JOSEYAJJ wali qarjatapuniw jumpʼi mayaki cárcel manqhan uks aksa sarnaqaski. Trabajopajj wali chʼama tukuñawa, uka manqhajj wali juntʼurakiwa. Anqanjja, urüskiwa ukampis uka manqhajj chʼamakawa, sinti juntʼurakiwa. Uka carcelajj kunjam luratasa, ukanak Joseyajj sum uñtʼjje, kunattejj ukanwa jakasi. Carcelan respetapkchisa, prisionerokïskiwa.

Utapatsa, awkipan uywanakapatsa, Hebrón qollunakatsa walpun amtasi. ‘Jupajj 17 maranïkän (NM)’ ukhajja, awkipan khitatajj walja kilometronakwa saräna. Ukampis jichhajj carcelakjjasajj janiw kawkïr sarirjamäjjesa. Juparojj jilanakapaw uñisiñat jiwayañ munapjjäna ukatsti, alakip luririnakaruw aljapjjäna. Jupanakajj Egiptoruw apapjjäna, ukansti Potifar sat egipcio chachan utapanwa trabajïna. Tiempompejja, Potifar chachajj Joseyarojj confiyjjänwa, ukampis Potifaran warmipajja, ‘nayampiw ikintasiñ muni’ sasaw jupar kʼarintäna, ukhamatwa Joseyajj carcelan jistʼantat uñjasïna (Génesis 37 ukat 39 jaljanaka). *

Joseyajj 28 maranëjjewa, 10 maranakaw esclavöjje, mä arunjja, carcelankjje. Janiw jupajj ukham jakasiñ munkpachänti. ¿Carcelat kunapachas mistjjpachäniti? ¿Munat awkipampisa, Benjamín sullka jilapampis wasitamp jikispachäniti? ¿Qawqha tiempompis carcelankaskpachäni?

¿Jumajj jupjam jikjjatasirïtati? Awisajj janiw kuntï waynäkasajj munkayätan ukhamapunïkiti. Llakisiñakiw jan tukusirjamäski, ukat ukar saykatañajj chʼamarakiwa. ¿Kunjamsa Joseyan iyawsäwipajj yanaptʼistaspa? Uk jichhajj uñjañäni.

Jehová Diosajj janipun jupar jaytatapjja, Joseyajj sum yatïna ukat ukaw aguantaskakiñatakis yanaptʼpachäna. Cárcel manqhansa Diosan bendicionap katoqarakïnwa. Bibliajj akham siwa: “[Jehová] Tatitojj Joseampïskakïnwa, munasiñapsa uñachtʼayaskakïnwa, cárcel uñjirimpis Joseajj wali sumankänwa” sasa (Génesis 39:21-23). Joseyasti, wal trabajirakïna, ukhamïpansti Diosajj wal bendicïna. Diosajj jupampïskatap amuyasajja, janiw sinti llakiskpachänti.

“¿Jehová Diosajj wiñayatakit akar jaytpachïtani?” sasin inas jisktʼaschïna. Uka toqetjja, sapa kutiw oracionan mayisirïpachäna. Ukat jan suykis uka toqew Diosajj mayisïwip istʼäna. Mä urojja, pä presonakaruw uka carcelar apanipjjäna. Jupanakajj faraonan servirinakapäpjjänwa, maynïrejj panaderonakan jilïripänwa, maynisti coperonakan jilïriparaki (Génesis 40:1-3).

Cárcel uñjirejja, Joseyaruw uka pä chachanakar uñjañapatak jayti. * Mä arumajja, panpachaniw  cheqäkaspas ukham mä samka samkasipjjäna. Kheparmanthejj jupanakar llakita uñjasajja, Joseyajj akham sasaw jisktʼi: “¿Kunatsa wali mayjtʼatäpjjta?” sasa (Génesis 40:3-7). Wali suma arumpi Joseyan parljjayatap laykuy inas llakinakap yatiyapjjchïna. Kunjamsa ukajj carcelat mistuñapatak yanaptʼani ukjja, Joseyajj janiw yatkiti. Inas akham jisktʼassna: Joseyatï jupanakat jan llakiskaspäna ukajj ¿parlapjjaspänti? sasa. Jiwasajj jupat yateqasisajja, ‘¿mayninakat llakisiraktanti?’ sasin jisktʼasiñasaw wakisispa. Ukhamatwa Diosar iyawsäwinïtas uñachtʼayaraksna.

