URU jurnal trabajisajja, Sarajj saytʼasisaw wali jayar uñtaski. Jupajj utapan lurañanak yäparuw apnaqerïna, servirinakapas trabajisajj kusisitäpjjänwa. Sarasti uka urojj wal trabajirakïna. Qarjatäsajja amparanakap qaqortʼasïna, wal lupʼiskarakïna. Inas carpap chʼukusin qaritächi. Maranak pasjjepan lupisa jallusa cabra tʼawrat lurat carpanak thanstjjpachänwa, uk uñjasajja qhawqha tiempos carpanakan jakasipjjäna uk amtpachäna. Intejj jalantjjänwa, Abrahanajj * alwäkipanwa utat mistuwayäna, jichhajja purinispa ukwa Sarajj uñchʼukiski. Chachapar khuri qollut jutaskir uñjasajj wal kusisiraki.

Abrahanajj familiapampi Canaán markar sarañatak Éufrates jawir paskatkäna ukhatjja, tunka maranakaw pasjjäna. Sarasti taqe chuymaw chachapar yanaptʼäna, walja maranakarakiw jan uñtʼat markanakar sarapjjäna. Abrahanan wawanakapajj Diosan amtap phoqasiñapatakejj mä marka saytʼayapjjañaparakïna ukjja sumwa Sarajj yatïna. ¿Kunjamsa yanaptʼpachäni? Jupajj 75 maranëjjänwa jan ususir warmirakïnwa. Ukatwa akham jisktʼaspachäna: ‘Abrahanajj nayamp casaratäsinjja, ¿kunjamsa Diosan amtapajj phoqasispa?’ sasa. Uka toqenakat wal yatiñ munpachäna.

Awisajja, kunapachas Diosan amtanakapajj phoqasini sasaw jisktʼassna. Kunatï jutïrin phoqasiñap suytʼasktan ukanak jankʼakiw uñjañ muntanjja. Sara warmin Diosar confiyatapajj ¿kunsa yatichistu?

Egipto markat kuttʼanjjapjjänwa (Génesis 13:1-4). Jichhajja Betel markat inti jalsu toqenkir qollunwa carpanakap saytʼayapjjäna, uka markarojj Luz sasaw cananeonakajj uñtʼapjjarakïna. Ukhatpachwa Sarajj kuna Suma Oraqtï katoqapjjañapäkäna uk uñjäna. Cananankir markanakaw utjäna, jaya cheqanakar apir thakinakaw utjarakïna. Ukhamäkchïnsa janiw Saran markapjamäkänti. Sarasti Ur markanwa jilsüna, uka markajj Mesopotamia cheqankänwa, 1.900 kilometronak sarañana. Ur markanjja tiendanakasa mercadonakasa utjänwa, utapas wali suma lurtʼatänwa umas waljarakipachänwa. Sarajj familiapar jaytawayjjänwa, cheqas taqe kunwa apanuküna. Ukampis Sara warmejja, ¿inti jalsu toqer uñtasin taqe ukanak jaytatapat amtaspachänti?

Diosar confiyapjjatapatjja, apóstol Pablojj akham sasaw Abrahanampit Sarampit pä waranqa maranak qhepat qellqäna: “Jupanakatejj mistunipkäna uka markapat amtasisipkakispäna ukhajja, kuttʼjjapjjaspänwa” sasa (Hebreos 11:8, 11, 15). Janiw Sarasa ni Abrahanas qhepar kuttʼañ amtapkänti. Ur markat lupʼisipkakispäna ukhajja, inas kuttʼapchispäna. Ukhamäspäna ukhajja, janiw Diosan bendicionanakap katoqapkaspänti. Janirakiw khitis jupanakat amtaskaspänti,  Diosar confiyapjjatapatjja waljaniw jichhürun jupanakat yateqasiñ muntanjja.

Qhepar uñtañat sipansa, Sarajj kunatï jutïrin pasañapäkäna ukwa amtäna. Sarajj walja maranakaw carpanak apthapiñsa, saytʼayañsa uywanak anakiñsa chachaparojj yanaptʼäna. Ukampis jukʼamp jan walinakaruw saykatañapäna. Jehová Diosajj mayampiw Abrahanarojj amtapat parläna, kunjamsa Sarajj yanaptʼani uka toqet janiw kamskänsa (Génesis 13:14-17; 15:5-7).

