1, 2. 1) Mä markat yaqha markar sarjjerinakajja, ¿kuna jan walinakansa uñjasipjje? (Aka janankir foto uñjjattʼam). 2) ¿Kunsa apóstol Pablojj ewjjtʼäna, ukat kuna jisktʼanakarus qhanañchaskañäni?

OSEI ^[1] chachajja, 30 jila maranak nayraw Gana markat Europa toqer sarjjäna, ukhajj janïraw Jehová Diosan Testigopäkänti. Jupajj akham siwa: “Uka cheqan jaqenakajj janipuniw akchʼas nayat llakisipkänti. Ukhamarusa, wali thayarakïnwa, aeropuertot mistusajj wal thayjitäna, janipuniw kunapachas ukham thayjirïkituti, ukhamanakan uñjasisaw jachaqtʼasiyäta” sasa. Niyakejjay Osei chachatakejj yaqha aru parlañ yateqañajj chʼamakïchïnjja, mä mara qhepatwa mä suma trabajo jikjjatäna. Yaqha markankasas familiapat wal llakisïna, sapärstʼataw jikjjatasirakïna.

² Osei chachjam jikjjatassna ukhajja, ¿kunjam uñjatäñsa munsna? Yaqha markatäkstansa, yaqha kasta jañchinïkstansa, taqenis taman sum katoqtʼapjjestaspa ukwa munsna. Bibliajj akham sasaw cristianonakar ewjjtʼi: ‘Jan armtʼasipjjamti jan  uñtʼatanakar munasiñamp katoqañjja’ sasa (Heb. 13:2). Aka yatichäwinjja, aka jisktʼanakaruw qhanañchtʼaskañäni: ¿Kunjamsa Jehová Diosajj yaqha markankirinakar uñji? ¿Kunjamsa jan uñtʼatanakar uñjañasa? Yaqha markat jutapki ukanakarojja, ¿kunjamsa tamasan kusisitäpjjañapatak yanaptʼsna?

3, 4. Éxodo 23:9 qellqatarjamajja, ¿kunjamsa israelitanakajj yaqha markankirinakar uñjapjjañapäna, ukat kunatsa?

³ Jehová Diosajj markapar Egiptot qhespiykäna uka qhepatjja, jupanakamp chik sarapkäna ukanakat khuyaptʼayasipjjañapatakiw israelitanakar leyinak churäna (Éxo. 12:38, 49; 22:21). Yaqha markaru saririnakatakejja, jakañajj chʼamakïnwa, ukatwa Jehová Diosajj jupanakar sum uñjäna. Amuytʼañataki, yaqha markankirinakajja, yapunakan kunanakatï jiltʼkäna ukanakwa apthapisipjjerïna (Lev. 19:9, 10).

⁴ Yaqha markankirinakarojj respetapjjañamawa sasakejj janiw Jehová Diosajj israelitanakar siskänti, jan ukasti yaqha markankasajj kunjamsa jupanakajj jikjjatasipjjäna uk amtapjjañapwa munäna (Éxodo 23:9 liytʼañataki). Janïr Egipto markar apatäpkäna ukhatpachaw egipcionakajj israelitanakar jan wal uñjapjjäna. ¿Kunatsa? Israelitanakajj janiw jupanakjamäpkänti (Gén. 43:32; 46:34; Éxo. 1:11-14). Jupanakatakejj yaqha markan jakasiñajj chʼamakïnwa. Uk amtasinjja, jupanakamp chika jakiri yaqha markankirinakarojj munasiñampiw uñjapjjañapäna, ukwa Jehová Diosajj munäna (Lev. 19:33, 34).

5. Yaqha markankirinakar kunjamtï Diosajj uñjki ukham uñjañatakejja, ¿kunas yanaptʼistaspa?

⁵ Jichhürunakanjja, yaqha markankirinakarojj munasiñampiw Diosajj uñjaraki. Ukhamajja, tamasar jutapki ukanakarojj kunja munasiñampis Diosajj uñji ukwa amtañasa (Deu. 10:17-19; Mal. 3:5, 6). Yaqha markankirinakajj kuna jan walinakansa uñjasipjjaspa ukwa amuytʼañasa. Sañäni, janiw yaqha aru jankʼak parlañ yateqapkaspati, ukhamarus ina chʼusat tʼaqhesiyataw uñjasipjjaspa. Ukatwa jupanakar munasiñamp uñjañatakisa, yanaptʼañatakis chʼamachasiñasa (1 Ped. 3:8).

