Julio: Ernesto, Biblia toqet parltʼastan ukajj nayatakejj wali askipuniwa. * Pasïrinjja, Diosan Reinop toqetwa jisktʼistajja, ¿uk amtastati? Diosan Reinopajj 1914 maranwa apnaqañ qalltjje sasajj kunatsa Jehová Diosan Qhanañchirinakapajj yatichapjjta, ukwa yatiñ munta saskayätawa.

Ernesto: Jïsa, revistanakamanwa uk liytʼta, Diosan Reinopajj 1914 maranwa apnaqañ qalltjje sasa, ukat mayaw pächtʼasiyitu. Kuntï creyipkta taqe ukanakajj Bibliarjamawa sasaw jumanakajj sapjjtajja.

Julio: Jïsa, ukajj ukhampunïskiwa.

Ernesto: Nayajj taqpachwa Biblia liystjja, ukampis janipuniw 1914 marjj jikjjatkti. Ukat Internet toqew mä Biblian “1914” thaqta, ukampis janiw “ni maysa” uka toqet jikjjatkti.

Julio: ¡Walikpun ukham thaqtajja! Ukham thaqatamajj pä toqetwa nayatakejj wali askejja. Mayajja, taqpachwa Biblia liystajja. Cheqas Bibliarojj wali wakiskirit uñjatamawa.

Ernesto: Jïsa, nayatakejj Bibljam yaqha librojj janiw utjkiti.

Julio: Ukajj cheqäskapuniwa. Kuna toqettï pächaskta ukjja, Bibliatwa qhanañchäwi thaqtajja, ukasa wali askirakiwa. Ukjja, Bibliarjamaw lurasktajja, Diosar uñtʼañ ‘thaqasipkakim’ sasaw Bibliajj ewjjtʼistu. * ¡Walikpun yatjjatañatakejj chʼamachastajja!

Ernesto: Yuspära, Julio. Jukʼamp yatjjatañwa muntjja. Ukatwa ukham thaqaskäyäta, ukat liyktan uka libronwa mä qawqha qhanañchäwi 1914 mara toqet jikjjatta. Ukanjja, mä reyin mä jachʼa qoqampi samkasitapatwa parli. Nayraqatjja, uka qoqarojj khuchhurapjjänwa ukat wasitampiw jilsjjäna... Ukhamjamak qhanañchi.

Julio: Ah, jïsa, ukhampun saski. Uka profeciajj Daniel 4 jaljapan jikjjatasi. Babilonia marka reyin samkasitapatwa parli, jupajj Nabucodonosor satänwa.

Ernesto: Jïsa, ukapunïskiwa. Walja kutiw uk liytjja, ukampis janipuniw Diosan Reinopata jan ukajj 1914 marat kuns qhanañchatap amuykti.

Julio: Jan ukatjj mayjtʼasimti. Kuntï uka profecía arunakajj sañ munkäna ukjja, janiw Daniel pachpas qellqkchïn ukas amuykänti.

Ernesto: ¿Cheqapuni?

Julio: Jïsa. Akham sasaw Daniel 12:8 qellqatapanjj qhanañchäna: “Nayasti istʼaskarakïyätwa kuntejj siskäna ukjja, ukampisa janiw amuytʼkäyätti” sasa.

Ernesto: Jan samti, ukhamajj janirakis nä sapakejj jan amuykatättejja. Janiw sint llakisjjäti.

Julio: ¿Kunatsa Daniel profetajj jan amuykpachäna? Diosajj janïraw uk yatisiñap munkänti.  Ukampis jichhajj uka profecianak qellqkäna ukjja, amuyjjsnawa.

Ernesto: ¿Cheqapuni?

Julio: Jïsa, Daniel 12:9 qellqataw uk qhanañchi. Akham siwa: “Taqe akanakasti jan khitiru yatiyasa imatäñapawa, tukuya horasajj purinkani ukkhakama” sasa. ¿Amuytati? uka profeciajj “tukuya horasa[nakwa]” amuyasispajj siwa. Jichhaw uka tukuya tiempon jakasktanjja, ukajj amuykayäjjewa. Liyktan uka libronwa uka toqet jukʼamp yatjjatañäni. *

Ernesto: Julio mirä ampsuma, uka profeciat amuytʼayakitaya.

Julio: Walikiwa, sum jumar qhanañchtʼañatakiw chʼamachasï.

