BIBLIAJJ AKHAM SIWA: “Jan llakisipjjamti” sasa (Mateo 6:25).

¿Kamsañsa muni? Wali Uñtʼat Arstʼäwipanwa Jesusajj uka arunak säna. Biblia toqet parlir mä diccionariorjamajja, ‘llakisiña’ siski uka arojj griego arut akham sañwa munaspa: “Pisin jikjjatasisa, jan manqʼañ utj-jje jan ukajj kunanakatï jakäwir jan waltʼayirjamäki ukhaman uñjasisaw maynejj wali llakita uñjasispa” sasa. Jichhürunakan jaqenakajj jutïr urunakat wal llakisipjje. Cheqas kunanakatï jakañatak wakiski ukhamarak khitinakarutï munasktan ukanakat llakisiñajj walikïskiwa (Filipenses 2:20). Ukampis Jesusajj “jan llakisipjjamti” siskäna ukhajja, jan sint jutïr urunakat llakisipjjamti sañwa munaskäna, ukhamat jan llakimpi aynachtʼañataki (Mateo 6:31, 34).

¿Uka ewjjtʼajj yanaptʼistaspati? Kuntï Jesusajj siskäna ukajj wali suma ewjjtʼawa. Maynejj sint llakisi ukhajja, lejjwipajj janiw suma jikjjatasjjaspati sasaw uka toqet qellqatanakapajj qhanañchi. Ukhamarak ‘úlcera ukat asma usunakampiw maynejj apantasispa, ukatjja chuymapas akatjamatwa may saytʼjjarakispa’.

Jesusajj sinti llakisiñajj inamayawa sasaw säna. Akham sänwa: “Wali llakisitapatsti, ¿khitis jumanakatjja jakañapjja mä horampisa yaptʼasispa?” sasa (Mateo 6:27). Llakinakasat sinti lupʼiñajja, janiw suma jakasiñatakisa ni jukʼampi maranak jakañatakis yanaptʼkistaspati. Ukampis maynejj kuna jan waltï amuyki ukajj janiw ukhampun awisajj paskiti. Kunjamtï mä yatjjatatajj siskejja: “Jutïr urunakat llakisiñajj inamay tiempo aptʼawa, kuna jan walinaktï maynejj jutïr urut amuyki ukajj janiw ukhampun paskiti” sasa.

¿Kunas jan sint llakisiñatak yanaptʼistaspa? Nayraqatjja Diosaruw confiyañasa. Diosajj jamachʼinakarus manqʼayiwa, panqaranakarus sumarak isthapiyi, ukhamajj ¿janit Jupajj loqtirinakapar sum uñjkaspa? (Mateo 6:25, 26, 28-30). Ukjjarojja, urut ururjamaw jakañasa, janiw jutïr ukanakat sint llakisiñasäkiti. Jesusajj sänwa: “Jan llakisipjjamti kunatï qharürojj paskani ukatjja, qharürusti taqe uka llakisiñanakapampi phoqtʼatarakïniwa” sasa (Mateo 6:34).

Jesusan ewjjaparjamatï sarnaqañäni ukhajja, sumakiw jakasiñäni ‘Diosajj samarañapwa’ churistani (Filipenses 4:6, 7).