Kunjamtï nayrïr yatichäwin uñjanktanjja, Jesusajj ‘Diosan Reinopat’ jaqenakar parlañatakiw wal chʼamachasïna (Lucas 8:1). Uka gobiernot yatiyañatakejj walja kilometronakwa Israel markpachan sarnaqäna. Mateo, Marcos, Lucas ukat Juan qellqatanakanjja, kunjamsa Jesusajj yatiyirïna ukaw qellqata, ukampis Reino toqetjja, patakats jilaw qhanañchasi. Ukanakatjja, Jesús pachpan parlatapajj waljaw uñsti. Ukampis Jesusajj kuntï Reino toqet parlirïkäna ukanakatjja, ukajj mä qawqhakiwa (Juan 21:25).

Diosan Reinopajj ¿kunatsa Jesusatakejj wali wakiskirïna? Diosaw uka Reinon reyïñapatakejj jupar ajllitayna (Isaías 9:6; Lucas 22:28-30). Ukampis jupajj janiw munañanïña, jachʼañchatäña thaqerïkänti (Mateo 11:29; Marcos 10:17, 18). Diosan reinopat yatiyañaw jupatakejj nayrankäna, jichhas nayrankaskakiwa. Kunattejj uka gobiernow alajjpachankir munat Awkipatakisa, arkirinakapatakis wali askinak lurani, uk Jesusajj sum yati. *

Jesusajj taqe chuymaw Awkiparojj munasi (Proverbios 8:30, NM; Juan 14:31). Awkipajj munasiri, khuyaptʼayasiri, cheqapar uñjiri ukhamawa, Jesusajj uk wali askit uñji (Deuteronomio 32:4; Isaías 49:15; 1 Juan 4:8). Ukatwa kuna kʼarinaktï Diosat parlapki ukjja, wal uñisi. Sañäni, jaqenakan tʼaqhesitapatjja Diosajj janiw sintʼaskiti ukat Jupaw ukanakat juchani sasaw kʼarisipjje. Cheqas ukanak uñjasaw Jesusajj ‘Diosan Reinopat suma yatiyäwinak’ jaqenakar yatiyañatakejj wal chʼamachasïna: kunattejj uka Reinow Awkipan sutip qʼomachjjani (Mateo 4:23, NM; 6:9, 10, NM). ¿Kunjamsa uk lurani?

Walja askinak jaqenakatak lurasa. Reino toqejja, Jehová Diosajj jaqenakan “taqe jachanakapwa nayranakapatjja picharani”. Kunanakatï jachaykistu ukanakjja, tukj-jjaniwa “janirakiw jiwañas, jachañas utjkjjaniti, warariñasa ni usuyasiñasa” (Apocalipsis 21:3, 4). Diosan Reinop toqew jaqenakajj jan tʼaqhesjjapjjaniti. *

Jesusajj ukatwa Diosan Reinopat jaqenakar wal yatiyañ munpachäna. Cheqas uka gobiernow Jesusan Awkipajj kunja khuyaptʼayasirisa,  chʼamanisa uk uñachtʼayani (Santiago 5:11). Ukampis uka Reinojja, Diosat jan jitheqtir jaqenakatakejj walja askinakwa lurarakini, cheqas Jesusajj jupanakar munasirakiwa.

Jesusajj aka Oraqer janïr jutkasajja, Awkip chikaw walja tiempo alajjpachan jakasïna. Taqe kunatï utjki ukanak lurañwa, Awkiparojj yanapäna, sañäni: alajjpachan utjki uka jan jaktʼkay warawaranaka, galaxianaka, kawkhantï jakasktan uka Oraqsa ukat kunatï ukan utjki ukanaksa (Colosenses 1:15, 16). Ukampis taqe luratanakat sipansa, Jesusajj jaqenakaruw jukʼamp munasïna (Proverbios 8:31, NM).

Ukham munasitapaw Jesusarojj jaqenakar yatiyañatakejj chʼamañchäna. Jupajj “suma yatiyäwinak pobrenakar churañatakiw [jutta]” sasaw qalltatpach sirïna (Lucas 4:18). Ukat kuntï siskäna ukjja, luratapampiw uñachtʼayirïna. Amuytʼañataki, jupar istʼañatak walja jaqenak tantachasipkäna ukhajja, “[jupanakat] khuyaptʼayasïnwa, ukatwa usutanakarus qollarakïna” (Mateo 14:14). Mä kutejja, lepra usuni mä chachaw akham säna: “Tata, munstajja, qolltʼasitasmawa” sasa. Jupasti, munasiñata ukat sinttʼasisajja, akham sänwa: “Muntwa, kʼumaräjjam” sasa, ukatsti qollänwa (Lucas 5:12, 13). María sat amigaparu Lázaro jilap jiwjjepan jachir uñjäna ukhajja, Jesusajj “llakitaw uñjasïna”, “chuymapsti chʼalljjtayasirakïnwa” ukat “jachänwa” (Juan 11:32-36). Lazarojj pusi urunakas jiwatäjjchïnjja, jaktayänwa, ukajj wali muspharkañapunïnwa (Juan 11:38-44).

