1-3. 1) Cristianonakatakejja tantachasiñajj nayratpachas wali wakiskirïnwa sasajja, ¿kunatsa sissna? (Aka janankir foto uñjjattʼam). 2) ¿Kunsa aka yatichäwin yatjjataskañäni?

CORINNA kullakajj 17 maranïskäna ukhaw taykaparojj katuntasin jaya cheqar apapjjäna, ukanwa chʼama luräwinakan trabajiñapäna. Uka qhepatsti Corinna kullakarus ukhamarakwa katuntasin Siberia markar apapjjäna, uka markajja utapat wali jayankänwa. Ukansti Corinna kullakarojj mä esclavarjamaw trabajiyapjjäna. Thayan thayjata jan suma isini ukhamaw trabajïna. Ukhamansa jakaschïnjja, Corinnasa, yaqha kullakasa janipuniw tantachäwit faltasiñ munapkänti.

² Tantachäwir sarañatakejja, panpachaniw mä jaypʼojj 25 kilometronak sarapjjäna kawkhattï trenajj mistki ukar puriñkama. Corinna kullakajj akham siwa: “Trenajj pä horas alwaruw mistüna, sojjta horanakarakiw viajipjjayäta. Purisinjja, 10 kilometronakwa tantachäwir puriñkamajj kayuk sarapjjayäta” sasa. ¿Inamayat ukham sarapjjäna? Corinna kullakajj siwa: “Tantachäwinjja, Yatiyañataki revistatwa yatjjatapjjayäta, Diosarus qʼochupjjarakiyätwa taqe ukanakaw iyawsäwinakaj chʼamañchtʼawayapjjetu”  sasa. Kimsa urunak qhepatsti uwij uñjapkäna uka granjaruw kuttʼapjjäna. Uka granjan uñjiristi janiw tantachäwir sarapjjatap amuykänti.

³ Jehová Diosan servirinakapatakejja, tantachäwinakar sarañajj nayratpachas wali wakiskirïnwa. Cristiano tamajj uttʼayaskäna ukhajja, Jesusan arkirinakapajj tantachäwinakar sarapjjapunirïnwa (Hech. 2:42). Jiwasajj ukhamarakiw tantachäwinakat jan faltasiñ munktanti. Ukampis ukham lurañajj chʼamakïspawa. ¿Kunatsa? Inas walja horanak trabajstan, jan ukajj walja lurañanakanïstan, ukatwa tantachäwinakar sarañajj chʼamakïspa. Ukhamächi ukhajja, ¿kunas tantachäwinakat jan faltasiñatak yanaptʼistaspa? ^[1] Tantachäwinakar sarañajj kunja wakiskirisa uk amuyapjjañapatakejja, ¿kunjamsa Bibliat yateqerinakasarojj yanaptʼsna? Aka yatichäwinjja kunatsa tantachäwinakar sarañasa ukwa kimsa toqet yatjjataskañäni. 1) ¿Kunjamsa tantachäwinakar sarañajj yanaptʼistu? 2) ¿Kunjamsa tantachäwinakar saratasajj jilat kullakanakar yanaptʼi? 3) Tantachäwinakar sartan ukhajja, ¿kunjamsa Jehová Diosajj jikjjatasi? ^[2]

4. ¿Kunjamsa tantachäwinakajj Jehová Diosar jukʼamp sum uñtʼañatak yanaptʼistu?

⁴ Tantachäwinakanjja yateqtanwa. Tantachäwinakajja, Jehová Diosar jukʼamp sum uñtʼañatakiw yanaptʼistu. Amuytʼañataki, Taman Bibliat Yatjjatañataki tantachäwinjja, Jehová Diosar jakʼachasipjjañäni sat librot niya pä maraw yatjjatawaytanjja. Jehová Diosajj kunjam Diosäkitï uk yatjjatañasa, jilat kullakanakar chuymatpach arstʼir istʼañasa, Jehová Diosar jukʼamp munasiñatakiw yanaptʼawayistu. Ukatsti, arstʼäwinak istʼasasa, demostracionanak uñjasasa, Bibliat liytʼir istʼasasa, Diosan Arupatwa jukʼamp yatjjattanjja (Neh. 8:8). Sapa semanatak Bibliat liytʼañasäki ukansa, suma yatichäwinakwa jikjjattanjja, uka toqet mayni jilat kullakanakajj arstʼapki uksa istʼaraktanwa.