Sara warmejja, Abrahanampi parlañajj horasäjjewa sasaw amuyäna. Janïr jupamp parlkasajja, kunja llakitänsa jan ukajj qhawqsa ajjsaräna uk janiw yatktanti, Sarajj sänwa: “Uñjam, Tatitojj janiw wawa apaykituti” sasa. Ukatjja Agar esclavapampi wawanïñapatakiw mayïna. Ukham chachapar sañajja, Saratakejj wali chʼamäpachänwa. Jichhürunakan ukham mayiñajj janiw walïkaspati, ukampis uka tiemponjja mä chachajj yaqha warmimpiw wawanïspäna. * ¿Abrahanan wawanakapat mä marka saytʼayä sasin Diosajj arskäna uk phoqasiñapatakit Sarajj ukham lurpachäna? Kunatsa ukham säna uk janiw yatktänti. ¿Abrahanajj uk istʼasajj kunsa lurpachäna? Abrahanajj ‘kuntejj Sara warmipajj siskatayna’ uk istʼänwa sasaw Bibliajj qhanañchi (Génesis 16:1-3).

¿Diosati Abrahanar uk sañapatak Sararojj maypachäna? Janiwa, antisas Saran mayitapajj amtaparjamakïnwa. Jupajja Jehová Diosas taqe jan walinakapat juchanïkaspa ukham amuyäna, Diosajj amtap phoqañatak kunsa luraspäna uk janiw amuykänti. Yaqha warmimpi wawanïñapatak Abrahanar mayisajja, wal chuym usuyaspachäna. Sarajj munañap thaqañat sipansa mayninakar yanaptʼañwa munäna. Akapachankir jaqenakajj munañanakapakwa thaqapjje. ¿Kunjamsa Sarat yateqassna? Munañas lurañat sipansa Diosan munañap lurañaw jiwasatakejj nayrankañapa.

Agar warmejja Abrahanatakejj usurëjjänwa. Ukham usurïtapat inas Sarat sipansa jukʼamp wakiskirïkaspa ukham amuyaschïna, Agar warmejj Sarar wal jiskʼachjjäna. ¡Ukajj walpun Sarar aynachtʼaypachäna! Ukatwa Sarajj Agar warmir castigäna. Uk lurañatakejj Abrahanaruw yatiyäna, Diosas yanaptʼarakïnwa. Agar warmejj wawanëjjäna ukhajja Ismael sasaw sutiyäna, ukatjja walja maranakaw pasjjäna (Génesis 16:4-9, 16). Jehová Diosajj mayampiw Abrahanar parläna, ukhajja Sarajj 89 maranëjjänwa, chachapasti  99 maranirakïnwa. Kuntï Diosajj jupanakar yatiykäna ukajj wali musparkañänwa.

Jehová Diosajja, mayampiw Abrahán amigoparojj wawanakamar mä markar tukuyä sasajj arsüna, yaqha sutirak uchäna. Ukhakamajj Abrán sutinïnwa, jichhasti Diosajj Abrahán sasaw sutiyäna, uka sutejj “walja jaqenakan awkipa” sañ muni. Ukatjja kunjamsa Sarajj amtap phoqasiñapatak yanaptʼani ukwa Diosajj yatiyäna, yaqha suti ucharakïna. Janiw Sarai satäjjänti, uka sutejj “Chʼajjwiri” sañ munpachäna, jichhajj Sara satäjjänwa. Uka sutejj “Princesa” sañwa muni. Jehová Diosajj kunatsa uka suti uchäna uk Abrahanar qhanañcharakïnwa, Diosajj sänwa: “Nayaw juparojj bendecirakï, jupa toqsti mä wawa churarakïma. Jïsa, bendecïwa. Jupasti walja markanakan taykapäniwa, wawanakapasti markanakapan reyinakaparakïniwa” sasa (Génesis 17:5, 15, 16).