6, 7. Nayrïr cristianonakajj judío masinakapamp sum apasiñwa yateqapjjäna sasajja, ¿kunatsa sissna?

⁶ Nayrïr cristianonakajja, judío masinakapamp sum apasiñwa yateqapjjäna. Pentecostés 33 maranjja, Jerusalén markan jakapkäna uka judionakajja yaqha markankirinakat cristian tamar mantapkäna ukanakarojj munasiñampiw katoqtʼapjjäna (Hech. 2:5, 44-47). ¿Kunatsa? ‘Katoqtʼasirïñajj’ ‘jan uñtʼatanakar munasiñamp katoqaña’ sañ munatap sumwa judionakajj amuyapjjäna. Ukatwa munasiñamp katoqtʼapjjäna.

⁷ Ukampis uka urunakanjja, griego aru parliri judionakajj akham sapjjänwa: “Nanakan ijma warminakajjajj janiw sapürus suma yäqatäkiti” sasa (Hech. 6:1). Uka jan waltʼäwi askichañatakejja, apostolonakajj paqallqo chachanak ajllipjjäna. Ukhamat jupanakan ukar sarasin taqenis mä kikpak uñjatäpjjañapataki. Apostolonakajj griego sutini chachanakwa ajllipjjäna, inas viudanakan jan ajjsarayasipjjañapatak ukham ajllipchïna (Hech. 6:2-6).

8, 9. 1) Yaqhachasir chuymanïtanti janicha uk amuytʼasiñatakejja, ¿kun jisktʼasiñas yanaptʼistaspa? 2) ¿Kun apanukuñatakis chʼamachasiñasa? (1 Ped. 1:22).

⁸ Markasan costumbrepampiw niya jila partejj apayastanjja (Rom. 12:2). Maysa toqetjja, yateqer masinakasarusa, trabajir  masinakasarusa, vecinonakasarusa, yaqha markankirinakata, yaqha kasta jañchininakat jan walinak parlirwa istʼtanjja. Uk istʼasajja, ¿jupanakjamarakit amuytanjja? Yaqha markankirïtasata, yaqha costumbrenïtasat mayninakajj burlasipjjestu ukhajja, ¿kunjamsa jikjjatastanjja?

⁹ Apóstol Pedrojja, mä tiempojj jan judiöpkäna ukanakarojj janiw sum uñjkänti. Ukampis uka amuyu apanukuñatakiw chʼamachasïna (Hech. 10:28, 34, 35; Gál. 2:11-14). Jiwasan chuymasantï yaqhanakar yaqhachañajj utjchi ukhajja, Pedrot yateqasisaw uk apanukuñatak chʼamachasiñasa (1 Pedro 1:22 liytʼañataki). ¿Kunas ukatakejj yanaptʼistaspa? Kawkïr markatäkstansa, taqeniw pantjasirïtanjja, ukhamarus qhespiyatäñatakejj janiw khitis askïktanti, uk amtañasaw wakisi (Rom. 3:9, 10, 21-24). Ukhamajja, mayninakat sipan jukʼamp sumäksnasa ukham janiw amuyañasäkiti (1 Cor. 4:7). Pabljamaw jikjjatasiñasa, jupajj cristiano masinakapar akham sänwa: ‘Jumanakajj janiw jaya jaqenakäjjapjjtati ni yaqha oraqenkirëjjaptasa’ jan ukasti ‘Diosan familiapäjjapjjtawa’ sasa (Efe. 2:19). Chuymasantï mayninakar yaqhachañajj jan utjkani ukhajja, machaqat isthapisiñajj janiw chʼamäkaniti (Col. 3:10, 11).

10, 11. ¿Kunjamsa Booz chachajj yaqha markankirinakarojj Jehová Diosjam uñjäna?

