Cuerpojan jukʼamp chʼamanïñatakejja, ejercicionak lurañatak wal chʼamachasiyäta. Tiempompejj mä gimnasio San Leandro (California, Estados Unidos) markan jistʼarta. Waljanimpiw trabajayäta, maynïrejja, ‘míster America’ premio katoqawayäna. Ukampis taqe ukanak lurasajj janiw kusisitäkayätti.

Biblia toqet sum amuyañ munataj gimnasionkir mä amigojj sum yatïna, ukhamajj mä amigopamp parltʼañatakiw chʼamañchitäna. Qhepürojja, Jehová Diosan mä Qhanañchiripaw utajar purïna, pusi horaw jisktʼanakajar Bibliampi qhanañchitu. ‘Jaypʼur kuttʼanim’ sasaw sista, ukat chika arumkamaw parlapjjta. Kuntï istʼaskayäta ukajj wal kusisiyitäna, ukhamajj kunjamsa Bibliat jaqenakar parlta uk uñjañatak qharur ¿jumamp sariristti? sasaw jisktʼta. Kunjamsa jaqenakan jisktʼanakap Bibliamp qhanañchäna ukajj wal muspharayitäna. Ukhamasti, nayajj uka pachpa lurañ munjjarakiyäta.

Gimnasio aljasajj uka precursor jilatampiw yatiyir sarjjayäta, Diosatak sapürunjam irnaqañatak chʼamachasipki ukanakaruw Jehová Diosan Qhanañchirinakapajj ukham sapjje. 1948 maranwa Cow Palace de San Francisco (California) sat estadion mayo phajjsin bautisasta. Mä maratjja, precursorajjarakiyätwa.

Ukat mamajar visittʼapjjañapatakiw jupanakar mayirakiyäta. Mamajajj sum katoqäna, qhepatjja, bautisasjjarakïnwa. Familiapatakejj ukajj janiw askïkänti, ukampis mamajajj jiwañapkamaw Diosar serviwayi, jiwatapat janiw walja tiempo paskiti. Mamajampikiw Jehová Diosan Qhanañchiripapjjayäta.

Khä 1950 maranjja, Grand Junction (Colorado) markaruw sarawayjjta, ukanwa Billieru uñtʼawayta. Jupajj 1928 maranwa nacitayna, qollqet pistʼañajj utjkäna ukhaw jilsutayna. Sapa arumaw kerosen lamparampi Minnie mamapajj Biblia liyirapirïna. Pusi maranirojj liytʼasirëjjanwa, Biblian utjki uka sarnaqäwinaksa sum yatjjarakïna. Mamapajj niya 1948 tukuya maranakanwa Jehová Diosan Qhanañchirinakapampi Bibliat yatjjatañ qalltäna. Infiernojj jan mä tʼaqhesiñ cheqätapa jan ukajj kawkhantï jiwatanakajj imatäpki uka cheqätap yateqäna (Eclesiastés 9:5, 10). Qhepatjja, awk taykapas Jehová Diosan Qhanañchiripäjjapjjänwa.

Boston markankir universidadaruw Billiejj saräna, ukampis 1949 maranwa utapar kutʼjjäna  ukat Bibliat yatjjatañ qalltjjarakïna. Profesorjam trabajañat sipansa, Diosar serviñwa amtäna. Jehová Diosan Qhanañchirinakapan 1950 maran walja markanakat jachʼa tantachäwi Estadio de los Yankees Nueva York markan lurapkäna, ukanwa Billiejj bautisasïna. Uka qhepatwa uñtʼasipjjta, casarasipjjta, ukat Jehová Diosar sapürunjan serviñ qalltapjjta.

Oregón markaruw puripjjta. Eugene sat markanwa yatiyañ qalltapjjta, ukanjja walja amigonak uñtʼawayapjjta. 1953 maranwa Grants Pass cheqar sarjjapjjta, ukanjja mä jiskʼa tamaruw yanaptʼapjjta. Uka mararakiw Escuela de Galaad ukar (clase 23) sarapjjañajatak invittʼapjjetäna, uka escuelanjja, Jehová Diosan Qhanañchirinakapajj misioneronakwa wakichapjje, ukasti South Lansing cheqan jikjjatasïna, Nueva York markat 400 kilometronak Inti jalanta alay toqenkänwa.

Phesqa phajjsina Escuela de Galaad tukuyasajja, 1954 maran diciembre phajjsin Brasil markaruw sarapjjañajjäna. Ukatakejj pä motoran avionaruw makatapjjta. Mä hora viajkasajj mä motorapaw saytʼjjäna, ukhamajj Bermudas ukat Cuba markanakaruw saytʼapjjta, 36 horanak qhepatwa Río de Janeiro (Brasil) markaru Jehová Diosan Qhanañchirinakapan sucursalapar puripjjta.

Ukan mä qawqha urunak qheparasajja, Billiempi ukat pä misionerampejj Bauru (São Paulo) markar misioneronakatak mä uta wakichiriw sarapjjta. Ukan 50.000 jila jaqenakas utjkchïnjja, nanakakiw Jehová Diosan Qhanañchiripapjjayäta.

Jaqenakar visittʼiriw sarapjjta, ukampis tatakurajj nanakatakejj wal coleräna; ‘jan jupanakar istʼapjjamti’ sasaw nanakar arkasajj jaqenakar sirïna. Mä jachʼa familiaruw Bibliat yatichañ qalltapjjta, mä qawqha semanatjja Diosar serviñwa amtjjapjjäna, ukat bautisasipjjarakïnwa. Waljaniw nanakampi Bibliat yatjjatañ qalltapjjäna.

