Әслиндә, дүнја фәлакәтин бир аддымлығындадыр. Иса Мәсиһ бу фәлакәти «бөјүк мүсибәт» адландырмышды (Мәтта 24:21). Бу фәлакәт һеч биримиздән јан кечмәјәҹәк. Амма биз тәһлүкәдән горунмаг үчүн мүәјјән аддымлар ата биләрик. Ҝәлин ҝөрәк һансы аддымлары.

Иса Мәсиһ вәз едәркән белә бир ҝөстәриш вермишди: «Падшаһлығы вә Аллаһын тәләб етдији салеһлији һәр шејдән үстүн тутун» (Мәтта 6:33). Буну неҹә едә биләрик?

Аллаһын Падшаһлығыны һәр шејдән үстүн тутун. Бу о демәкдир ки, Аллаһын Падшаһлығы бизим үчүн һәр шејдән ваҹиб олмалыдыр (Мәтта 6:25, 32, 33). Нәјә ҝөрә? Чүнки инсанлар бәшәријјәтин проблемләрини һәлл етмәјә гадир дејилләр. Јалныз Аллаһын Падшаһлығы бу мүрәккәб мәсәләнин өһдәсиндән ҝәлә биләр.

Аллаһын тәләб етдији салеһлији һәр шејдән үстүн тутун. Биз Аллаһын адил гајда-ганунлары илә јашамаг үчүн вар ҝүҹүмүзлә чалышмалыјыг. Чүнки биз нәјин дүзҝүн, нәјин сәһв олдуғуна өзүмүз гәрар верәндә нәтиҹә аҹынаҹаглы олур (Мәсәлләр 16:25). Анҹаг Аллаһын гајда-ганунлары илә јашајанда һәм Аллаһа хош ҝедир, һәм дә өзүмүз хејир тапырыг (Әшија 48:17, 18).

Аллаһын Падшаһлығыны вә Аллаһын тәләб етдији салеһлији һәр заман һәр шејдән үстүн тутмаг лазымдыр. Иса Мәсиһ хәбәрдарлыг етмишди ки, бәзи инсанларын диггәти јајынаҹаг, онлар дүшүнәҹәкләр ки, пуллары нә гәдәр чох олса, ҝәләҹәкләри дә бир о гәдәр јахшы олар. Бир башгалары исә  өзләрини һәјатын гајғылары илә о гәдәр јүкләјирләр ки, Аллаһын Падшаһлығыны һәр шејдән үстүн тутмаға вахтлары галмыр (Мәтта 6:19—21, 25—32).

Лакин Иса Мәсиһ вәд етмишди ки, Аллаһын Падшаһлығыны дәстәкләјәнләрин һәм инди еһтијаҹлары өдәниләҹәк, һәм дә ҝәләҹәкдә сонсуз немәтләр алаҹаглар (Мәтта 6:33).

Биринҹи әсрдә Иса Мәсиһин шаҝирдләри Аллаһын Падшаһлығыны вә Аллаһын тәләб етдији салеһлији һәр шејдән үстүн тутсалар да, ағры-аҹыја, әзаб-әзијјәтә сон гојулдуғу дөврү ҝөрмәдиләр. Амма онлар сығынаҹаг тапдылар. Неҹә?

Онлар Аллаһын ганунлары илә јашајырдылар, бу исә онлары Аллаһын дедикләринә мәһәл гојмајан инсанларын үзләшдији чәтинликләрдән горујурду. Падшаһлыға олан мөһкәм иман онлара һәјатын ән тәлатүмлү анларыны да дөзүмлә гаршыламаға көмәк едирди. Бундан башга, Аллаһ онлара чәтинликләрә таб ҝәтирмәк үчүн инсан ҝүҹүндән үстүн олан ҝүҹ верирди (2 Коринфлиләрә 4:7—9).

Биринҹи әсрдә јашајан мәсиһиләр Иса Мәсиһин Падшаһлығы һәр шејдән үстүн тутмаг әмринә табе олурдулар. Онлар Аллаһын Падшаһлығы һаггында олан мүждәни һәр јердә тәблиғ едирдиләр (Колослулара 1:23). Бәс бу ҝүн буну кимсә едир?

Бәли! Јеһованын Шаһидләри баша дүшүрләр ки, Аллаһын Падшаһлығынын бу шәр дүнјаја сон гојаҹағы вахта чох аз галыб. Буна ҝөрә дә вар ҝүҹләри илә чалышараг Иса Мәсиһин әмрини иҹра едирләр: «Падшаһлыг һаггындакы бу мүждә халгларын һамысына шәһадәт олсун дејә, бүтүн јер үзүндә тәблиғ едиләҹәк вә сон о вахт ҝәләҹәк» (Мәтта 24:14).

Бәс сиз мүждәјә неҹә һај верәҹәксиниз? Биринҹи әсрдә Македонијанын Верија шәһәринин сакинләри бу саһәдә чох ҝөзәл өрнәк гојмушдулар. Онлар һәвари Булусдан Падшаһлыг һаггында мүждәни ешидәндә хәбәри «бөјүк һәвәслә» гәбул етдиләр. Сонра исә ешитдикләринин доғру олуб-олмадығыны јохламаг үчүн Мүгәддәс Јазылары диггәтлә арашдырдылар вә өјрәндикләринә ујғун даврандылар (Һәвариләрин ишләри 17:11, 12).

Сиз дә бу ҹүр даврана биләрсиниз. Аллаһын Падшаһлығыны вә Аллаһын тәләб етдији салеһлији һәр шејдән үстүн тутсаныз, инди тәһлүкәсиз сығынаҹаг тапаҹагсыныз, ҝәләҹәкдә исә әбәдијјән сүлһ вә әмин-аманлыг ичиндә јашајаҹагсыныз.