¹⁰ Jehová Diosat yateqasisaw Booz (Boaz) chachajj yaqha markankirinakar sum uñjäna. Mä kutejja, Booz chachajj yapup uñjiriw saräna. Ukanwa Moab markankir Rut warmir uñjäna, jupasti oraqer willeqtata cebada apthapisiskäna. Moisesan Leyiparjamajja, ukham luratapajj janiw jan walïkänti. Ukampis yapunakan kunatï jiltʼkäna uk apthapisiñatak permiso mayitap yatisajja, Booz chachajj wal muspharäna, ukatsti cebada montonanakat apthapisiñapatakiw permiso churäna (Rut 2:5-7, 15, 16 liytʼañataki).

¹¹ Booz chachajj Rut warmit llakisitapsa, yaqha markankasajj kunjamsa jikjjatasïna uk amuyatapsa, kuntï qhepat lurkäna ukanwa qhan amuyasi. Jupajja, mayni trabajir tawaqonakampi qheparañapatakiw Rut warmir mayïna, ukhamat chachanakampi jan waltʼayat jan uñjasiñapataki. Ukatsti mayni trabajirinakjam uma, manqʼa katoqañapwa munäna. Ukham lurasaw Booz chachajj yaqha markat jutir Rut warmir respetäna, chʼamañchtʼarakïna (Rut 2:8-10, 13, 14).

12. Yaqha markankirinakat khuyaptʼayasisajja, ¿kunatakis jupanakar yanaptʼsna?

¹² Booz chachajja, janiw Rut warmirojj suegraparu taqe chuyma munasitap laykukejj khuyaptʼayaskänti, jan ukasti Jehová Diosar serviñ munatapata, Jupamp jarkʼaqatäñ thaqatapatwa khuyaptʼayäna. Rut warmir munasiñamp uñjasajja, Jehová Diosat taqe chuyma munasiñ yateqasitapwa uñachtʼayäna (Rut 2:12, 20; Pro. 19:17). Jichhürunakanjja, ukhamarakiw yaqhanakat khuyaptʼayasisajj “taqenin” cheqa yatichäwinak yatipjjañapatakisa, Jehová Diosajj qawqsa jupanakar munasi uk amuyapjjañapatakis yanaptʼsna (1 Tim. 2:3, 4).

13, 14. 1) ¿Kunatsa jan uñtʼatanakarojj tantachäwinakan sum katoqtʼañasa? 2) ¿Kunas yaqha markankirimpi sum parltʼasiñatakejj yanaptʼistaspa?

¹³ Jan uñtʼktan ukanakarojja, tantachäwinakan sum katoqtʼasaw munasiñ uñachtʼaysna. Yaqha markankirinakajja, awisajj ajjsarayasipjjewa, mayninakatsa jayarstʼapjjarakiwa. Jan mä pachpa costumbrenïsa jan ukajj jan sinti qollqenïsaw janis mayninakjamäpkaspa ukham amuyasipjjaspa. Ukatwa yaqha markat jutirinakarojj munasiñampi katoqtʼañasa,  ukhamatwa jupanakat llakisitas uñachtʼayañäni. JW Language programajj arusan utjki uka toqe yateqasasa, pachpa arupat aruntañwa yateqaraksna (Filipenses 2:3, 4 liytʼañataki).

¹⁴ Yaqha markankirimpi parlañajj chʼamakïspawa. Jan ukhamäñapatakejja, jiwasatwa mä jukʼa parltʼsna. Ukhamatwa yaqha markankirejj kunanakansa niya kikpakïtan uk amuyani. Amtapuniñäni, sapa markan costumbrenakapajj mayj mayjawa.