Uka pä jaqenakajja, ‘mä samka samkasipjjta, ukampis kun sañ munchi uk janiw yatipkti’ sasaw Joseyar sapjjäna. Egipcionakajj samkanakat wal yatiñ munapjjerïna ukat samkanakap qhanañchayasiñatakejj maynir thaqapjjapunirïnwa. Uka pä jaqenakajja, Jehová Diosat uka samkanak jutatapjja janiw yatipkänti, ukampis Joseyajj yatïnwa. Ukatwa akham säna: ‘¿Janit Diosasti uka samka qhanañchirïkisti? Awistʼapjjetay uka samka’ sasa (Génesis 40:8). Uka arunakampejj altʼat chuymanïtapwa uñachtʼayäna. Jichhürunakanjja, Bibliat taqe yatjjatirinakaw ukham lurapjjañaparaki: jachʼa jachʼa tukuñat sipansa, altʼat chuymampiw kuntï Bibliajj sañ munki uk amuytʼañataki Diosar mayisipjjañasa (1 Tesalonicenses 2:13; Santiago 4:6).

Coperuw nayraqat parlañ qallti. Samkapanjja, mä uva ali kimsa ramanakani uñjatayna, ukasti uva achunakanïnwa. Uvanak poqorjjepanjja, reyin copaparuw chʼirwsüna. Joseyajj Jehová Diosan yanaptʼapampejj ukaratpachaw kuntï uka samkapajj sañ munkäna uk amuyäna, ukat akham säna: ‘Uka kimsa ramanakajj kimsa uruwa. Akat kimsa ururusti faraonajj nayra trabajomaruw wasitat uchjjätam’ sasa. Jupajj uk yatisajj kusisïnwa, Joseyasti akham sasaw rogtʼasïna: “Nayat amtasitätawa, nayjjatsti faraonarojj parltʼarakimaya” sasa (Génesis 40:9-15).

Coperur ukham sum yatiyir istʼasajja, panaderojj samkap Joseyar yatiyarakïnwa. Samkapanjja, tʼantʼa phoqantat kimsa canastanakwa pʼeqepjjar apaskäna, ukat jamachʼinakaw mä canastat tʼantʼanak manqʼsuskäna. Jehová Diosajj uka samka qhanañchañapatakejj Joseyar yanaptʼarakïnwa, ukampis janiw suma yatiyäwinakäkänti. Joseyajja, akham sänwa: ‘Kimsa canastanakajj kimsa uruwa. Akat kimsa ururusti faraonajj pʼeqemwa khuchhoqätam, ukat mä lawaruw warkkatätam jamachʼinakarakiw aychamjja manqʼapjjani’ sasa (Génesis 40:16-19, NM). Suma yatiyäwiskpas janisa, Joseyajj Diosan mayni servirinakapjamarakiw jan ajjsartʼasa, Diosajj kuntï siskäna uk yatiyäna (Isaías 61:2).

Kimsa urunak pasatatsti kuntï Joseyajj siskäna ukajj phoqasipunïnwa. Faraonajj mara phoqasaw uruyasiskäna (uka costumbrenakjja, Diosar jan servirinakakiw lurapjjerïna) ukansti, pä servirinakaparuw juchañchäna. Panaderojja,  cheqapuniw jiwayatäjjäna, ukampis coperojj wasitampiw faraonar loqtjjäna. Ukampis Joseyat armasjjänwa (Génesis 40:20-23).

Pä maraw pasawayjje (Génesis 41:1). Joseyajj Jehová Diosan yanapapampi uka pä jaqenakan samkap qhanañchasajja, ‘carcelat niyaw mistjjä’ sasaw sapa alwa inamay suypachäna, ukampis jan mistjjasajja, arumanakajj llakisirakpachänwa. Uka pä maranakajj jupatakejj wali chʼamapunïpachänwa. Ukhamäkchïnsa, janiw aynachtʼkänti, antisas Jehová Diosar confiyasiskakïnwa. Ukham jan walin uñjasisajj jukʼamp chʼamañchtʼataw nayrar sartaskakiñ amtäna (Santiago 1:4).

