¿JUMAJJ uka awk taykanakjamarakit jikjjatasta? Ukhaman uñjasisajj inas akham jisktʼasirïsta: ‘¿Kunjam cheqañchañajas wakisispa? ¿Cheqañchañajäspati? ¿Wawanakajar cheqañchañajj walikïskpachati?’ sasa.

Biblianjja, cheqañchaña siski uka arojj janiw castigaña, jawkʼjjaña sañak munkiti. Jan ukasti ewjjtʼaña, yatichaña, cheqapar uñtayaña sañwa muni. Janiw usuchjaña ni chhojjriñchaña sañ munkiti (Proverbios 4:1, 2).

Wawanakar cheqañchañajj mä jardín sum uñjañampi sasiwa. Nayraqatjja, jardín uñjirejj oraqwa wakichtʼi, alinak umampiw warakiptʼi, wanumpiw uchi, kunatï jan waltʼaykaspa ukanakatsa jarqʼaqewa, ukat cheqaki jiltañapatakejj khuchurtʼarakiwa. Sum jilsuñapatakejj taqe ukanak lurañajj wali askïtapwa amuyi. Awk taykanakajj ukhamarakiw kunayman toqeta wawanakaraparojj sum jilsupjjañapatakejj yanaptʼapjje. Ukanakat maynïrejja cheqañchañawa, ukampis wakiski ukarjamakiw wawanakaparojj jiskʼäsipki ukhatpach jan wali luratanakapat cheqañchapjjañapa. Ukhamatwa cheqaparjam jilsupjjañapatakejj yanaptʼapjjaspa. Kunjamtï mä jardín uñjirejj alinak jan jiwsuñapatak wali amuyump khuchhurkejja, ukhamarakiw awk taykanakajj munasiñampi suma chuymampi wawanakapar cheqañchapjjañapa.

Biblia utjayiri Jehová Diosat yateqasisaw awk taykanakajj wawanakapar cheqañchapjjañapa. Diosan cheqañchäwipajj wali wakiskiriwa, ukatwa taqe chuyma servirinakapajj uk wali askit uñjapjje (Proverbios 12:1). Ukat ukarjam sarnaqañatakiw chʼamachasipjje (Proverbios 4:13). Diosajj 1) munasiñampi, 2) wali amuyumpi ukat 3) arsutapar phoqasaw cheqañchi. Jumatï cheqañchäwi wawaman sum katoqasiñap munstajja, Jehová Diosatwa yateqasiñama ukat aka kimsa aski yatichäwirjamaw lurañamaraki.

Diosajj munasiñampi ukat munasiñatwa cheqañchi. Bibliajj akham siwa: “[Jehová] Tatitusti khitirutï munaski ukarojj cheqachiwa, kunjamatejj mä awkejj munat wawaparojj cheqachki ukhama” sasa (Proverbios 3:12). Diosajj janiw jan sinttʼasirïkiti, antisas ‘khuyapayasiriwa. Janiw jankʼaki colerasirïkiti, jan ukasti jachʼa munasiriwa’ (Éxodo 34:6). Janiw jiskʼachiri Diosäkiti, janiw usuchjir arunakampi parlkiti ni maynin pantjasitanakapaksa uñchʼukkiti, kunattejj ukanakajja, ‘mä usuchjir espadjamaw’ maynir jan waltʼayi (Proverbios 12:18).

Janiw khiti awk taykas Diosjam wali paciencianïpkaspati. Awisajj inas colerampi atipjayasirjamächïta, ukhaman jikjjatasisajja, ak amtañamapuniwa; jan kamachtʼirjam jikjjatasisa ukat colerata cheqañchañajj jukʼamp jan waltʼañaruw api. Ukajj janiw cheqañchaña sañ munkiti, jan ukasti jan amuytʼasir jaqempi sasiwa.

Jumatï jan colerasisa munasiñampi wawamar cheqañchätajja, walja askinakwa jikjjatasma. Qalltan parlaniwayktan uka George ukat Nicole jupanakajj ukhaman jikjjatasisajj kamachapjjataynasa uk uñjañäni.

“Jordan sat wawajajj utar purinjjän ukhajj esposajampejj wali coleratäsipkayätwa, ukampis kuntï sapkitän uk pacienciampiw istʼapjjta. Niyakejjay sinti arumäjjchïnjja, arumanthiru parlañwa amtapjjta. Diosar familpach maytʼasisajj ikiriw sarjjapjjayäta. Qhepärmanthejja janiw coleratäjjapjjayätti, pacienciampiw uka toqet parltʼapjjta ukat wawajarus yanaptʼapjjaraktwa. Jupajj pantjasitapjja amuyasïnwa ukat kunanaktï janiw lurkätati sapkta uksa taqe chuymaw katoqtʼasirakïna. Cheqas colerata cheqañchañajj janiw walïkiti. Nayraqat sum istʼapjjerïta ukhajj kunas walikïriwa.” (George.)