15. Yaqha markat jutirinakajj kunjamsa jikjjatasipjje uk amuyañatakejja, ¿kunas yanaptʼistaspa?

¹⁵ Yaqha markat tamasar jutapki ukanakar yanaptʼañatakejja, akham jisktʼasiñasawa: “Nayatï yaqha markankirista ukhajja, ¿kunjam uñjatäñsa munirista?” sasa (Mat. 7:12). Yaqha markat jutapki ukanakarojj suma chuymampiw uñjañasa. Qalltanjja, kuntï amuyapki ukhamarak lurapki ukajj kunatsa jan jiwas kikpäki uk janiw amuyksnati. Ukampis janiw jiwasjamäpjjañap suyañasäkiti, jan ukasti sumwa uñjañasa (Romanos 15:7 liytʼañataki).

16, 17. 1) ¿Kunsa yaqha markankirinakar sum uñtʼañatakejj lursna? 2) Yaqha markat jutiri jilat kullakanakarojja, ¿kunjamsa yanaptʼsna?

¹⁶ Yaqha markankirinakar sum uñtʼañatakejja, inas costumbrepata, markapata yatjjatañajj wakischispa. Ukatakejja, Bibliat familjam yatjjatkasaw yaqha markat tamasaru jutapki, jan ukajj yatiyktan uka cheqaru jakir jutapki ukanakan costumbrenakapat yatjjatsna. Maysa toqetjja, jupanakamp sum uñtʼasiñatakejj utasaruw manqtʼasiñatak invittʼsna. Jehová “Tatitojj jan judionakäpkis ukanakan iyawsapjjañapata[kiwa]” punk jistʼari. Jiwasajj Jupatwa yateqassna, ukatakejj yaqha markat tamasar jutapki ukanakaruw utasar sum katoqtʼañasa (Hech. 14:27; Gál. 6:10; Job 31:32).

¹⁷ Yaqha markat jutiri mä familiar sum  uñtʼañatak chʼamachasiñäni ukhajja, kunjamsa jikjjatasipjje, kunjamsa costumbrenakasar yatinoqtañatak chʼamachasisipki ukwa amuyañäni. Inas parlktan uka aru yateqapjjañapatak yanaptʼsna, jan ukajj kawkïr institucionas mä suma uta, mä suma trabajo jikjjatapjjañapatak yanaptʼaspa ukar sarapjjañapatakiw yanaptʼaraksna. Ukhamatwa jilat kullakanakasar yanaptʼsna (Pro. 3:27).

18. Yaqha markankirinakajja, ¿khititsa respetasirïñsa yuspärasirïñsa yateqapjjaspa?

¹⁸ Rut warmit yateqasisajja, yaqha markankirinakajj markasan costumbrenakaparjam jakañatakiw chʼamachasipjje. Yaqha markan jakjjasajja, Rut warmejj kunatï yapun jiltʼkäna uk apthapiñatakiw permiso mayïna, ukhamatwa markan costumbrenakapar respetatap uñachtʼayäna (Rut 2:7). Jupajja, janiw mayninakan sum uñjatäña ni jan kun luras katoqañsa suykänti. Maysa toqetjja, khuyaptʼayatäsajj yuspärasirïnwa (Rut 2:13). Yaqha markat jutirinakatï Rut warmit yateqasipjjani ukhajja, jilat kullakanakasa, Diosar jan serviri jaqenakas respetompiw jupanakar uñjapjjani.

19. ¿Kunatsa yaqha markankirinakarojj munasiñampi uñjañasa?

¹⁹ Jiwasat khuyaptʼayasitapatsa, taqe markanakan suma yatiyäwinak yatiyasiñapatak yanaptʼatapatsa, Jehová Diosar wal yuspärtanjja. Yaqha markankirinakajja, inas Bibliat jan yatjjatapkchïnti, ni Diosan markapampis tantachasipkchïnti. Ukampis jichhajj Diosar uñtʼapjjaspawa, ukatwa sum jikjjatasipjjañapatak jupanakar yanaptʼañasa. Inas qollqesampisa, yaqha luratanakasampisa jan yanaptʼirjamäkstanti, ukampis yaqha markankirinakar munasiñampi uñjasajja, Jehová Diosat yateqasitaswa uñachtʼayañäni. Ukhamasti ‘Diosajj kunjamäkitejj ukhamäñatakejja’, yaqha markankirinakar munasiñamp katoqtʼañatak chʼamachasipjjañäni (Efe. 5:1, 2).