Diosajj Abrahanan wawap taypiw taqe markanakar bendisiñapäna. Uka wawajj Sara warmin wawapañapänwa. Diosajj Isaac sasaw sutiyapjjäta sasaw säna, uka sutejj “Larusiña” sañ muni. Diosajj nayaw Sarar bendesirakëjja, jupa toqsti mä wawa churarakïma sasin Abrahanar säna ukhajja, jupajj “oraqer pʼeqep puriyañkamaw altʼasïna, larusirakïnwa” (Génesis 17:17). Wali musparatänwa, kusisitarakïnwa (Romanos 4:19, 20). ¿Sarasti uk yatisajj kamspachänsa?

Uka qhepatjja, kimsa jaqenakaw Abrahanar visitir puripjjäna. Ukhajj walpun luptʼaniskarakïna, Abrahanampi Sarampejj jilirëjjapjjchïnsa jankʼakiw uka chachanakar sum katoqapjjäna. Abrahanajj Sarar akham sänwa: “Jankʼaki, mä pä tunka kilo jakʼu aptasin tʼantʼanak luram” sasa. Uka tiemponjja visitanakarojj sum katoqtʼasiñapäna. Abrahanajj yanaptʼarakïnwa, jankʼakiw mä vaca qallu irptanïna, ukhamat manqʼañanak umañanak utjañapataki (Génesis 18:1-8). Uka ‘jaqenakajja’ Jehová Diosan angelanakapäpjjänwa. Apóstol Pablojj inas uk amtchïna, ukatwa akham qellqpachäna: “Janirak katoqtʼasiñsa armasipjjamti, yaqhepanakajj ukham katoqtʼasirïpjjatapatwa jan yatkasajj angelanaksa katoqapjjäna” sasa (Hebreos 13:2). Taqeniw Abrahanampit Sarampit katoqtʼasirïña yateqassna.

Diosan amtap phoqasiñapatakejja, Sara warmimajj mä wawanïniwa sasin mayampi mä angelajj Abrahanar yatiyäna ukhajja, Sarajj carpa manqhanwa istʼaskäna. Janiw khitis jupar uñjkänti. Uka arunak istʼasajja, Sarajj larusïnwa, sarakïnwa: “Kunjämarak wawanïriststi, chachajjasa, nayasa wali chuymanëjjapjjstjjaya” sasa. Angelajj sarakïnwa: “¿Utjaspati [Diosatakejj] kuna lurañas jupataki wali chʼamätapa?” sasa. Uk istʼasinsti, Sarajj ajjsarthapïnwa, ukatsti arjjatasisaw akham säna: “Janiw nayajj laruskti” sasa. Angelajj sarakïnwa: “Jïsa, larustawa” sasa. Jiwasajj inas ukham lurarakchisnäna (Génesis 18:9-15).

¿Diosar jan confiyatapatti Sarajj laruspachäna? Janiwa. Biblianjja akham siwa: “Diosar confiyatap laykurakiw Sara warmejj wali chuymanëjjchïnsa usuriptäna, jupasti Diosarojj arsutanakapar suma phoqeritwa uñjäna” sasa (Hebreos 11:11). Sarajja Jehová Diosarojj sum uñtʼäna, taqe arsutanakap phoqaniwa sasaw confiyäna. Jiwasajj ukhamarakiw Diosar jukʼamp uñtʼañatak chʼamachasiñasa. Ukham lurasasti, kunatsa Sarajj Diosar confiyäna uk amuytʼañäni. Jehová Diosajj jan jaytjasiri, kuntï arski uk phoqeri Diosawa. Awisajja, jan creyiñjam arsutanakap istʼasajj Sara warmjamaw larusiraksna.

Sarajja 90 maranëjjäna ukhaw wawap ususïna, munat chachaparojj 100 maranirakïnwa, Sarajj walpun wawanïñ munäna. Wawaparojj Isaac sasaw Abrahanajj sutiyäna, kunjamtï Diosajj siskäna ukhama. Jilirïkchïnsa Sara warmejj wali kusisitaw akham säna: “Diosaw nayarojj larusiyitu, taqe khitinakatejj jichhajj wawanïtajj yatipjjani ukanakajj larusipjjarakiniwa” sasa (Génesis  21:6). Jehová Diosat uka milagro katoqasajja, kusisitaw Sarajj jakasjjäna, walja lurañanakanëjjarakïnwa.