Julio: Kuntï Nabucodonosor reyejj samkaskatayna ukwa nayraqat mä jukʼa amuytʼañäni. Ukjjarusti, kunsa uka samkajj sañ munäna ukwa yatjjatarakiñäni. ¿Walikïspati?

Ernesto: Ukajj walikipunïniwa.

Julio: Nabucodonosor reyejj mä jachʼa qoqampiw samkasïna, uka qoqajj alajjpachkamaw purïna. Ukatsti, Diosan mä angelaparuw istʼatayna uka qoqa khuchhurapjjam siri. Saphimp troncompikiw jiltʼjjäna. “Paqallqo maranaka” pasatatsti, uka qoqajj mayampiw jiltjjäna. * Uka profeciajja, Nabucodonosor reyi pachparuw nayraqat phoqasïna. Jupajj wali munañan reyïnwa; alajjpachkam purkäna uk qoqjjamänwa. Ukampis reyiñajj apaqatänwa “paqallqo maranaka” pasañapkama. Ukat kunas pasäna ¿uk amttati?

Ernesto: Mmm... Janiw amtkti.

Julio: Jan llakisimti. Bibliajja, jupajj loqheruw tukjjäna siwa, amuyatajj “paqallqo maranaka” pasañapkamaw ukhamäskäna. Janiw reyejjänti. Ukampis “paqallqo maranaka” pasatatsti, kʼumaräjjänwa, wasitampiw apnaqjjäna. *

Ernesto: Waliki, amuytʼasktwa. Ukampis ukajj ¿kunjamsa Diosan Reinopata ukat 1914 marat amuytʼañataki yanaptʼitaspa?

Julio: Cheqas uka profeciajj pä kutiw phoqasi. Nayraqatjja, Nabucodonosor reyejj jan apnaqjjäna ukhaw phoqasïna. Payïrinsti, Diosajj aka Oraqjjar jan apnaqjjäna ukhaw phoqasirakïna. Payirïkis ukaw Diosan Reinopat amuytʼayistu.

Ernesto: ¿Kunjamatsa uka profecian paykuti phoqasitap yatta?

Julio: Amuytʼañataki, uka pachpa profeciaw mä qawqha amuytʼayistu. Daniel 4:17 qellqatanjja, uka profeciajj jaqenakan ak amuyapjjañapatakïnwa sasaw qhanañchi: “Alajjpachankiri Diosajj chʼamanïtapa, taqe jaqenakana apnaqañanakapjjarojja, jupaw marka apnaqañanaksa churaraki khitirutejj churañ munki ukaru”. ¿Amuytati, ‘taqe jaqenakana apnaqañanakapjjaru’ siski uka arutjja?

Ernesto: Jïsa, ‘alajjpachankiri Diosaw taqe jaqenakana apnaqañanakapjjarojja apnaqe’ siwa.

Julio: Ukham saskapuniwa. Cheqas janiw Nabucodonosor reyitak uka profeciajj parlkiti. ‘Jaqenakana apnaqäwipatsa’ mä arunjja, Diosajj taqe jaqenakjjaru apnaqerinïtapatsa, parlarakiwa. Uka profeciat Biblian liytʼktan uka cheqanakan kunsa qhanañchaski ukanak yatjjatsna ukhaw ukajj cheqapunïskatap sum amuysna.

Ernesto: Walikiwa, qhanañchtʼaskakita.

Julio: Niyaw Diosan Reinopajj apnaqjje Jesucriston pʼeqtʼata, sasajj kutin kutinwa Daniel librojj qhanañchi. Ukanakat may uñjañäni, Daniel 2:44 qellqat liytʼañäni. Mirä ampsuma ¿liytʼasmati?

Ernesto: Jïsa. Akham siwa: “Uka reyinakan apnaqañapkamasti, alajjpachankiri Diosajj mä yaqha reino saytʼayarakini, uka reinosti janipuniw tukjatäkaniti ni apnaqatäkarakinisa yaqha markanakampejja, jan ukasti jupaw taqe yaqha reinonakarojj tukjani, wiñayan wiñayapaw uka reinojj utjarakini”.

 Julio: Waliki. Uka jiskʼa tʼaqajj ¿Diosan Reinopatwa parlaskpacha sasmati?

