Tawaqetäjjayäta ukhajj janiw Jehová Diosar nayrjam munasjjayätti. Escuelankir compañeronakajajj libres sarnaqapkaspa ukhamänwa, ukatwa jupanakjam sarnaqañ munjjayäta. Awk taykajasa, Bibliasa taqe kunatsa jarkʼkitaspa ukhamwa amuyasiyäta, Diosar serviñas wali chʼamäkaspas ukhamwa amuyjjarakiyäta. Diosan utjatapat janis pächaskchiyätjja, Jupar servisajj janiw kusisitäjjayätti.

Awisajj predikir mistuskayätwa, ukampis sumat uñjatäñ laykukiw mistuyäta. Niyakejjay predicañatak jan wakichtʼasisaki sarchiyätjja, jaqenakamp parlañ qalltañasa, jupanakamp parltʼaskakiñas wali chʼamänwa. Ukhamïpansti, janiw revisitanakasa ni estudionakas utjkitänti, predicasas janiw kusisitäjjayätti. Ukatjja, jukʼampiw predicañ jan munjjayätti. Akham sasaw jisktʼasiyäta: “¿Kunjamarak maynejj sapa semana, sapa phajjsi predicasa aguantisti?” sasa.

17 maranëjjayäta ukhajj sapak jakañwa wal munjjayäta. Ukatwa Australia markar jakir sarjjta. Awk taykajajj wali llakitaw quedasipjjäna, ukampis uka markan Diosar serviskakiniwa sasaw confiyapjjäna.

 Australia markan jukʼampikiw Diosat jitheqtjjayäta. Walja kutiw tantachäwinakat faltasjjayäta, tantachäwinakat nayjam faltasir wayn tawaqonakampiw chikachasjjayäta. Jupanakajja, arumajj tantachäwinakaruw sarapjjeri, qhepürusti umiri, thoqoriw sarapjjeri. Uka tiemponjja, Diosar serviskchiyätsa, akapachankir jaqenakjamaw sarnaqarakiyäta, ukampis janiw ni mayansa sum jikjjataskayätti.

Pä mara qhepatjja, mä kullakaruw uñtʼta, jupaw jan yatkasina kunsa jakäwijampi luraskayäta uk sum amuytʼasiñajatak yanaptʼawayitu. Phesqa soltera kullakanakampiw jakayäta. Congregacionanak tumptʼiri jilatajj Tamara sat esposapampi visittʼapkitäna ukhajja, nanakampi mä semana alojasiñapatakiw invittʼapjjta. Jilatajj congregacionan kuna lurañanakatï utjki uk luraskäna ukhajja, esposapajj nanakampiw qheparäna, jupampejj wal lartʼasipjjayäta, ukaw gustitäna. Diosarojj jan tiemponis sirvkchïnjja, kullakajj nanakamp kusistʼañatakejj tiempo apstʼasïnwa, janiw ukhamätap pienskayätti.

Tamara kullakajj Diosar servisajj wali kusisitänwa. Uk uñjañajj jupjamäñatakiw chʼamañchtʼitäna. Diosar taqe chuyma servisajj wali kusisitänwa, nayasti Diosar jukʼak servisajj janiw kusisitäkayätti. Kusisit chuymanïtapajj chuymajarupuniw purtʼawayitu. Jehová Diosarojj ‘kusisit chuymampi’, ‘kusisiñat arnaqasiñampiw’ serviñasa, ukwa kullakan suma sarnaqatapajj yatichawayitu (Sal. 100:2).

Tamara kullakjam kusisitäñwa munayäta, ukatakejj cambiañajänwa. Uk lurañajj chʼamakïnwa, ukampis qhepat jukʼat jukʼat cambiawaytwa. Predikir sarañatakejj wakichtʼasjjayätwa, precursor auxiliarats awisajj servirakiyätwa. Ukaw jan sint ajjsarañataki, jan pächasis predicañatak yanaptʼitäna. Bibliampipuni yatiyasajj kusisitäyätwa. Qhepatjja, precursora auxiliarat sapa phajjsi serviñwa amtta.

Kunayman edadani, Diosampis sum apasipki, Jupar servisas wali kusisitäpki uka kasta amigonak ajlliñwa qalltta. Jupanakan suma sarnaqatapajja, kunsa jakäwijan nayrar uchañäja uk  amuytʼasiñataki, Biblia sapüru liyiñatakiw yanaptʼitäna. Predicasajj sapürutjamaw jukʼamp kusisitäjjayäta, qhepatsti precursora regularat serviñwa qalltta. Ukhakamajj walja maranakas pasawayjjchejja, jichhajj kusisitäjjayätwa, congregacionansa wali kusisitarakïyätwa.

Mä mara pasatat Alex jilataruw uñtʼawayta, jupajj suma jaqënwa, Jehová Diosar wal munasïna, predicañas gustarakïnwa. Jupajj congregacionan yanapiripänwa, sojjta maraw precursorat serviskarakïna. Malaui markan yatiyirinakajj munaskäna ukanwa mä qhawqha phajjsinakajj predicarakitayna. Ukanjja, yateqaskay misioneronakampiw predicäna, jupanakaw Diosan Reinop nayrar uchañatak yanaptʼapjjäna.