Uka milagronakajj janiw jaqenakar wiñayatak yanaptʼkaspänti uk Jesusajj yatïnwa. Qollkäna, jaktaykäna uka jaqenakajj wasitampi usuntjjapjjaspänwa, jiwjjapjjarakispänwa. Ukampis kuntï Diosan Reinop toqejj luraskani ukajj wiñayatakïniwa, uk Jesusajj yatirakïnwa. Ukatwa mä qawqha milagronakak luräna, antisas ‘Diosan Reinopat suma yatiyäwi’ jaqenakar jankʼaki yatiyañatakiw wal chʼamachasïna (Mateo 9:35). Jesusajj milagronak lurkäna ukajja, Diosan Reinopajj kunanaktï jutïrin lurkani ukanakat mä qawqha uñachtʼäwikiwa. Kamsis Bibliajj jutïr urunakat uk jichhajj uñjañäni.

•  Usuntañanakajj janiw utj-jjaniti.

  “Ukapachaw juykhunakajj uñjapjjani, oqaranakas istʼapjjarakini; suchunakasti taruja qallunakjamaw sinkʼusipjjani, amutunakasti arnaqasipjjarakiniwa.” “Usutatwa” sasajj ‘janiw khitis sisjjaniti.’ (Isaías 33:24; 35:5, 6.)

• Jiwañajj janiw utj-jjaniti.

  “Aski jaqenakajj oraq katoqapjjani, wiñayatakiw ukan jakapjjarakini.” (Salmo 37:29.)

  “[Jehová] Tatitojj wiñayatakiw jiwañarojj tʼunjani, taqe jaqenakana nayranakapatsti jachanakapsa pichararakiniwa.” (Isaías 25:8.)

• Jiwatanakajj jaktanjjapjjaniwa.

  “Taqe jiwatanakasti arupjj istʼapjjaniwa. Ukatsti uka jiwatanakajj jaktapjjaniwa.” (Juan 5:28, 29.)

  ‘Jiwatanakajj jaktapjjaniwa.’ (Hechos 24:15.)

• Taqeniw utanïpjjani ukat trabajonïpjjarakini.

  “Jaqenakasti utanak utachasipjjani, ukan jakasipjjarakini, uvanak yapuchasipjjani, uka yaputjja manqʼasipjjarakini. Janiw ukanjja maynejj yaqhan jakasiñapataki utachkaniti, janirakiw maynejj yapuchkaniti mayninakan askipatakikejja. [...]; ajllitanakajjasti kuntejj amparapampi lurasipki ukwa manqʼasipjjani.” (Isaías 65:21, 22.)

•  Guerranakajj janiw utj-jjaniti.

  “[Diosajj] aka oraq tukuskamaw nuwasiñ tʼakurayi.” (Salmo 46:9.)

  “Janirakiw kawkïr markas yaqha markampejj nuwasiñatak sartkaniti. Janirakiw guerran nuwasiñatakis yatichäwinakjja katoqapkaniti.” (Isaías 2:4.)

• Manqʼañajj jilarkiriw utjani.

  ‘Oraqejj achunakap churani, Tatit Diosasaw askinak churistani.’ (Salmo 67:6.)

  “Trigojj yapunakan jilarkir utjpan, qollu patanakansti jilantarakpan.” (Salmo 72:16.)

• Pisin jakasiñajj janiw utj-jjaniti.

  “Jan kunan jaqenakajj janipuniw armatäpkaniti, janirakiw suytʼañapas wiñayatak tukuskaniti.” (Salmo 9:18.)

  “Jupaw artʼasir jan kunan jaqerojj antutayani, yanap jan jikjjatir llakit jaqerus yanapani. Jupaw jan kunan jaqenakat khuyaptʼayasini, aynachtʼat jaqerus yanaptʼani, jan kunan jaqenakan jakañapsti qhespiyarakini.” (Salmo 72:12, 13.)

Taqe uka bendicionanakat yatjjatasajja, kunatsa Jesusatakejj Diosan Reinopat wakiskirïna uk ¿amuytati? Jupajj taqe istʼañ munirinakaruw Reino toqet parläna, kunattejj uka gobiernokiw taqe jan waltʼäwinakas askichaspa.

¿Jumatakejj Diosan uka bendicionanakapajj askiti? Ukhamächi ukhajja, ¿kunjamsa Diosan Reinopat jukʼamp yateqasma? Uka bendicionanak katoqañatakejj ¿kuns lurasma? Akjjar jutki uka yatichäwinwa ukajj qhanañchasiski.