BRASIL markankir Sidnei waynajj akham jisktʼasïna: “¿Kunatsa akajj nayar pasitu? ¿Kunatsa Diosajj akhaman uñjasiyitu?” sasa. Jupajj 24 maranïkäna ukhaw mä piscinan jachʼa suchuñapat jaqoqtäna, ukhatwa jan sartirjam uñjasiwayi.

Waljaniw usuntata, chhijinakana, chʼajjwäwinakana, jan waltʼäwinakan uñjasipjje, jan ukajj munat familiapat maynis jiwjje ukhajj wali llakitaw jikjjatasipjje, ukatwa Diosajj jupanakat janis llakiskaspa ukham amuyapjje. Nayra tiempon ukhamarakiw jikjjatasipjjäna. Kunapachatï Job chachajj jan walinakampi tʼaqhesiyat uñjaskäna ukhajja, Diosas ukhaman uñjasiykaspa ukham amuyäna. Jupajj akham sänwa: “Dios Tata, jumatjja yanapwa maysma, ukampis janiw jumajj istʼkistati, artʼasinsmawa, ukampisa janiw istʼkistati. Nayatakisti wali qhoruw tukjjtajja, jan khuyaptʼayasisaw arknaqarakistajja” sasa (Job 30:20, 21).

Job chachajja, janiw khitis jupar tʼaqhesiyaskäna, ni kunatsa tʼaqhesïna uk yatkänti. Ukampis Bibliajja, kunatsa tʼaqhestan, kunjamsa ukanakar saykatsna uk qhanañchistu.

Jehová Diosat Bibliajj akham siwa: “Luräwipasa cheqaparakiwa, luratapasa cheqarakiwa. Jupasti cheqapa Diosawa, janiw jupanjja kunatejj jan cheqapäki ukajj utjkiti, ¡jupasti cheqapawa, askirakiwa!” sasa (Deuteronomio 32:4). Ukhamajja, Diosajj “cheqapawa, askirakiwa” janiw tʼaqhesiykistaspati, ni kuna jan walinakampis suma jaqer tukuyañatak yantʼkistaspati.

Antisas Bibliajj siwa: “Kunapachatejj maynejj kuna jan wal lurañatakis yantʼata uñjaschi ukajja, janiw amuyañapäkiti Diosas yantʼkaspa ukhamjja. Diosasti janiw kuna jan walimpis yantʼkiti, ni khitirus yantʼar puriykarakiti” sasa (Santiago 1:13). Diosajj jaqenakar qalltan jan juchanwa luräna, mä suma utjäwi, suma irnaqäwi, ukat kunatï kusisit jakañatak wakiskäna ukanaksa churarakïnwa sasaw Bibliajj yatichistu. Adanampir Evampir Diosajj sänwa: “Wali mirantapjjam, aka oraqerusti phoqhantapjjarakim, apnaqapjjarakim” sasa. Janis Diosajj jupanakat llakiskaspa ukham amuyapjjañapajj janiw wakiskänti (Génesis 1:28).

Jichha tiempon jakasiñajj chʼamakiwa, oraqpachanwa jaqenakajj wali tʼaqhesiyata uñjasiwayapjje. Bibliajj akapachat parlkasajj akham siwa: “Diosan lurat oraqejj wal tʼaqhesiski, kunjamtejj mä wawachasir warmejj warariski ukhama” sasa (Romanos 8:22). Ukhamasti ¿kunas pasäna?

Uk sum yatiñatakejja, jaqenakajj aka Oraqen jakañ qalltapkäna uka tiempot yatjjatañaw wakisi. Mä angelaw Dios contra saytʼäna. Uka angelasti Supayänwa, Adanampi Evampiruw Dios contra saytʼayäna. Diosajj jupanakar “aski ukhamarak ñanqha yatiñ churir qoqatjja” janiw manqʼapjjätati sasaw säna, ukampis janiw ukar istʼapkänti, kunatï walïki ukat jan walïkaraki uk munañaparjamaw amtañ munapjjäna. Eva warmirojj uka qoqa manqʼäta ukhajj janiw jiwkätati sasaw Supayajj säna, ukampejj Diosajj kʼariwa sañwa munaskäna. Ukatjja jupanak pachpatak kunatï walïki ukat jan walïkaraki uk amtañatsa Diosajj jarkʼkaspa ukham Supayajj amuyayäna (Génesis 2:17; 3:1-6). Ukampejja, ‘jaqenakajj Diosat jitheqtasajj wali sumaw jakasipjjaspa’ sañwa Supayajj munaskäna. Ukatwa akham jisktʼasiñajj utjawayi: ‘¿Diosajj sumti apnaqestaspäna?’ sasa.