5. ¿Kunjamsa tantachäwinakajj jakäwimansa, Diosan arunakap yatiyañatakis yanaptʼawaytamjja?

⁵ Biblian ewjjtʼaparjam taqe kunan sarnaqañasatakiw tantachäwinakajj yanaptʼarakistu (1 Tes. 4:9, 10). Amuytʼañataki, Yatiyañataki (Taman yatjjatañataki) revistajja, Diosan markapar yanaptʼañataki lurtʼatawa. Jakäwisan Jehová Diosar nayrar uchañataki, jilat kullakanakasar perdonañataki, Diosar jukʼamp sum mayisiñatakiw uka tantachäwin yatjjattanjja. Maysa toqetjja, Cristianjam Jakañataki ukat Yatiyañataki sat tantachäwinjja jaqenakar Bibliat sum yatiyañataki ukhamarak sum yatichañatakiw yateqtanjja (Mat. 28:19, 20).

6. ¿Kunjamsa tantachäwinakajj chʼamañchtʼistu, yanaptʼarakistu?

⁶ Tantachäwinakajja chʼamañchtʼistuwa. Akapachajja, Diosar serviñansa jakäwisansa aynachtʼayañwa munistu. Ukampis tantachäwinakajja, Jehová Diosar serviskakiñatakiw chʼamañchtʼistu (Hechos 15:30-32 liytʼañataki). Tantachäwinakanjja, kunjamsa profecianakajj phoqasiski ukwa yatjjattanjja. Ukaw ‘Jehová Diosan arsutanakapajj jutïrin phoqasipuniniwa’ sasin confiyañatak yanaptʼistu. Plataformat arstʼirinakar istʼañasa, tantachasirinakaru arstʼir istʼañasa, mayninakar taqe chuym qʼochtʼir istʼañasa chʼamañchtʼistuwa (1 Cor. 14:26). Ukatsti, tantachäwi janïr qalltkipana ukhamarak tukuyjjepan jilat kullakanakamp parltʼasiñajj chʼamañchtʼarakistuwa, jupanakampïsajj mä familiakïsnas ukham jikjjatastanjja (1 Cor. 16:17, 18).

7. ¿Kunatsa tantachäwinakar sarañasapuni?

⁷ Diosajj qollan ajayupampiw tantachäwinakan yanaptʼistu. Jesusajj alajjpachar sarjjäna ukhajja, akham sänwa: “Khititejj istʼañ munki ukajj istʼpan kuntejj qollan ajayojj [tamankirinakar] siski ukjja” sasa (Apo. 2:7). Jesusajja,  qollan ajayu toqew tamanakar yanaptʼaski. Yantʼanakaru saykatañatakisa, suma amtanakar puriñatakisa, jan ajjsaras yatiyañatakisa, qollan ajayun yanaptʼapwa muntanjja. Ukatwa tantachäwinakar sarañatakejj chʼamachasiñasa. Ukhamatwa Jehová Diosajj qollan ajayupampi yanaptʼistani.

8. Tantachäwinakar saratasasa, ukan arstʼatasasa, qʼochutasasa, ¿kunjamsa mayninakar yanaptʼi? (“Kusisitaw utar kuttʼi” siski uka recuadro uñjjattʼäta).

⁸ Tantachäwinakar sarasajja jilat kullakanakasar munasitaswa uñachtʼaytanjja. Jilat kullakanakasajja, kunayman jan walinakanwa jikjjatasipjje. Ukatwa apóstol Pablojj akham sispachäna: “Thaqañasaw maynit maynikama kunjäman yanaptʼasiñasataki” sasa. Ukham yanaptʼasiñatakejja tantachäwinakar sarañasapuniwa sasaw qhanañcharakïna (Heb. 10: 24, 25). Tantachäwinakar sartan ukhajja, jilat kullakanakar yanaptʼañ munatasa, jupanakampïñ munataswa uñachtʼaytanjja. Kunapachatï chuymatpach arstʼtan ukhamarak qʼochtan ukhajja, jupanakajj chʼamañchtʼataw jikjjatasipjje (Col. 3:16).

9, 10. 1) Juan 10:16 qellqatarjamajja, ¿kunatsa tantachäwinakar sarañasa? 2) Tantachäwinakar sarapuntan ukhajja, ¿kunjamsa Diosar jan serviri familianïpki uka jilat kullakanakar yanaptʼtanjja?