Uka familian mä familiarapajja, wali uñtʼat grupon sarayiripänwa. Jupampejja, kawkhantï grupojj tantachasirïkän ukan mä jachʼa tantachäwi lurañ amtapjjta. Tatakurajj contrato jan phoqasiñapatak wal chʼamachasïna. Grupo sarayiristi masinakapar tantachthapisajj akham säna: “Jan phoqapjjätajja, nayajj sarjjawa” sasa. Jachʼa tantachäwejj apasipunïnwa.

Ukat 1956 maranjja, Santos (São Paulo) markaruw kimsa uru jachʼa tantachäwir 40 jilat kullakanakampi trenat sarapjjta. Bauru markar kuttʼasajja, mä carta jikjjatta, ukanjja, tamanak tumptʼirjama Jehová Diosan Qhanañchirinakan tamanakap visittʼañataki khitapjjetäna. Niya 25 maranak ukham servisajj Brasil markjja, taqpach uñtʼawayta.

Uka tiempon viajañajj wali chʼamänwa, cheqas autota, trenata, carretata, bicicletata ukat kayuki viajapjjerïta. Jaú (São Paulo) markar visittʼañ qalltapjjta. Ukan tatakurajj akham sapjjetäna:

“¡Janiw uwijanakajar yatiyapjjañamäkiti!” sasa.

“Janiw jumankkiti, Diosankiwa” sasaw nanakajj sapjjta.

Kunjamsa oraqpachan yatiytan uka toqet yatiyañatakejj La Sociedad del Nuevo Mundo en acción sat video uñachtʼayañatak amtapjjta. Ukampis tatakurajj arkirinakapampiw nuwasiñatak jutapjjäna. Uk yatisajj jankʼakiw policiar jawsapjjta. Tatakurampi arkirinakapampi teatror purinipjjäna ukhajja, walja policianakaw jupanak contra  armanakas aytʼata suyantasipkäna. Jaqenakatakejj uka videojj wali sumapunïnwa.

Kawkharutï sarapkayäta ukanakanjja, Religión toqet uñisiñajj utjapunïnwa. Blumenau (Santa Catarina) marka jakʼanjja, Brusque sat markaw utjäna, ukan pä precursor kullakanakaruw uñtʼapjjta, uka cheqanjja, jupanakajj wal tʼaqhesiwayapjje. Ukampis chʼamachasitapajj janiw inamayäkänti. Jichhajj 50 maranak qhepatjja, 60 jila tamanakaw uka cheqan utj-jje, ukhamarak Itajaí markanjja, Jachʼa Tantachäwinak apañatak mä suma utapas utjarakiwa.

Tamanakar visitʼkasajja, jilatanakampi jachʼa tantachäwinak wakichañaw wali askïnjja. 1975 maran Morumbi markan estadiopanjja, jachʼa tantachäwin sarayiripäyätwa. Janïr jachʼa tantachäwi apaskipanjja, qʼomachañatakejj uka jakʼankir 100 tamanakaruw sapa tamat tunkanir khitanipjjañapatak mayipjjäyäta.

Uka arumajj pelot anatirinakajj akham sasaw estadiot mistusajj sawkasipjjäna: “Uñtapjjam khä warminakaru escobitanakapampi” sasa. Ukhampachas chika arumkamaw ‘escobitanakampi’ taqpach estadio qʼomachapjjta. Estadio sarayirejj akham sänwa: “Kuntï jumanakajj mä qawqha horanak lurapkta ukjja, nanakajj mä semananwa lurapjjeriskayätjja” sasa.

Tatajajj 1980 maranwa jiwjjäna, mä qawqha tiempotjja mamajar uñjiriw Fremont (California) sat markar kuttʼapjjta. Precursoraskakiñataki ukat portugués aru parlirinakar yanaptʼañatakejja, arumanakan edificionak pichañatak mä trabajo jikjjatapjjta. Qhepatjja, San Joaquin sat valleruw sarjjapjjta, ukasti Fremont markat janiw jayankkiti. Ukanjja, portugués aru parlirinakarurakiw thaqhapjjayäta. Ukampis jichhajj Sacramento cheqat Bakersfield cheqakam puriñäki ukanakanwa yatiyapjjta. Jichhürunjja, California markan 10 tamanakaw portugués arut utj-jje.

Mamajan jiwatapatjja, 1995 maran Florida markaruw esposajan tatapar uñjir sarjjapjjta. Esposajan mamapajj 1975 maranwa jiwjjäna. Ukat 2000 maransti Colorado markan jikjjataski uka wasar qollunakaruw sarjjapjjta, ukajj Inti jalanta aynach toqenkiwa. Ukanwa navajo jaqenakaru utes jaqenakar Biblia toqet parlawayapjjta. Billie esposajajj febrero phajjsin 2014 maran jiwawayi.

Jehová Diosan mä Qhanañchiripajj jisktʼanakajar Bibliampi qhanañchatapat 65 jila maranakaw pasawayjje. Jupar istʼatajata ukat kuntï siskitän ukajj cheqati janicha uk yatjjatatajat ¡wali kusisitaw jikjjatasta! Ukatwa Diosar serviwayta. Ukajj wali sumapuniwa.