Ernesto: Mmm... Janiw kamskiristsa, inas ukat parlchi.

Julio: “Wiñayan wiñayapaw uka reinojj utjarakini” sasaw uka jiskʼa tʼaqajj qhanañchi. ¿Diosan Reinopat sipan yaqha gobiernojj wiñayan wiñayapatak utjaspati?

Ernesto: Janiw ni mä gobiernos utjkaspati.

Julio: Cheqas janiw utjkaspati. Diosan Reinopat parlir yaqha profecía thaqtarakiñäni. Ukasti, Daniel 7:13, 14 qellqatanwa jikjjatasi, mä jaqen reyïñap toqetwa parli. Akham siwa: “Juparurakiw munañanïñasa, jachʼa kankañasa, reinosa churatarakïna, taqe markankiri jaqenaka, kunayman casta parlani jaqenakarakiw juparojj servipjjäna. Chʼamapajj pachpakïskaniwa, reinopasa janirakiw tʼunjatäkaniti” sasa. Uka jiskʼa tʼaqanakjja, mayaw wasitampi qhanañchasiraki. ¿Uk amuytati?

Ernesto: Jïsa, mä reinotwa wasitampi qhanañchi.

Julio: Ukhamawa. Ukampis janiw mä aleq reinotak parlkiti. Amuytati, uka Reinojja, ‘taqe markankiri jaqenakjjaru, kunayman casta parlani jaqenakjjar’ munañaniwa sasaw qhanañchi. Mä arunjja, jupaw Oraqpach apnaqer gobiernojja.

Ernesto: Janiw amuykatätti, ukampis cheqak sasktajja. Ukan ukham saskapuniwa.

Julio: Uka profeciajj akham saskakiwa: ‘Chʼamapajj mä arunjja apnaqäwipajj pachpakïskaniwa, reinopasa janirakiw tʼunjatäkaniti’ sasa. Amuytati, kuntï Daniel 2:44 qellqatan liytʼktan niya ukar uñtasitwa saraki.

Ernesto: Jïsa, niya ukar uñtasitwa qhanañchi.

Julio: Akhakamajj kunanakattï parlawayktan uk jichhajj amthaptʼañäni. Daniel libron 4 jaljapan qellqat profeciajja, ‘alajjpachankiri Diosajj taqe jaqenakan apnaqañanakapjjar apnaqatapa’ jaqenakar yatiyañatak amtamp qellqatawa. Uka profeciajja, Nabucodonosor reyits jukʼamp munañani reyjjar phoqasitap uñachtʼayistu. Ukampis kunjamsa Diosan Reinopajj Jesusan pʼeqtʼata apnaqañ qalltani uka toqetjja, Daniel librpachan profecianakajj uka pachparak qhanañchi. Cheqas Daniel libron 4 jaljapan qellqat profeciajj Diosan Reinopat parlatapaw qhan amuyasi ¿janicha?

Ernesto: Jïsa, ukhamawa. Ukampis 1914 marat yatiñatakejj kunjamsa ukajj yanaptʼistu uk janïraw amuykti.

Julio: Nabucodonosor reyit amtañäni. Jachʼa qoqat parlki uka profeciajj pä phoqasïwiniwa sayätanwa. Nayraqatjja, Nabucodonosor pachparuw phoqasïna, jupaw uka jachʼa qoqjamänjja. Ukampis reyiñajj apaqatänwa, kunapachatï qoqajj khuchhuratäkäna ukat “paqallqo maranaka” paskäna ukhakama. Uka tiempo pasañapkamaw Nabucodonosor reyejj loqher tukjjäna, ukampis qhepatjja, kʼumaraptjjänwa wasitampiw tronopan apnaqjjäna. Ukat payïrinsti, Diosan aka oraqjjar apnaqatapajj saytʼayatänwa, ukampis Diosajj janiw kuna jan walsa lurkänti.

Ernesto: ¿Kunjama? Janiw amuykti.