⁹ Tantachäwinakajj taman mayachtʼatäñapatakiw yanaptʼi (Juan 10:16 liytʼañataki). Jesusajja, uwij awatirïkaspas ukhamwa jupa pachpat säna, arkirinakaparusti, mä tama uwijäkaspas ukhamwa uñjarakïna. Ukampis ak amuytʼañäni, pä uwijajj qollunkaspa, pä uwijajj vallenkarakispa, mä uwijasti yaqha cheqankarakispa ukhajja, ¿uka phesqa uwijanakajj mä tamakiw sissnati? Janiwa. Mä tama uwijajja, awatiripampi chikäñapawa. Jiwasajja, Awatirisat janiw amanut jitheqtañasäkiti. ‘Mä sapa tamakïñatakisa’, ‘mä sapa awatirinïñatakisa’, cristiano jilat kullakanakasampejj tantachtʼasiñasawa.

¹⁰ Tantachäwinakar sartan ukhajja, taman mayachtʼatäñapatakiw yanaptʼtanjja (Sal. 133:1). Jehová Diosan yaqhep servirinakapajj awk taykapampi, jan ukajj jil kullakanakapampi uñisitaw jikjjatasipjje. Ukampis munasiri jil kullaksa awk tayksa Diosan markapanwa jikjjatapjjani sasaw Jesusajj säna (Mar. 10:29, 30). Tantachäwinakar jan faltasis sarañäni ukhajja, jiwasarojj awkiparjama, taykaparjama, jan ukajj jil kullakaparjamaw jupanakajj uñjapjjestani. Uk amuyasajja, jan faltasisaw tantachäwinakar sarañasa.

11. Tantachäwinakanjja, ¿kunjamsa Jehová Diosar yupaychtanjja?

¹¹ Tantachäwinakar sarasajj Jehová Diosaruw yupaychtanjja. Diosaw luririsajja, ukatwa Juparojj  yupaychañasa, yuspärañasa, jachʼañchañasaraki (Apocalipsis 7:12 liytʼañataki). Tantachäwinakan Diosar mayistan qʼochtan ukhamarak Jupat arstʼtan ukhaw Diosarojj yupaychtanjja. Sapa semana Jehová Diosar ukham yupaychañajj wali askiwa.

12. Tantachäwinakar saratasatjja, ¿kunjamsa Jehová Diosajj jikjjatasi?

¹² Jehová Diosarojj istʼañasarakiwa. Jupasti tantachäwinakar jan faltasis sarañaswa muni, yamas akapachan tukusiñap jakʼankkipanjja janipuniw faltasiñasäkiti. Uka mayitapar taqe chuym istʼtan ukhajja, Jehová Diosaruw kusisiytanjja (1 Juan 3:22). Taqpach tantachäwinakar sarañatak chʼamachasitasjja, Jehová Diosajj yatiwa, wali askitwa uñjaraki (Heb. 6:10).

13, 14. ¿Kunjamsa tantachäwinakajj Jehová Diosaru ukhamarak Yoqapar jakʼachasiñatak yanaptʼistu?

¹³ Tantachäwinakar sarasajja, Jehová Diosaru ukhamarak Yoqaparu jakʼachasiñ munataswa uñachtʼaytanjja. Tantachäwinakanwa Suma Yatichiri Jehová Diosajj Biblia toqe yatichistu (Isa. 30:20, 21). Jehová Diosar jan servirïpki ukanakatjja, tantachäwinakar sarasajj akham sapjjewa: “Cheqpachawa Diosajj jumanak taypinki” sasa (1 Cor. 14:23-25). Jehová Diosajja, tantachäwinaksa ukan yatichaski uksa qollan ajayupampiw sarayi. Cheqansa, tantachäwinakar sartan ukhajja, Diosan arupwa istʼtanjja, qawqsa munasistu uksa amuyaraktanwa. Ukarakiw Jupar jakʼachasiñatakis yanaptʼistu.

¹⁴ Cristiano tama pʼeqtʼirjamajja, Jesusajj akham sänwa: “Kawkintejj paninisa, kimsanisa sutejjaru tantachatächejja, nayajj jupanak taypinktwa” sasa (Mat. 18:20). Tantachäwinakanjja, uka arunakajj cheqätapwa amuytanjja. Jesusajja, uka tamanak ‘taypinwa sarnaqe’ mä arunjja, jupaw uka tamanakarojj uñji (Apo. 1:20–2:1). Kunjamtï uñjktanjja, Jehová Diosampi Yoqapampiw tantachäwinakan chʼamañchtʼapjjestu. Ukhamasti Jehová Diosajja, juparu ukhamarak Yoqaparu jakʼachasiñatak chʼamachasiskatas uñjasinjja, ¿kunjamakis jikjjataspacha?