Aka qhepa urunakanjja, jiwasajj ukhamarakiw jan aynachtʼas aguantaskakiñasa. Jiwasatï jan waltʼäwinakar saykatañ munstan ukhajja, paciencianïñasawa ukat Diosaruw yanaptʼa mayiñasa. Jupajja, Joseyarojj yanaptʼänwa, jiwasarojj jan aynachtʼas suytʼaskakiñatakejj yanaptʼarakistaniwa (Romanos 12:12; 15:13).

Inas coperojj Joseyat armaschïna, ukampis Jehová Diosajj janiw armaskänti. Mä arumajja, faraonarojj jan armkay pä samkanakwa samkasiyäna. Nayraqatjja, faraonajj Nilo jawirat paqallqo suma likʼi wakanak mistuskirwa uñji, ukjjarusti paqallqo phiru tʼukha wakanakaw mistunipjjarakïna. Uka tʼukha wakanakajj likʼi wakanakaruw manqʼantäna. Payïr samkapansti mä sapa trigo alinjja paqallqo suma achuni trigo puyanakwa uñjäna, ukjjarusti paqallqo chʼusu wañsuta trigo puyanakarakwa uñjarakïna, ukatjja, suma trigo puyanakaruw manqʼantäna. Qheparmanthisti, faraonajj wali mayjtʼataw ukham samkasisajj sartasïna, ukatsti taqe yatiñan jaqenakaru ukat yatirinakaruw samkap qhanañchapjjañapatak jawsayäna, ukampis janipuniw khitis qhanañchañ puedkänti (Génesis 41:1-8). Uka samkat inas jan parlañanak parlapjjchïna jan ukajj amukëjjapjjchïna uk janiw yatktanti. Ukampis janipuniw khitis uka samkap qhanañchkänti, faraonasti walpun samkapat yatiñ munarakïna.

Coperojj qhepatakwa Joseyat amtasi. Chuymap wal pesayasisajja, kunjamsa pä maranak nayrajj panaderonakan jilïriparu ukat juparusa samkanakap Joseyajj qhanañchäna ukwa faraonar yatiyi. Faraonasti, ukaratpachaw Joseyar jawsayanïna (Génesis 41:9-13).

Joseyajj reyin khitanakapar mantanir uñjasajj kunjamak jikjjataskäna uk janiw amuyksnati. Jupajj jankʼakiw isimp turksusïna ukat sunkhapsa yawirasïna. Inas egipcionakjam ñikʼutaps qʼal khuchhuraschïna. Reyimpi parlañatakejj Jehová Diosar wal mayisirakpachäna, ukhamat bendicionap katoqañataki. Parlañatakejja, jankʼakipuniw faraonan palaciopar saräna. Reyejj Joseyar kamsänsa uka toqet Bibliajj akham siwa: “Mä samka samkasta, ukatsti janirakiw khitis qhanañchañ puedkituti, ukampis istʼtwa, jumajj mä samka istʼasajj qhanañchirïtama” sasa. Joseyajj wasitampiw altʼat chuymanïtap uñachtʼayäna, akham sänwa: “Ukajj janiw nayat wakiskiti, ukampisa Diosaw jumarojj askimataki qhanañchätam” sasa (Génesis 41:14-16).

Jehová Diosajj altʼat chuymaninakaru ukat Jupat jan jitheqtirinakarojj wali askitwa uñji, ukatwa Joseyarojj kuntï faraonan yatirinakapasa sacerdotenakapas wal yatiñ munapkäna uk yatiyäna. ‘Uka pä samkanakajj pachpakiwa’ sasaw Joseyajj faraonar säna. ‘Pä kuti samkaskta ukajja, kuntï Diosajj lurañ amtki ukjja, phoqapuniniwa sañwa muni. Suma likʼi wakanakasa, suma trigo puyanakasa, paqallqo maranakawa, uka maranakan taqe kunas jilarkiriw Egipton utjani. Ukjjarusti, paqallqo machʼa maranakaw utjarakini, ukwa phiru tʼukha wakanakasa, wañsuta chʼusu trigo puyanakas sañ munaraki. Manqʼat pistʼañaw utjani, uksti jaqenakajj janipuniw armapkaniti’ sasaw sarakïna (Génesis 41:25-32).