Isaacajj phesqa maranëjjänwa, ñuñut tʼaqapkäna uka urusti Abrahanajj mä jachʼa fiesta luräna. Ukampis Sarajja, Agar warmin Ismael wawapajj kunjamsa Isaacat larusïna ukwa sapür ‘uñjäna’ sasaw Bibliajj qhanañchi. Agar warmin Ismael yoqapajj 19 maranëjjänwa, jupajj janiw aleqak Isaacat laruskänti, jan ukasti uñisïnwa. Walja maranak qhepatjja, Diosan amuytʼayatäsin apóstol Pablojj Ismaelajj jan waltʼayañatakiw Isaacarojj arknaqäna sasaw säna. Saratakisti Ismaelan jan wali luratanakapajj Isaacar jan waltʼayirjamänwa. Jupajja janiw wawapätap laykukejj Isaacat arjjataskänti, jan ukasti yoqap toqew Diosan amtapajj phoqasiñapäna uk sum yatïna. Ukhamasti jan ajjsartʼasaw ‘Agar warmimpi, Ismael wawapampejj utasat sarjjapjjpan’ sasin Abrahanar qhana arunakampi mayïna (Génesis 21:8-10; Gálatas 4:22, 23, 29).

‘Abrahanasti uk istʼasajj chuymapjja wal usuyasïna, Ismaelajj wawaparakïtap layku’. Ismaelarojj munasinwa, ukatwa jan wali luratanakap jan amuykänti. Maysa toqetjja Jehová Diosajj taqe kunwa uñjaskäna, ukatwa Abrahanarojj akham säna: “Jan jumajj llakisimti uka wawatjja, ukhamarak servirimatsa. Kuntejj Sara warmimajj mayktam ukanakjja phoqhaskakim, wawanakamasti Isaacatwa sartapjjarakini” sasa. Jehová Diosajja, Agar warmirusa wawaparusa nayaw yanaptʼaskä sasaw säna. Abrahanajj uka arunak istʼänwa (Génesis 21:11-14).

Sarajj suma warmïnwa, Abrahanarus wal yanaptʼäna. Janiw juparojj kunatï istʼañ munkaspa ukak yatiykänti. Familiapan jan walinak uñjasajja, qhana arunakampiw chachaparojj parläna. Ukham parlatapajj janis respetasirïkaspa ukham janiw amuyañasäkiti. Apóstol Pedrojj familianirakïnwa. Jupajja Sarajj yateqaskay warmïnwa, wali respetompiw chachaparojj uñjarakïna sasaw qellqäna (1 Corintios 9:5; 1 Pedro 3:5, 6). Saratï Abrahanarojj kuna jan walinaktï pasaskäna uk jan yatiykaspäna ukhajja, janis chachaparojj respetkaspa ukhamäspänwa, familiapajj jan walinwa uñjasirakispäna. Sarajj munasiñampiw chachaparojj Ismaelat yatiyäna.

Walja warminakaw Sarat yateqasiñ munapjje, jupajj wali respetompiw Abrahanarojj parlirïna. Awisajja yaqhep warminakajj kunjamtï Jehová Diosajj Sarar yanaptʼkäna ukham familiapar yanaptʼaspa ukwa munapjjaspa. Ukampis Sarat yateqasipjjaspawa, jupajj Diosar taqe chuyma confiyiri, wali munasiri, pacienciani warmïnwa.

Jehová Diosajja, “Princesa” sasaw Sararojj sutichäna, jupajj janiw ukham uñjatañ suykänti. Sarajj 127 maraniw jiwjjäna *, Abrahanajj walpun jupat jachäna (Génesis 23:1, 2). Sarat walpun llakisïna. Jehová Diosas ukhamarakiw Sarat llakisi, ukatwa aka oraqejj paraisor tukuyatäni ukhajj Sarar jaktayarakini. Ukanwa wali kusisita wiñayatak jakasini, khitinakatï jupat yateqasipkani ukanakasa ukhamarakiw jakasipjjani (Juan 5:28, 29).