan arsutanakapajj phoqaspachänti?

Diosajj arsuwayki uka profecianakatjja, ¿qawqhas phoqasiwayjje? ¿Kunatsa ukanakat yatjjatañajj wakisi? Mä yatjjatat jaqen (meteorólogo) arunakapatï sapür phoqasispa ukhajja, ¿qharürojj kunjam urünisa uk sistaspa uk istʼsnati? Jïsa, istʼsnawa. Ukhamajj Diosan profecianakapajj kunjamsa nayra maranakan sum phoqasiwayi uk yatsna ukhajja, kuntï jutïr urunakatak arsuwayki ukanak ¿janit yatiñ munkaraksna?

MÄ JACHʼA MARKAW TʼUNJAT UÑJASÏNA:

Wali chʼamani markan tʼunjasïwip mä jaqejj arsuspa, ukat ukajj phoqasispa ukhajja, wali muspharkañäspawa.  Diosajj Nínive markajj tʼunjatäniwa sasaw mä profeta toqnam qhanañchäna (Sofonías 2:13-15). ¿Ukajj phoqaspachänti? ¿Nayra sarnaqäwit yatjjatirinakajj (historiador) kamsapjjpachasa? Khä 632 nayra pacha maraw uka profeciajj phoqasïna, ukhaw Babilonia ukat Media sat markankirinakajj Nínive marka contra nuwasipjjäna. Amuyatajja, profeciajj arsuskäna ukhatjja, 15 maranakaw pasjjäna. Nínive markat parlkasajj akham sasaw Diosajj säna: “Mä waña oraqer tukuya[täniwa]” sasa. Uka markajj wali jachʼäkchïnsa (518 kilómetros cuadrados), babilonionakampi medonakampejj jan kunakiw qʼal tukjapjjäna, janiw jupanakatak kuns jiltʼayapkänti. ¿Política toqet yatjjatiri mä jaqejj ukham sum phoqasir arunak arsuspänti?

“JUMA PATJJAROJJA JAQENAKAN CHʼAKHANAKAPWA NAKHANTAYAPJJANI”:

¿Khitis 300 maranak faltkipana, ‘mä jaqew altar patjjan jaqenakan chʼakhanakap nakhantayani’ ukat jupajj kuna sutinïnisa ukat altarajj kuna markankanisa uk saspa? Ukat uka arunakatï phoqasispa ukhajja, ¿janit uka profecía arsurejj wali uñtʼatäkaspa? Diosan mä serviripajja, ‘David chachat jutir wawanakapata, Josías sat sutini mä jaqew Betel markan mä altar patjjan jaqenakan chʼakhanakap nakhantayani’ sasin säna (1 Reyes 13:1, 2). Kimsa patak maranak qhepatwa David chachan wawanakapat jutiri mä reyejj apnaqañ qalltäna. Jupasti Josías satänwa, uka sutejj janiw uka tiempon uñtʼatäkänti. Ukampis kunjamtï jupat qhanañchaskänjja, “sepulcronakatjj apsuyänwa chʼakhanaka, ukatjja altaranwa nakhantayäna”, uka altarasti Betel markanwa jikjjatasïna (2 Reyes 23:14-16). Diosan jan yanaptʼatajj ¿maynejj uka profecía arsuspänti?

BABILONIA MARKAN TʼUNJÄWIPA:

Khiti chachas mä jachʼa marka tukjani, ukat kunjamsa uk lurani uk janïr uka chacha naskipan qhanañchaspa ukhajja, wali muspharkañäspawa. Cheqansa, Diosajj ukwa luräna. Ciro sat chachaw mä jachʼa markar tʼunjani, tʼaqhesiyat uñjasipki uka  judionakarus qhespiyani ukat qollan templo wasitat saytʼayasiñapatakiw yanaptʼarakini sasaw Diosajj säna. Ukat uka markar mantañatakejj jawiran umanakapwa Ciro chachajj wañtʼayani, markan punkunakapasti janiw jistʼantatäkaniti sasaw Diosajj sarakïna (Isaías 44:27–45:2). ¿Uka arunakajj phoqaspachänti? Nayra sarnaqäwit yatjjatirinakajja, ‘uka markajj ukhamapuniw tʼunjat uñjasïna’ sasaw sapjje. Babilonia markar muyuntkäna uka jawiran umanakapwa Ciro chachan ejercitopajj maysar irpanuküna, mä arunjja, jawiran umapwa wañtʼayapjjäna. Ukatjja, Babilonia markan punkupajj janiw jistʼantatäkänti, ukatwa soldadonakajj uka punknäm mantapjjäna. Tiempompejja, judionakar qhespiyasaw Ciro chachajj Jerusalén markan jikjjataskäna uka templo wasitat saytʼayapjjañapatak jupanakar säna. Ukajj wali muspharkañapunïnwa, Ciro chachajj janiw judionakan Diosapar sirvkänti (Esdras 1:1-3). Diosakiw ukham profecía arsuspäna.

