ДӘРС 7
Аллаһын Падшаһлығы
1. Аллаһын Падшаһлығы нәдир?
Нәјә ҝөрә демәк олар ки, ән идеал падшаһ Иса Мәсиһдир? (МАРК 1:40—42).
Аллаһын Падшаһлығы сәмави һөкумәтдир. О, бүтүн һөкумәтләри әвәз едәҹәк, Аллаһын нијјәтини ҝөјдә вә јердә һәјата кечирәҹәк. Аллаһын Падшаһлығы бәшәријјәтин әсрләр боју арзуладығы ҝөзәл һөкумәтдир. Бу Падшаһлыг дүнјада бүтүн инсанлары бирләшдирәҹәк. Дәнјал 2:44; Мәтта 6:9, 10; 24:14 ајәләрини охујун.
Адәтән, падшаһлығын башында падшаһ дурур. Аллаһын Падшаһлығыны да идарә едән падшаһ вар. Бу падшаһ Аллаһын тәјин етдији Иса Мәсиһдир. Вәһј 11:15 ајәсини охујун.
2. Нәјә ҝөрә Иса Мәсиһ ән јахшы падшаһдыр?
Иса Мәсиһ идеал падшаһдыр, чүнки о, хејирхаһдыр вә һагг тәрәфдарыдыр (Јәһја 1:14). О, дүнјаны ҝөјдән идарә едәҹәк вә бәшәријјәти фираванлыға говушдураҹаг. Иса Мәсиһ өлүб дириләндән сонра ҝөјә галхды вә Јеһова Аллаһын сағында әјләшиб падшаһ сәлаһијјәтини аланадәк ҝөзләди (Ибраниләрә 10:12, 13). Вахт јетишәндә Аллаһ ону тахта чыхартды. Дәнјал 7:13, 14 ајәләрини охујун.
3. Падшаһлыгда даһа кимләр вар?
Мүгәддәс Китаб ҝөстәрир ки, Иса Мәсиһлә бәрабәр Падшаһлыгда Аллаһын сечдији мүгәддәс инсанлар һакимијјәт сүрәҹәк (Дәнјал 7:27). Бу група илк олараг Иса Мәсиһин садиг һәвариләри сечилибләр. Јеһова Аллаһ индијәдәк мөмин киши вә гадынлары сечиб мүгәддәсләрин сырасына дахил едир. Иса Мәсиһ кими, онлар да өләндә руһани варлыг олараг дирилиб ҝөјә галхырлар. Јәһја 14:1—3; 1 Коринфлиләрә 15:42—44 ајәләрини охујун.
Бәс сәмави Падшаһлыға нечә нәфәр чағырылыр? Иса пејғәмбәрин сөзләриндән мәлум олур ки, онларын сајы мәһдуддур (Лука 12:32). Бу адамларын сајы ҹәми 144 000 нәфәр олаҹаг. Онлар Иса Мәсиһлә бирҝә Јери идарә едәҹәкләр. Вәһј 14:1 ајәсини охујун.
4. Иса Мәсиһин тахта чыхмасы һансы һадисәләрлә мүшајиәт олунду?
Аллаһын Падшаһлығы 1914-ҹү илдә фәалијјәтә башлады. Иса Мәсиһ тахта чыхан кими, илк нөвбәдә, Шејтаны вә онун ҹинләрини ҝөјдән јерә атды. Шејтан бундан бәрк гәзәбләнди вә бүтүн дүнјаны зүлмә гәрг етди (Вәһј 12:7—10, 12). О вахтдан бәри бәшәријјәтин дәрд-бәласы ҝүнү-ҝүндән артыр. Мүһарибәләр, гытлыглар, епидемијалар, зәлзәләләр баш алыб ҝедир. Бүтүн бунлар она ишарә едир ки, тезликлә Аллаһын Падшаһлығы дүнјанын ишләрини бүтөвлүклә әлинә алаҹаг. Лука 21:7, 10, 11, 31 ајәләрини охујун.
5. Аллаһын Падшаһлығы нәләрә наил олуб?
Аллаһын Падшаһлығы үмумдүнја тәблиғ иши сајәсиндә бүтүн милләтләрдән чохлу сајда инсаны гардашлыг телләри илә бирләшдириб. Милјонларла һәлим үрәкли инсан падшаһ Исанын тәбәәләри сырасына гошулур. Аллаһын Падшаһлығы бу дүнја дүзәнини мәһв едәндә һәмин инсанлары горујуб сахлајаҹаг. Ким Аллаһын Падшаһлығынын ҝәтирдији немәтләри дадмаг истәјирсә, Мәсиһ падшаһа итаәт ҝөстәрмәји өјрәнмәлидир. Вәһј 7:9, 14, 16, 17 ајәләрини охујун.
Падшаһлыг мин ил әрзиндә Аллаһын бәшәријјәтлә бағлы әзәли нијјәтини һәјата кечирәҹәк. Јер күрәси Ҹәннәт олаҹаг. Сонда Иса Мәсиһ падшаһлығы Атасына тәһвил верәҹәк (1 Коринфлиләрә 15:24—26). Сиз дә Аллаһын Падшаһлығы барәдә бу ҝөзәл хәбәри дост-танышыныза даныша биләрсиниз. Зәбур 37:10, 11, 29 ајәләрини охујун.