Jaqenakajj Diosar bendicionap laykukiw servipjje sasaw Supayajj sarakïna. Job chachat Supayajj Diosar akham sänwa: ‘Jumajj janiw khitin juparu llamktʼañapsa munktati, janirakiw familiaparusa, kuna yänakapatejj utjki ukanakarusa. Jumasti juparojj bendeciraktawa. Jichhasti utjki ukanak apaqam ukapachaw uñjata, kunjamtejj juman ajanumaru ñanqha arunakampi maldecïtam ukjja’ sasa (Job 1:10, 11). Supayajj Job chachatsa parlkchïnjja, taqe jaqenakaw Diosar bendicionap layku servipjje sañwa munaskäna.

¿Kunjamatsa taqe uka jisktʼanakajj qhanañchasispäna? Wali yatiñani Diosajja, kunjamatsa ukanakajj askichasispa uk sumwa amtäna (Romanos 11:33). Jaqenak pachpa mä qawqha tiempo apnaqasiñapatakiw jaytäna, ukhamat khitis sum apnaqaspa uk qhan amuyasiñapataki.

Kunjamanakansa akapachajj jichha tiempon uñjasi, ukajj jaqenakan jan wali apnaqatap uñachtʼayi. Janiw sumankañsa, kusisiñsa utjayapkiti, ni llakisiñsa chhaqtayapkiti, jan ukasti jupanak pachpaw akapachar jukʼampi jan waltʼayasipki. Ukatwa Bibliajj jupanakat akham sasin qhanañchi: “Jaqejj janiw alaskiti pachpa jakañapjja, janirakiw tukuyäwipsa munañapar apnaqkaspati” sasa (Jeremías 10:23). Diosajj akapach apnaqjjani ukhakiw cheqpach sumankañsa, kusisiñsa ukat sum jakasiñsa jikjjatañäni, Jupajj ukwa sapa maynitak muni (Isaías 45:18).

¿Kunjamsa uk phoqani? Jesusajj arkirinakapar mayisiñ yatichkäna ukhajja, akham sänwa: “[Reinomampisti] apnaqapjjeta. Munañamasti luratäpan akapachanjja, kunjämatï alajjpachana luratäki ukhama” sasa (Mateo 6:10). Cheqas ukhamäniwa. Diosajj Reinop toqew kunanakatï tʼaqhesiykistu ukanak chhaqtayjjani (Daniel 2:44). Pisinkañasa, usuntañasa, jiwañasa janiw utjjaniti. Diosajj ‘Jupar artʼasir jan kunan jaqerojj antutayäwa’ sasaw sistu (Salmo 72:12-14). Bibliajj akham sarakiwa: ‘Janiw khitis sisjjaniti: “Usutatwa”’ sasajja (Isaías 33:24). Jiwatanakampisti, ¿kamachasirakinisa? Bibliajj siwa: “Horasajj purininiwa taqe jiwatanakasti [Jesusan] arupjj istʼapjjaniwa. Ukatsti uka jiwatanakajj jaktapjjaniwa” sasa (Juan 5:28, 29). Cheqas ukanak yatiñajj ¡wali kusiskañapuniwa!

Qalltan parlaniwayktan uka Sidnei waynajja, chhijir purtʼaskäna ukhat jichhakamajj 17 maranakaw pasawayjje, jupajj siwa: “Janipuniw chhijir purtʼasitajat Diosar juchañchkti, ukampis Diosajj janis nayat llakiskaspa ukham qalltan amuyayäta. Awisajj wali llakitaw jikjjatasta, jan sartirjam uñjasisajj wali jachaqtʼasta. Ukampis Biblia liyisaw Diosajj jan khitirus yantʼatap amuyta. Bibliajj akham siwa: ‘Horasajj jan waltʼañajj taqeniruw puri’ sasa. Jehová Diosar mayisiñasa, Biblian jiskʼa tʼaqanakap liyiñasa, jan aynachtʼañatakiw wal yanaptʼawayitu” sasa (Eclesiastés 9:11; Salmo 145:18; 2 Corintios 4:8, 9, 16).

Kunatsa Diosajj tʼaqhesiñanak ukhamak uñchʼukiski ukat kunjamsa jan mayampitak chhaqtayjjani uka toqet lupʼiñajja, Diosar jukʼamp confiyañatakiw yanaptʼistani. Cheqas ‘Jupar thaqerinakarojj Diosajj bendiciwa’ ukat janipuniw pächasksnati. Juparu, Yoqapar confiyatasajj janiw inamayäkaniti (Hebreos 11:6; Romanos 10:11).