15. Tantachäwinakar sarasajja, ¿kunjamsa Jehová Diosar istʼañ munatas uñachtʼaytanjja?

¹⁵ Tantachäwinakar sarasajja, Jehová Diosajj Taqe Kunjjaru Munañanïtapwa uñachtʼaytanjja. Jehová Diosajja, tantachäwinakar sarañasatakiw chʼamachtʼistu, ukampis janiw munkir jan munkir sarañas maykistuti (Isa. 43:23). Ukhamasti sapa mayniw Jehová Diosar munasitassa, Jupajj Taqe Kunjjar Munañanïtapsa uñachtʼayañasa (Rom. 6:17). Amuytʼañataki, irnaqktan ukanjja inas sinti trabajonïsajj tantachäwinakar jan sarirjamäjjstanti. Jan ukajja, inas gobiernojj akham sischistaspa: ‘Janiw tantachasjjapjjätati, tantachasisipkakïta ukhajja multa pagapjjäta, jan ukajj carcelaruw sarapjjäta, sinti jan walinakansa uñjasipjjarakïtawa’ sasa. Maysa toqetjja, inas tantachäwinakar sarañat sipansa, yaqha luräwinakampi qheparjjsna. Ukhamanakan uñjasisajja, ¿kunsa lurañäni? ¿Jehová Diosarojj istʼaskakiñäniti? (Hech. 5:29). Diosajj Taqe Kunjjar Munañanïtap uñachtʼaytan ukhajja, Jupajj wal kusisi (Pro. 27:11).

16, 17. 1) Nayrïr cristianonakajj tantachasipjjapunirïnwa sasinjja, ¿kunatsa sissna? 2) George Gangas jilatajja, ¿kunjamsa tantachäwinak uñjäna?

¹⁶ Pentecostés, 33 mara qhepatjja, cristianonakajj janiw mä qawqha urunakampik tantachasipkänti, jan ukasti “taqeniw sum arkapjjäna kunjämtejj apostolunakajj yatichkäna ukhamarjama, maynit maynikama suman jakasisa. Ukhamarakiw tantachasipjjäna” (Hech. 2:42). Griego arut “arkapjjäna” sasin jaqokipaski uka arojja, aguantañatak chʼamachasiña,  jan ukajj mä luräwi jan qarjtas luraskakiña sañwa muni. Nayrïr cristianonakatakejja, tantachäwinakar sarañajj chʼamakïnwa. Jupanakarojja, romanonakaw apnaqäna, judionakan pʼeqtirinakapas jupanakar arknaqapjjarakïnwa. Ukhampachasa cristianonakajj tantachasisipkakïnwa.

¹⁷ Jichhürunakanjja, Jehová Diosan servirinakapajj ukhamarakiw tantachäwinakar wal munasipjjatap uñachtʼayapjje. Georges Gangas jilatat amuytʼañäni, jupajj 22 maranakaw Oraqpachan Jilïr Irpirinak taypin irnaqtʼawayi. Jilatajj akham sänwa: “Nayatakejja, jilat kullakanakampi tantachtʼasiñajj wali kusiskañawa, ukanwa chʼamañchtʼat jikjjatasta. Tantachasiñ Utaru nayraqat puriñasa, tukuyjjepan qhep mistuñasa wal gustitu. Jilat kullakanakampi parltʼasiñajj nayatak wali kusiskañawa. Jupanakampïsajja, familiajampïkiristsa ukhamwa jikjjatasta” sasa. Ukatjja, ‘jilat kullakanakampi tantachasiñ walpun muntjja’ sasaw jilatajj sarakïna.

18. 1) ¿Kunjamsa jumajj tantachäwinakar uñjta? 2) ¿Kun lurañsa jumajj amtta?

¹⁸ Jumajja, ¿uka jilatjamarakit tantachäwinakar uñjta? Ukhamächi ukajja, tantachäwinakar sarañatakejj chʼamachasipunim. Ukhamatwa David reyjam jikjjatasirakïta, jupasti sänwa: “Tatay, qollan utamarojj munastwa” sasa (Sal. 26:8).