Kunjamsa Diosan arunakapajj phoqasïna uk kimsa toqetakwa jichhajj uñjawaytanjja. Cheqansa Diosan profecianakapajj waljaw phoqasiwayi, ukatwa israelitanakar pʼeqtʼiri Josué sat chachajj akham säna: “Diosasti taqe suma arunakapwa jumanakampi phoqhe, kunjämtï jupajj arsüna ukhama. Janiw kuna arunakapas jan phoqhasisajj pasawaykiti” sasa (Josué 23:1, 2, 14). Diosan arsutanakapa ukat profecianakap phoqasirïtapjja sumwa israelitanakajj yatipjjäna. ¿Kunatsa Diosan arsutanakapajj phoqasi? Jupajj janiw jaqenakjamäkiti. Uk yatiñajj jiwasar wal yanaptʼistu, kunattejj jutïr urunakan phoqaskani uka profecianakajj wiñayatakiw taqenir yanaptʼistani.

Jaqenakajj kunas jutïrin pasani ukjja, cientificonakan yatjjatataparjama, yaqha jaqenakan sarnaqäwinakaparjama ukat yaqha ukhamanak toqew yatjjatapjje. Ukjjarusti arsutanakapajj phoqasiniti janicha uk uñjañatakejj ukhamakiw suyapjje (Proverbios 27:1).

Jaqenakat sipansa, Diosajj taqe kunwa sum yati. Jaqenakajj kunjam lurtʼatäpjjesa ukat kunas chuymapan utji uksa yatirakiwa. Ukhamajja, Jupatï munaspa ukhajja, kunjamsa jaqenakasa markanakasa sarnaqapjjani ukjja yatiyaspawa. Maysa toqetjja, amtap phoqasiñapatakiw Diosajj munañaparjam kuns mayjtʼayaspa. Jupajj akham siwa: ‘Lakajjat mistkis uka arunakajj janiw nayan ukarojj chʼusaki kuttankaniti, jan ukasti kuntï nayajj siskta ukajj phoqasipuniniwa’ sasa (Isaías 55:11). Cheqansa, Diosan profecianakapajj yatiyäwinaka, jan ukajj qhanañchäwinakawa. Ukat Jupaw taqe ukanak phoqasiyarakini.

¿Kunsa jutïr urunakat suysna? Amuytʼañataki, mä jachʼa thaya jutaskatap yatsna ukhajja, jankʼakiw uka thayat jarkʼaqasiñatak wakichtʼassna. Biblian utjki uka profecianakan phoqasiñapatakejj wakichasiñasarakiwa. Diosajj walja profecianakwa jutïr urunakatak arsuwayi, ukajj janiw yatjjatat jaqenakan arsutanakapjamäkiti. (“ Diosajj jutïr urunakat kamsisa” siski uka recuadro uñjjattʼäta.)

Jaqenakajj kunjamsa jakasipjjani ukjja, Biblian utji uka profecianakaw sum qhanañchtʼistu. Diosajj Jupa pachpat akham siwa: “Nayaw taqe kunan tukusiñapsa, qalltatpach yatiyta, nayratpachrakwa kunatejj qhepat luraskani ukanaksa yatiytjja. Nayasti sistwa: ‘Amtatanakajjajj phoqhasipuniniwa; taqe kuntejj amtkta ukanakjja lurapunïwa’” sasa (Isaías 46:10). Jumasa familiamasa jutïr urunakanjja sumwa jakasipjjasma. Uka toqet Bibliajj kamsisa uk sum yatiñatakejj Jehová Diosan Qhanañchirinakaparuw jisktʼasma. Jupanakajj jutïr urunakat yatiñatakejj janiw ajayunakaru jan ukajj yaqha ukhamanakar jisktʼasipkiti, jan ukasti Bibliatwa sum yatjjatapjje. Ukat kunsa Diosajj jutïrin lurani ukwa jumar qhanañchapjjeristam. ▪