Julio: Biblia qellqaskäna uka tiemponakanjja, Israel marka reyinakajj “[Jehová] Tatituna tronopana” * qontʼasipjje sasirïnwa. Ukampejja, Diosan uttʼayat apnaqerinakäpjjewa sañwa munäna. Mä arunjja, uka apnaqerinakan gobiernopaw Dios lanti apnaqäna. Ukampis qhepatjja, jupanakat jilapartejj janiw Diosar istʼjjapjjänti ukat markpachaw jupanakjam lurjjapjjäna. Ukatwa Diosajj  607 nayra pacha maran Babilonia markajj Israel markar katuntasjjañapatak jaytäna. Ukhat uksarojj Jehová Diosan uttʼayat reyinakajj janiw Jerusalén markan utjjänti. Mä arunjja, Diosan gobiernopajj apaqatäjjänwa. ¿Amuyañjamäskiti?

Ernesto: Jïsa. Amuyañjamäskiwa.

Julio: 607 nayra pacha maratwa paqallqo maranakajj jaktʼañ qalltasïna. Uka tiempo pasañapkamaw Diosan gobiernopajj jan apnaqjjänti. Uka tiempo tukusjjepansti Diosajj mä machaq reywa Jupa lanti apnaqañapatak uttʼayjjäna, ukampis jichha kutinjja, alajjpachankiwa. Daniel libron liytʼaniwayktan uka profecianakajja, uka paqallqo maranakajj tukusjjän ukharakiw phoqasïna. Ukhamajj ¿kunapachas paqallqo maranakajj tukusjjäna? Uka jisktʼan qhanañchäwip jikjjatsna ukhajja, Diosan Reinopajj kunapachatsa wasitampi apnaqañ qalltjje uk yatjjsnawa.

Ernesto: ¿1914 marata?

Julio: Jïsa, cheqtʼapuntaw Ernesto

Ernesto: Ukampis ¿kunjamatsa uka marätapajj yatisi?

Julio: Amtañäni, Jesusajj aka Oraqer jutkäna ukhajja, uka paqallqo maranakajj janïraw tukuskiti sänwa. * Ukhamajja, janiw 12 phajjsinakani aleq maranakatak parlktanti. Uka paqallqo maranakajj Jesusan aka Oraqer jutañapatak walja patak maranak faltkipanwa qalltjjäna, ukat alajjpachar kutʼjjäna ukhat walja patak maranak qhepatsa janiw tukuskänti. Ukampis Daniel libron qellqat profecianakajj “tukuya horasa[nwa]” * amuyasiskani sasaw sayätanjja. Bibliat taqe chuyma yatjjatiri mä grupojja, uka profecía ukat yaqha profecianak jukʼamp sum yatjjatañatakiw 1800 maranak tukuyarojj chʼamachasipjjatayna. Ukat paqallqo maranakajj 1914 maranwa tukusjjani sasaw jukʼat jukʼat amuyapjjatayna. Uka marat aksarojj kunanakatï pasawayki ukaw Diosan Reinopajj alajjpachan uka mara apnaqañ qalltjjatapa ukat ‘tukuya horasajj’ jan ukajj akapachan tukusiñapajj qalltjjatap amuyayistu. Cheqas uka toqet janiw añchhitpachajj taqpacha yateqkasmati, Ernesto.

Ernesto: ¡Muspharkañawa! Sum amuyañatakejj wasitamp uñakiptʼañäjawa.

Julio: Ukajj walïspawa. Nayajj walja tiempotwa mä jukʼsa amuyawayaraktjja. Kunanaktï parlawayktan ukajj kuntï Jehová Diosan qhanañchirinakapajj Diosan Reinopat parlapkta ukajj Bibliarjamätap amuyañatak yanaptʼstam, ukajj wali askïniwa.

Ernesto: Jïsa. Kuntï Bibliajj siski ukar wal confiyapjjatamajj nayatakejj wali askiwa.

Julio: Jumajj Bibliar nanakjam confiyañ munarakpachätawa. Kunjamtï sisksmajja, janiw añchhitpachajj taqe yateqkasmati, jisktʼanakamajj utjaskakpachawa. Sañäni, paqallqo maranakajj 607 nayra pacha maratwa jaktʼañ qalltasïna ukat Diosan Reinopatwa amuytʼayistu sasaw sistanjja. Ukampis ukajj ¿kunjamatsa 1914 maran tukusjjatap yattanjja? *

Ernesto: Jïsa, ukjja janiw sum amuykti.

Julio: Uka paqallqo maranakajj qawqha tiemposa ukjja, Biblia pachpaw amuytʼañ yanaptʼistu. Mayan uka toqet parlsna ukajj ¿walïspati? *

Ernesto: Walikiwa. Ukhamajj suyämawa.