Кимисә јахындан танымаг истәјәндә онун етдији ишләр, өһдәсиндән ҝәлдији чәтинликләр барәдә өјрәнмәјин көмәји дәјир. Аллаһы да јахшы танымаг үчүн Онун етдији ишләр барәдә өјрәнмәк лазымдыр. Өјрәндикҹә ҝөрәҹәксиниз ки, Аллаһын әввәлләр етдији ишләр бизә инди һансы фајданы ҝәтирир вә ҝәләҹәјимизә неҹә тәсир едир. Шүбһәсиз, бу сизи һејрәтә салаҹаг.

Јеһова Аллаһ Улу Јарадандыр. Онун «ҝөзәҝөрүнмәз кејфијјәтләри... дүнја јаранандан бәри ајдын ҝөрүнүр, јарадылмыш шејләр васитәсилә дәрк едилир» (Ромалылара 1:20). «Одур јери гүдрәтилә хәлг едән, торпағы һикмәтилә јарадан, ҝөјләри зәкасы илә јајан» (Әрәмја 10:12). Јарадылыш мөҹүзәләри һәмчинин Аллаһын бизим гајғымыза галдығына дәлаләт едир.

Ҝәлин ҝөрәк Јеһова инсаны Өз бәнзәриндә јаратмагла һәјатымыза неҹә мәна гатыб (Јарадылыш 1:27). Бу о демәкдир ки, биз Онун мисилсиз кејфијјәтләрини азҹа да олса әкс етдиририк. О бизи руһани тәләбатла, јәни Онун бахышларыны вә дәјәрләрини дәрк етмәк баҹарығы илә хәлг едиб. Биз буна ҹан атанда хошбәхт олуруг вә һәјатымыза мәна гатырыг. Үстәлик, Јеһова бизә Өзү илә мүнасибәт гурмаг габилијјәти дә вериб.

Јер күрәси Аллаһын бизә мүнасибәти барәдә шәһадәт едир. Инҹилдә дејилир ки, Аллаһ «Өзү һаггында даима шәһадәт верирди: сизә јахшылыг едәрәк ҝөјдән јағыш јағдырыр, бәрәкәтли мөвсүмләр вә бол-бол гида верир, үрәјинизи шадлыгла дојдурурду» (Һәвариләрин ишләри 14:17). Аллаһ бизи садәҹә мөвҹуд олмағымыз үчүн лазым олан шејләрлә тәмин етмәклә кифајәтләнмәјиб. Һәјатдан зөвг алмағымыз үчүн бизә бол, зәнҝин немәтләр бәхш едиб. Бүтүн бунлар Онун бизим үчүн нијјәт етдији шејләрин бир зәррәсидир.

 Јеһова јер күрәсини јаратмышды ки, инсанлар орада әбәди јашасын. Мүгәддәс Китабда дејилир ки, Аллаһ јери бәшәр оғулларына вериб вә ону бош јерә дејил, јашајыш үчүн јарадыб (Зәбур 115:16; Әшија 45:18). Бәс јер үзүндә кимләр јашајаҹаг, онлар нә гәдәр өмүр сүрәҹәк? «Салеһләр јерә саһиб олаҹаг, орада әбәди јашајаҹаглар» (Зәбур 37:29).

Демәли, Јеһова Аллаһ илк киши вә гадыны, Адәмлә Һәвваны јарадыб јер үзүндәки ҹәннәт бағында мәскунлашдырды ки, бағы беҹәрсинләр вә она гуллуг етсинләр (Јарадылыш 2:8, 15). Аллаһ онлара ики мараглы тапшырыг верди: «Төрәјиб чохалын, бүтүн јер үзүнү долдурун вә она саһиб олун» (Јарадылыш 1:28). Беләликлә, Адәмлә Һәвва јер үзүндә әбәди өмүр сүрә биләрди. Тәәссүфләр олсун ки, онлар Аллаһын итаәтиндән чыхдылар. Елә буна ҝөрә дә јерә саһиб олаҹаг салеһ инсанларын арасында олмајаҹаглар. Лакин ҝөрәҹәјимиз кими, онларын һәрәкәти Јеһованын нә бизә, нә дә јерә даир нијјәтини дәјишмәјиб. Илк өнҹә, ҝәлин Аллаһын Өз бәндәләринин рифаһы үчүн етдији башга бир ишдән данышаг.