Kuntï Joseyajj siskäna ukajj cheqätap reyejj yatïnwa. ¿Kuns lurapjjpachäni? Joseyajj akham sasaw jupar ewjjtʼäna: Jumajj mä “suma amuytʼani chʼikhi” jaqeruw ajlliñama. Jupasti paqallqo suma maranakanjja, trigo cosechanak sumpun  imañapa, ukhamat paqallqo machʼa maranakan taqenir churañataki (Génesis 41:33-36). Joseyajja, carcelankkasajj taqe kuns sum yäparu apnaqañwa yateqäna, kuntï faraonar siskäna ukanak sum phoqaspäna, ukampis janiw jupa pachpa jachʼañchaskänti. Jupajj wali altʼat chuymanïtapata ukat iyawsäwinïtap laykojj janiw ni akchʼas ukanak amtkänti. Jiwasatï Jehová Diosar taqe chuyma confiyañäni ukhajja, janirakiw kun lurañ yatisasa jiwas pachpa jachʼachaskañäniti ni jiwasatakikis taqe kun munkañäniti. Jan ukasti Jehová Diosan amparaparuw jaytañäni ukat pacienciampiw suytʼañäni, Jupaw ukanak askichaskani.

Joseyan ewjjtʼapajj wali askïtapwa faraonas ukat servirinakapas amuyapjjäna. Ukat Joseyajj Jehová Diosapampi yanaptʼatäskatapsa faraonajj amuyarakïnwa, ukatwa taqe servirinakap nayraqatan akham jisktʼi: “¿Jupjam yaqha jaqerojj jikjjatasispati?” sasa. Ukat Joseyarojj akham saraki: “Diosarakiw jumarojj taqe akanak yatiytam. Jumajj jichhajj palaciojjan jachʼa jilïrïyätawa, jumaw apnaqäta. Taqe jaqenakasti jumaruw jaysapjjarakïtam. Nayasti juman jilïrimakïyäwa reyïtajj layku. Nayasti taqe aka Egipto markpachatakiw mä gobernadorat uttʼaysma” sasa (Génesis 41:38-41).

Faraonajj arsutaparojj phoqänwa. Suma lino isimpi isthapiyapjjam sasin jankʼakiw säna, ukat amparapat anillop apsusisaw Joseyar churäna. Ukat mä qori collar churarakïna. Taqe markpachar viajañapatakejj jupankïrit payïri suma carropwa churäna ukhamat kuntï lurañapäki uk phoqañapataki. (Génesis 41:42-44). Joseyajj carcelankänwa, jichhasti reyin palaciopanwa irnaqjjäna; prisionerönwa jichhasti Egipto marka reyin yanapiripäjjänwa. Jehová Diosar confiyañajj kunja askis uk Joseyajj sum yatïna. Kunjamsa Joseyajj walja maranak tʼaqhesïna uk Diosajj sum uñjaskäna ukat horasaparuw wakiski ukarjam taqe ukanak askichäna. Ukampis janiw askichañ amtampik uk lurkänti, jan ukasti jutïr Israel markar jarkʼaqañ laykuw ukanak luraskäna. Uka toqetjja, akar uñtasit jutïr yatichäwinwa qhanañchasiskani.

Inas jumajj walja maranaka tʼaqhesiskaraksta, ukampis jan llakisimti. Joseyat amtasipunim: jupajj altʼat chuymanipunïnwa, iyawsäwipansa janirakiw aynachtʼkänti, munasirïtapsa uñachtʼayaskakïnwa. Qhepakamaw aguantäna, ukatwa Jehová Diosajj chʼamachasitapar bendicirakïna.