“Kullakapar ukham nuwjatapat walpun jilapatak colerayäta, ukampis janiw colerampi atipayaskti, colera apjjtayasiñkamajj cuartoparuw khitanukta. Jan coleratäjjayäta ukhajja, qhana arumpiw nuwasiñajj kunja jan walisa uk amuyayta, ukat kullakapar usuchjatapsa amuyayaraktwa. Ukham luratajajj wali askïnwa, kunattejj kullakapar qhomanttʼasaw perdón mayisïna.” (Nicole.)

Ukhamajj cheqañchäwi askïñapatakejja, munasiñampiw cheqañchañasa, jawqʼjjañjamäkchini ukasa.

Jehová Diosajj ‘juchasatjamakwa mutuyistu’ jan ukajj cheqañchistu (Jeremías 30:11; 46:28). Taqe kunsa sum amuykiptʼi, ukat ukarjamaw  cheqañchistu. Awk taykanakajj ¿kunjamsa uk yateqasipjjaspa? Stephen chachajj akham siwa: “Chuyma ustʼatäsipkchiyätsa, kunatsa Natalie wawajajj kʼarisiskäna uk janiw sum amuyapkayätti, ukampis qawqha maranisa, amuyasit janicha ukanakwa sum amuykiptʼapjjta” sasa.

Nicole warmin Robert sat chachapajja, ukhamarakiw taqe kun sum amuykiptʼi. Wawanakapajj jan walinak lurapki ukhajja, akham jisktʼasi: “¿Akjja, wasitatti lurjjapjje, jan ukajj jichhakich lurapjje? ¿Qaritäpjjeti jan ukajj usutäpjjecha? Ukat kuntï lurawayapki ukajj ¿janit yaqha toqenakat llakisipjjatap uñachtʼayki?” sasa.

Suma amuytʼasir awk taykanakajja, janiw wawanakaparojj jilïr jaqenakäpkaspas ukham uñjapkiti. Apóstol Pablojj akham sasaw säna: “Wawäkasajj wawjamaw parlayäta, amtayatsa” sasa (1 Corintios 13:11). Robert chachajj akham saskakiwa: “Wawäkasajj kuns lurirïta uk amtañaw sum amuytʼasiñataki ukat jan jankʼak colerasiñatak yanaptʼitu” sasa.

Kuntï wawanakamajj jan lurapkaspa uk janiw mayiñamäkiti, ukampis jan wali luratanakapjja janiw ukhamak uñchʼukiñamäkiti. Jupanakajj qawqha maranïpjjesa, kuns lurirjamäpjjaspa ukat yaqha ukhamanakat sum amuytʼasïta ukhajja, wakiski ukarjamakiw cheqañchäta.

Malaquías 3:6 qellqatajj akham siwa: “Nayätwa [Jehová] Diosajja, nayasti pachpakïsktwa” sasa. Diosan servirinakapajj uka arunakajj cheqätap amuyasajja Jupar wal confiyapjje. Awk taykanakatï arsutaparjam phoqasa cheqañchapjje ukhajja, wawanakajj ukhamarakiw jupanakar confiyapjjaraki. Ukampis cheqañchäwi mayjtʼayjjapjje ukhajja, pächasjjapjjewa, ukat janiw kuns lurirjamäjjapjjeti.

Jesusajj akham sarakïnwa: “Jumanakan arsuñamajja akakïñapawa, ‘Jïsa’, jan ukajj ‘janiwa’” sasa. Uka arunakajj wawanakar uywañansa phoqasirakispawa (Mateo 5:37). Kuntï jan phoqkäta ukjja janiw arsuñamäkiti. Jumatï wawamar jan wali luratapat jawqʼjjañatak arsuta ukhajja, phoqañamawa.

Wawanakar sum cheqañchañatakejj awk taykajj panipaw sum parltʼasipjjañapa. Robert chachajj akham siwa: “Wawanakajatï kuntejj mamapajj janiw lurapkasmati siskatayna uk nayar iyawsayasiñatak jutapjjatap amuyirïta ukhajja, kuntï esposajajj siskatayna ukaruw yanaptʼjjerïta”. Awk taykanakatï kuna toqets mayj mayja amuyapjjanejja, panipakiw mä amtar puriñatak parltʼasipjjañapa.

Jumatï Jehová Diosat yateqasis munasiñampi, wali amuyumpi ukat arumar phoqasa wawanakamar cheqañchätajja, wawanakamajj walja askinakwa jikjjatapjjani. Jupanakar munasitamasa, ukat sum cheqañchatamasa suma amuytʼasiri luräwinakap sum phoqeri jaqenakäpjjañapatakiw yanaptʼani. Bibliajj akham siwa: “Wawarojja suma sarnaqañapatakejja jiskʼatpach sum yaticham, ukatsti awkëjjan ukkhajja janiw uka yatichäwinakatjja armaskaniti” sasa (Proverbios 22:6).