Төврат, Зәбур вә Инҹил һәм дә Аллаһын Кәламы адланыр. Нәјә ҝөрә Јеһова Аллаһ бу китабы бизим үчүн јаздырыб? Әсас етибарилә, Онун һаггында өјрәнмәк үчүн (Мәсәлләр 2:1—5). Дүздүр, Мүгәддәс Китабда Аллаһла бағлы биздә јаранан һәр суала ҹаваб јохдур. Үмумијјәтлә, елә бир китаб јер үзүндә јохдур (Ваиз 3:11). Бунунла белә, Мүгәддәс Китабда јазыланлар бизә Аллаһы танымаға көмәк едир. Аллаһын инсанларла рәфтарындан Онун неҹә Аллаһ олдуғуну өјрәнирик. Онун неҹә инсанлардан разы галдығыны, неҹә инсанлардан разы галмадығыны баша дүшүрүк (Зәбур 15:1—5). Онун ибадәтә, әхлага вә мадди шејләрә даир бахышлары һагда мәлумата јијәләнирик. Бундан әлавә, Мүгәддәс Китаб Иса Мәсиһин тәлимләри вә ҝөрдүјү ишләр васитәсилә Јеһованын неҹә Аллаһ олдуғуну бизә ајдын шәкилдә ҝөстәрир (Јәһја 14:9).

Јеһованын бизә Кәламыны бәхш етмәсинин диҝәр бир сәбәби одур ки, бу китабын васитәсилә биз хошбәхт вә мәналы һәјат јолуну тапаг. Јеһова бу китабын көмәјилә бизә хошбәхт аиләјә саһиб олмағы, әлимиздә олан шејләрә гане олмағы вә нараһатчылыгларын өһдәсиндән ҝәлмәји өјрәдир. Һәмчинин бу журналда изаһ едилдији кими, Мүгәддәс Китабда һәјати ваҹиб суаллара ҹаваб верилир. Мәсәлән, нәјә ҝөрә бу гәдәр әзаб-әзијјәт вар? Ҝәләҹәкдә бизи нә ҝөзләјир? Китабда һәм дә изаһ олунур ки, Аллаһ әзәли нијјәтинин јеринә јетмәси үчүн нә едиб.

Мүгәддәс Китабы әсрарәнҝиз, илаһи китаб едән өзәлликләри чохдур. Бу китаб 1600 илдән чох вахт әрзиндә тәхминән 40 нәфәр киши тәрәфиндән јазылыб. Буна бахмајараг, бүтүн китаб бојунҹа бир әсас мөвзу ишыгландырылыр, чүнки бу китабын әсл мүәллифи Аллаһдыр (2 Тимутијә 3:16). Башга гәдим јазылардан фәргли олараг, китаб әсрләр бојунҹа горунуб сахланылыб. Буну Мүгәддәс Китабын минләрлә гәдим әлјазмасы тәсдиг едир. Бундан башга, тарих бојунҹа Мүгәддәс Китабын тәрҹүмә едилмәсинә, јајылмасына вә охунмасына әнҝәлләр төрәдилсә дә, буна наил олунмајыб. Мүасир дөврдә исә Мүгәддәс Китаб ән чох јајылан вә тәрҹүмә олунан китабдыр. Мүгәддәс Китабын мөвҹудлуғу Аллаһын сөзүнүн әбәди галдығына ҹанлы сүбутдур (Әшија 40:8).