Alex jilatampejj 2003 maranwa casarasipjjta, ukat panijaw precursorat servisipkakiyäta. Wali wakiskirinakwa yateqapjjta, Jehová Diosajj kunaymanitwa bendicipjjarakitu.

2009 maranjja, Timor Oriental markan misionerot servipjjañajatakiw invittʼapjjetu, uka jiskʼa markajj Indonesia marka jakʼankiwa. Janiw uk suyapkayätti, ukampis kusisitäpkchiyätsa mä jukʼa ajjsarayasipjjarakiyätwa. Phesqa phajjsinak pasatat Dili sat markaruw puripjjayäta.

Uka markanjja, costumbresa, arusa, manqʼasa, jakäwis mayjänwa, ukar yatinoqtapjjañajänwa. Predicacionanjja, sapa kutiw pisin jakasir jaqenakar jikjjatapjjayäta. Yaqhepajj janiw escuelarus sarapkänti, sarapjjchïna ukhas jukʼakwa yatipjjäna, wali tʼaqesiyataw jakasipjjäna. Waljanirakiw guerra utjipana, jan walinak utjipan jañchipan usuchjata, traumata jakasipjjäna. *

Ukan predicañajj wali sumänwa. Mä kutejj 13 marani, María sat imillitaruw jikjjatapjjta, jupajj wali llakitänwa. * Mamitapan jiwatapat mä qhawqha  maranakakiw pasaskatayna, awkipas janiw jupat amtaskänti. Jupa mita wawanakjamarakiw jakäwipan kunsa lurani uk jan yatkänti. Mä urojja, kunjamas jikjjatasïna uk jachtʼasisaw cuenttʼitäna. Ukampis arup jan sum yatitäjatjja, kuntï siskitäna uk janiw amuykayätti. Ukhamïpansti jupar chʼamañchtʼañatakejj Jehová Diosaruw oracionan yanaptʼa mayisiyäta. Ukatjja, chuymachtʼañatakejj Bibliatwa mä qhawqha textonak liytʼarapiyäta. Mä qhawqha maranakatjja, kunjamsa Bibliajj Mariar yanaptʼäna ukwa uñjayäta, jupajj sumwa isthaptʼasjjäna, kusisitaw jakasjjarakïna. Ukatsti bautisasjjarakïnwa, jichhajj jupa pachpaw mayninakar Bibliat yatichaskaraki. Diosan markapan mä jachʼa familia jikjjatawayi, wali munatarakiwa.

Jehová Diosan bendicionapampejja, Timor Oriental markan walja jaqenakaw Diosar uñtʼasipki. Aka qhepa tunka maranakanwa jilaparte publicadoranakajj bautisasipjje. Jupanakat waljaniw precursorata, congregacionan yanapiripata, jan ukajj jilïr irpirita servisipki. Yaqhepajj kuna arunakatï uka markan parlaski, uka arunakar Bibliat apstʼat qellqatanakajj traduciski uka oficinanwa servisipki. Tantachäwinakan jupanakar cantir istʼañasa, kunja kusisitäpjjesa uk uñjañasa, Diosar serviñan kunjamsa nayrar sartawayapjje uk uñjañas wal kusisiyitäna.

Timor Oriental markan jakañajja, Australia markan jakañat sipans jukʼamp mayjänwa. Ukampis wali kusisitaw ukan jakasta. Awisajja, mä autotwa wali phoqa sarapjjerïta. Jaqenakajj chawllanaka, verduranakwa mercadot apanipjjerïna. Yaqhep urunakajja, jiskʼa utanakanwa Bibliat yatichapjjerïta, ukanjja wali caloränwa, pisopas laqʼakïnwa, wallpanakas uks aksa chhuknaqapjjarakïna. Ukhamäkchïnsa, uka markan serviñajj wali kusiskañänwa.

Nayra tiempot amtasajja, Jehová Diosat nayar yatichañatak chʼamachasipjjatapat wal awk taykajar yuspärta. Tawaqetäkasin Diosar jan sum sirvjjayäta ukhas jupanakajj yanaptʼapjjetänwa. Proverbios 22:6 textojj jakäwijan phoqasiwa. Papitujampi mamitajampejja, esposojampi chika Diosar servipjjatajat wali kusisitäpjjewa. 2016 marat aksarojj Australasia markankir sucursalan territoriopanwa congregación tumptʼirit esposojamp servisipkta.

Nayrajja, predicañajj janiw gustkitänti, jichhajj wal gustjjetu. Jan walinakansa uñjaskchiñänejja, Jehová Diosar taqe chuyma serviñaw cheqpach kusisiñ churistu, ukwa yateqawayta. Aka qhepa 18 maranakan Alex esposojampi Jehová Diosar servisajj wali kusisitätwa. Kuntï David reyejj Diosar siskäna uk jichhaw sum amuyta, jupajj akham sänwa: “Jumamp arjjatayasiñ thaqerinakajj kusisipjjpanaya, [...] kusisiñat wiñayapun qʼochupjjpan. Jumar munasirinakajj jumïpan kusisipjje” sasa (Sal. 5:11).