МУСИГИ гәдим Исраил мәдәнијјәтинин ајрылмаз бир һиссәси иди. Мүгәддәс Китабда инсанларын һәм мусиги аләтләриндә ифа етдији, һәм дә нәғмә охудуғу илә бағлы чохлу нүмунәләр вар. Әслиндә, Мүгәддәс Јазыларын онда бир һиссәси нәғмәләрдән ибарәтдир. Буна «Зәбур», «Нәғмәләр нәғмәси» вә «Мәрсијәләр»и мисал чәкмәк олар. Бир мәнбәјә әсасән, «Мүгәддәс Китабда мусигинин мусиги илә әлагәси олмајан фәалијјәтләрдә белә ваҹиб рол ојнадығы бир ҹәмијјәтин парлаг мәнзәрәси тәсвир олунуб» («Music in Biblical Life»).

Ҝүндәлик һәјатда мусиги. Исраиллиләр бәзән өз һиссләрини мусиги илә ифадә едирдиләр (Әшј. 30:29). Јени падшаһ тахта чыханда, бајрамларда вә орду дөјүшдән гәләбә илә гајыданда гадынлар әлләриндә гавал, севинҹлә маһны охујуб рәгс едирдиләр (Һак. 11:34; 1 Ишм. 18:6, 7; 1 Пад. 1:39, 40). Һәмчинин исраиллиләр јас заманы чох тәсирли мәрсијәләр охујурдулар (2 Салн. 35:25). Сөз јох ки, «ибраниләр чох мусигисевәр халг иди», дејә Мак-Клинток вә Стронгсун енсиклопедијасында гејд олунур.

Падшаһ сарајында мусиги. Исраил падшаһлары мусиги динләмәји чох севирди. Талут падшаһ Давуду мусигичи кими хидмәт етмәси үчүн өз сарајына ҝәтиздирмишди (1 Ишм. 16:18, 23). Давуд өзү падшаһ оланда мусиги аләтләри иҹад етмишди, ҝөзәл нәғмәләр бәстәләмишди вә оркестр јаратмышды; бу оркестр сонралар Јеһованын мәбәдиндә ифа етмишди (2 Салн. 7:6; Амс. 6:5). Сүлејман падшаһын сарајында һәм киши, һәм гадын ханәндәләр вар иди (Ваиз 2:8).

Ибадәтдә мусиги. Ән әсасы исә исраиллиләр ибадәт заманы мусиги ифа едирдиләр. Јерусәлимдәки мәбәддә 4000 нәфәр мусиги аләтләриндә ифа едирди (1 Салн. 23:5). Онлар синҹ, телли аләтләр, ҹәнҝ вә кәрәнај чалырдылар (2 Салн. 5:12). Амма Јеһоваја ибадәт заманы нәғмә охујанлар вә аләтләрдә чаланлар тәкҹә пешәкар мусигичиләр дејилди, исраиллиләрин әксәријјәти иллик бајрамлары гејд етмәк үчүн Јерусәлимә ҝедәндә јол боју нәғмә охујурду. Бунлар шәһәрә галхаркән охунан нәғмәләр кими танынырды (Зәб. 120—134). Јәһуди әлјазмаларына әсасән исраиллиләр Пасха јемәји заманы һәмд нәғмәләри a охујурдулар.

Мусиги бу ҝүн дә Јеһованын халгынын һәјатында ваҹиб рол ојнајыр (Јаг. 5:13). Нәғмә охумаг ибадәтимизин бир һиссәсидир (Ефес. 5:19). Мусиги диндашларымызла арамызда мөһкәм бағ јарадыр (Кол. 3:16). Мусиги чәтинликләр заманы бизә ҝүҹ верир (Һәв. 16:25). Мусиги Јеһоваја иманымызы, Она олан севҝимизи ифадә етмәјин ҝөзәл јолларындан биридир.