¿Kunatsa Jesusajj janïr jiwkasajj Davidan arunakap Salmo 22:1 qellqatat aytäna?

Mateo 27:46 ukat Marcos 15:34 textonakarjamajja, Jesusajj janïr jiwkasajj akham sänwa: “Diosajay, Diosajay, ¿kunatsa apanuktʼasista?” sasa. Ukhamatwa, kuntï Davidajj Salmo 22:1 qellqatan arskäna ukajj Jesusamp phoqasïna. Jesusajj uka arunak arsusajja, Awkipajj janis munasjjaspa, jupas janis mä ratojj Diosar confiyjjaspa ukham janiw sañ munkänti. Jupajja, kunatsa jiwañapäna uk sumwa yatïna, ukatwa jiwañatakejj dispuestokïna (Mat. 16:21; 20:28). Jupajj jiwayatäñapäkäna ukhajja, janiw khitimpisa Diosajj jupar jarkʼaqayañapäkänti, uksa yatirakïnwa (Job 1:10). Ukhamajja, Jehová Diosajj janiw Yoqapar jiwañat jarkʼaqkänti, ¿kunatsa? Jupat jan jitheqtatap jiwañapkam uñachtʼayañapwa munäna, Jesusajj walsa tʼaqeskchïnjja, aguantänwa (Mar. 14:35, 36).

Ukhamajj ¿kunatsa Jesusajj uka arunak säna? Uk janiw sum yatksnati, ukampis kunatsa ukham säna uk mä qhawqhanak yatjjatañäni. *

Uka arunakampejja, jupajj jiwayatäkani ukhajj janiw Awkipajj jarkʼaqkaniti, uk inas Jesusajj sañ munchïna. Jan Awkipamp yanaptʼataw jaqenakar juchat kutsuyañapäna. Jupajj jiwasjam jaqekirakïnwa, ‘taqe jaqenak laykuw jiwayat uñjasiñapäna’ (Heb. 2:9).

Jaqenakan taqpach Salmo 22 amtapjjañapataki inas uka qellqatat Jesusajj mä qhawqha arunak aytchïna. Uka tiemponjja, judionakajj salmonakwa pʼeqepar yatsupjjerïna. Ukhamajja, maynejj mä versículo aytirïna ukhajja, mayni versiculonak  taqpachwa amtapjjerïna. Jesusatï uk munchïna ukhajja, judío discipulonakaparuw jiwañap toqet profecianakajj uka salmon qellqatäkäna uk amtapjjañapatak yanaptʼaskäna (Sal. 22:7, 8, 15, 16, 18, 24). Ukatjja, uka salmo niya tukuyan Jehová Diosar jachʼañchaski, Juparuw reyjam apnaqañajj “akapach tukuskam” waktʼi siski uksa discipulonakapajj amtapjjarakispänwa (Sal. 22:27-31).

Davidan uka arunakap aytasajja, inas Jesusajj ina chʼusatwa juchañchapjjetu sañ munaskchïna. Jesusar janïr jiwayapkäna ukhajja, sanedrinankirinakajj Leyinak pʼakintasaw juzgapjjäna, Dios contraw jan wal parli sasinwa juchañchapjjarakïna (Mat. 26:65, 66). Sanedrinankirinakajj ratukiw arumajj tantachtʼasipjjäna, ukatsti Leyinak pʼakintasaw juzgapjjäna (Mat. 26:59; Mar. 14:56-59). “Diosajay, Diosajay, ¿kunatsa apanuktʼasista?” sasajja, janiw nayajj kuna jan walsa jiwayatäñatak lurkti sañ inas munaskchïna.

Davidajj tʼaqeskchïnsa, Jehová Diosampejj sumat uñjatakïskänwa, Jesusajj jupat aytasajja, Diosampejj sumat uñjatakïskatap inas yaqhanakar amtayañ munchïna. Davidajj Diosar confiyaskakïnwa, “Diosajjay, Diosajjay, ¿kunatarak jaytanukustasti?” sasin siskäna ukjjarojja, Jehová Diosaw markaparojj qhespiyaspa sasaw Diosar confiyatap uñachtʼayarakïna, Diosasti jupar bendisiskakïnwa (Sal. 22:23, 24, 27). ‘Davidan Yoqapa’ Jesusajj lawan chʼakkatatas tʼaqeskchïnjja, ukhamarakiw Jehová Diosampejj sumat uñjatäskakïna (Mat. 21:9).

Jehová Diosajja, jupat jan jitheqtatap uñachtʼayañapatakiw Jesusarojj tʼaqesis jiwañat jan jarkʼaqkänti. Jesusajj Awkipamp jan jarkʼaqatäsajj kunjamas jikjjatasïna uk inas saskchïna. Adanampi Evampi juchachasipjjatap laykuw Jesusajj tʼaqesiñapäna, jiwañaparakïna. Ukampis janiw ukajj Jehová Diosan amtapäkänti. Jesusajj janiw kuna juchsa lurkänti, ukampis Supayan kʼarïtap uñachtʼayañataki, jaqenakar juchat kutsuyañataki, kuntï Adanajj aptʼawaykäna uk kutsuyañatakiw ukham tʼaqesïna, jiwarakïna (Mar. 8:31; 1 Ped. 2:21-24). Jehová Diosatï jarkʼaqaspäna ukhajja, janiw ukanakajj phoqaskaspänti. Ukhamajja, Jehová Diosajj ukanak phoqasiñapatakiw mä kutiki jan jarkʼaqkänti.

Maysa toqetjja, kunatsa Jehová Diosajj ukham jiwañat jan jarkʼaqkäna, uk arkirinakapan amuyapjjañapatakiw ukham sarakpachäna. * Jan wali lurir jaqjam lawan chʼakkatata Jesusar jiwir uñjañajja, waljaniruw lanktʼasiyaspäna, uk Jesusajj yatïnwa (1 Cor. 1:23). Ukampis arkirinakapatï kunatsa Jesusajj jiwäna uk sum amuyapjjaspäna ukhajja, janiw jan wali lurir jaqerjam uñjapkaspänti, antisas salviriparjamaw uñjapjjaspäna (Gál. 3:13, 14).

Kunatjjay Jesusajj uka arunak sischïna, uk janiw sum yatktanti, ukampis lawan chʼakkatata jiwasajj Jehová Diosan voluntädapwa Jesusajj phoqaskäna. “Diosajay, Diosajay, ¿kunatsa apanuktʼasista?” siskäna ukat mä jukʼarojja, “phoqasjjewa” sasaw sarakïna (Juan 19:30; Luc. 22:37). Cheqas Jehová Diosajja, Jesusajj kun lurañatakitï aka oraqer jutkäna uk phoqañapatakiw mä kutiki jan jarkʼaqkänti. Ukham luratapatwa “taqe kunanakatï Moisesan Leyipansa, Profetanakan Qellqatanakapansa, Salmonakansa” qellqatäki ukajj Jesusamp phoqasïna (Luc. 24:44).