Аллаһын ҝөрдүјү ишләрдән бири дә одур ки, О бизимлә бағлы нијјәтинин јеринә јетәҹәјинә зәманәт верән хүсуси бир тәдбир ҝөрүб. Јухарыда гејд етдијимиз кими, Аллаһ инсанларын јер үзүндә әбәди јашамасыны нијјәт етмишди. Лакин Адәм Аллаһа итаәтсизлик јолуну сечди, бунунла да ҝүнаһа батды. Беләликлә, о, тәкҹә өзүнү јох, бүтүн ҝәләҹәк өвладларыны әбәди һәјатдан мәһрум етди. «Ҝүнаһ бир адам васитәсилә, өлүм дә ҝүнаһ васитәсилә дүнјаја ҝирди. Беләҹә, өлүм бүтүн адамлара кечди, чүнки һамы ҝүнаһ ишләјиб» (Ромалылара 5:12). Илк бахышдан елә ҝөрүндү ки, инсанын итаәтсизлији уҹбатындан Аллаһын нијјәти һәјата кечмәјәҹәк. Бәс Јеһова Аллаһ нә етди?

Јеһова бу вәзијјәтдә Өз кејфијјәтләринә ујғун давранды. О, әдаләтлә давранараг Адәмлә Һәвваны өз һәрәкәтләринә ҝөрә мәсулијјәтә ҹәлб етди, лакин  мәһәббәтдән ирәли ҝәләрәк онларын ҝәләҹәк нәсилләри үчүн бир тәдбир төкдү. Јеһова һикмәтлә бу мәсәләнин һәлли јолуну мүәјјән етди вә дәрһал буну бәјан етди (Јарадылыш 3:15). Ҝүнаһ вә өлүмүн пәнҹәсиндән гуртулуш Иса Мәсиһин васитәсилә мүмкүн олаҹагды. Неҹә?

Инсанлары Адәмин үсјанынын аҹы нәтиҹәләриндән гуртармаг үчүн Јеһова Иса пејғәмбәри јер үзүнә ҝөндәрди. О, инсанлара һәјата апаран јолу өјрәтмәли вә бир чохлары уғрунда һәјатыны фидјә кими вермәли иди a (Мәтта 20:28; Јәһја 14:6). Иса Адәм кими камил инсан олдуғундан фидјәни өдәјә билди. Адәмдән фәргли олараг, Иса пејғәмбәр гәти сурәтдә Аллаһын итаәтиндән чыхмады, бахмајараг ки, бу она ҹаны баһасына баша ҝәлди. Амма Иса өлүмә лајиг олмадығындан Јеһова ону ҝөјдә јашамаг үчүн дирилтди. Иса Мәсиһ Адәмин едә билмәдији бир шеји едә билди: итаәткар инсанлара әбәди һәјат үмиди верди. «Бир нәфәрин итаәтсизлији чохлу инсаны ҝүнаһлы етдији кими, бир шәхсин итаәти дә чохлу инсаны салеһ едәҹәк» (Ромалылара 5:19). Исанын фидјә гурбанлығы васитәсилә Аллаһ вәдини ҝерчәкләшдириб инсанлара јер үзүндә әбәди һәјат верәҹәк.

Адәмин итаәтсизлијинин ҝәтирдији аҹы нәтиҹәләри неҹә арадан галдырмасындан Јеһова һагда чох шеј өјрәнирик. Ҝөрүрүк ки, Јеһованын башладығы иши тамамламаға һеч нә әнҝәл ола билмәз. Онун сөзү «мәгсәдинә мүтләг наил олаҹаг» (Әшија 55:11). Һәмчинин Јеһованын бизә олан севҝисинин нә гәдәр бөјүк олдуғуну баша дүшүрүк. «Аллаһ мәһәббәти бизә бу ҹүр изһар олду: Аллаһ илкин Оғлуну дүнјаја ҝөндәрди ки, онун васитәсилә һәјата говушаг. Мәһәббәт ондадыр ки, биз Аллаһы јох, О, бизи севди вә Оғлуну ҝүнаһларымызы өртән кәффарә гурбаны кими дүнјаја ҝөндәрди» (1 Јәһја 4:9, 10).

Аллаһ Оғлуну әсирҝәмәјиб һамымызын уғрунда фәда етди. Буна ҝөрә дә биз әминик ки, Аллаһ вәд етдији галан шејләри дә бизә бәхш едәҹәк (Ромалылара 8:32). Бәс Аллаһ бизә нә вәд едиб? Бунун үчүн нөвбәти мәгаләни охујун.