1, 2. Јеһова Аллаһ бәндәләринә неҹә сәхавәт ҝөстәрир?

ЈЕҺОВА чох сәхавәтли Аллаһдыр. Нәјимиз варса, һамысыны О, бизә вериб. Јерин бүтүн сәрвәтләри, гызылы да, ҝүмүшү дә, бир сөзлә, һәр шеј Она мәхсусдур. Мәһз Аллаһын јаратдығы тәбии сәрвәтләрин сајәсиндә јер үзүндә һәјат вар (Зәб. 104:13—15; Һәг. 2:8). Јеһова дәфәләрлә јерин сәрвәтләриндән истифадә едәрәк Өз хидмәтчиләринә мөҹүзәви шәкилдә рузи вермишдир. Буну тәсдиг едән һадисәләри Мүгәддәс Китабдан охумаг олар.

² Ҝәлин бу һадисәләрдән бир нечәсинә бахаг. Мисал үчүн, Јеһова Аллаһ Исраил халгына 40 ил сәһрада су вә манна јетирәрәк онларын гида еһтијаҹыны тәмин етмишди (Чых. 16:35). Беләҹә, бу илләр әрзиндә халг «һеч нәдән корлуг чәкмә»мишди (Нәһ. 9:20, 21). Јеһова һәмчинин евиндә бир күп јағдан башга һеч нәји олмајан бир касыб дул гадына рузи вермишди. Аллаһ Әлјәсә пејғәмбәрин әли илә күпдәки јағы мөҹүзәви шәкилдә чохалтмышды. Гадын јағы сатыб борҹларыны өдәмиш, һәтта алдығы пулдан өзүнүн вә оғулларынын доланышығы үчүн дә галмышды (2 Пад. 4:1—7). Иса Мәсиһ дә Јеһованын ҝүҹү илә мөҹүзә ҝөстәриб инсанлары јемәклә тәмин етмиш, һәтта бир дәфә  давамчыларындан биринә мөҹүзәви јолла пул јетирмишди (Мәт. 15:35—38; 17:27).

3. Бу мәгаләдә һансы суаллары мүзакирә едәҹәјик?

³ Бахмајараг ки, јерин бүтүн сәрвәтләри Јеһоваја мәхсусдур вә Онун әлиндәдир, О, хидмәтчиләрини мадди рузиләри илә тәшкилатыны дәстәкләмәјә сәсләјир (Чых. 36:3—7; Мәсәлләр 3:9 ајәсини охујун). Нәјә ҝөрә Јеһова истәјир ки, бизә вердији мадди рузиләрдән Онун јолунда хәрҹләјәк? Гәдимдә мөмин инсанлар Аллаһын нүмајәндәләринин ҝөрдүјү иши мадди ҹәһәтдән неҹә дәстәкләјирдиләр? Бу ҝүн тәшкилатымыз ианә едилән вәсаитләри неҹә истифадә едир? Мәгаләдә бу суаллара ҹаваб тапаҹағыг.

4. Биз Јеһованын ишини дәстәкләјәндә нәји дәрк етдијимизи ҝөстәририк?

⁴ Јеһованын јолунда рузимиздән сәрф етмәјә бизи сөвг едән Она олан севҝимиз, мәһәббәтимиздир. Онун бизим үчүн етдији јахшылыгларын һәдди-һүдуду јохдур. Аллаһын мәбәдинин тикилмәси үчүн тәдарүк ҝөрмүш Давуд падшаһ дуасында билдирмишди ки, нәјимиз варса, һамысы Јеһованын вердијидир вә Онун јолунда нәји исә сәрф едәндә, әслиндә, Онун вердијини Өзүнә гајтармыш олуруг. (1 Салнамәләр 29:11—14 ајәләрини охујун.)

5. Мүгәддәс Китаб мадди имканларымыздан Аллаһ үчүн хәрҹләмәјин ваҹиб ибадәтләрдән олдуғуну неҹә ҝөстәрир?

⁵ Мадди имканларымыздан Аллаһ үчүн хәрҹләмәк ваҹиб ибадәтдир. Чүнки беләҹә, биз Јараданымызы шәрәфләндирмиш олуруг. Сөзсүз ки, Каинатын Саһиби әлимиздәкинин ән јахшысына лајигдир. Һәвари Јәһја вәһј аларкән ҝөјдә руһани мәхлугларын Аллаһа мәдһ охудугларыны ешитмишди. Онлар дејирди: «Аллаһымыз Јеһова, Сән шана, шәрәфә, гүдрәтә лајигсән! Чүнки һәр шејин јараданы Сәнсән вә һәр шеј Сәнин ирадәнлә мөвҹуд олду вә јарадылды» (Вәһј 4:11). Төвратда Исраил халгына бујурулмушду ки, илдә үч дәфә бајрам вахты Јерусәлимә ибадәтә ҝәлсинләр. Лакин «һеч ким әлибош ҝәлмәмәли» иди (Ган. 16:16). Бу ҝүн дә Аллаһын тәшкилатынын гәдрини билиб ону сәхавәтлә дәстәкләмәк тәмәл ибадәтләримиздән сајылыр.

6. Вермәк бизә һансы фајданы ҝәтирир? (Мәгаләнин әввәлиндәки шәклә бахын.)

⁶ Вермәк бизим өзүмүзә дә фајда ҝәтирир. Чүнки бу биздә ҝөзәл кејфијјәтләр тәрбијә етдирир. (Мәсәлләр 29:21 ајәсини охујун.) Мәсәлән, ҝөтүрәк валидејнләринин вердији ҹибхәрҹлији илә онлара һәдијјә алан ушағы. Јахуд да валидејнләри илә јашајыб евин хәрҹләриндә көмәк едән ҝәнҹ өнҹүлү. Ола билсин, валидејнләр ушагларындан буну ҝөзләмир, амма јенә дә бу төһфәләри гәбул едирләр, чүнки ушаг бу јолла валидејнинә онун үчүн чәкдији зәһмәтә ҝөрә миннәтдарлығыны билдирмиш олур. Јеһова да билир ки, вермәк бизим хејримизәдир.

7, 8. Пејғәмбәрләрин вахтында Јеһова Аллаһын халгы а) конкрет лајиһәләри, б) үмумијјәтлә ибадәти дәстәкләмәк үчүн нә едирдиләр?

⁷ Мадди рузимиздән ибадәт јолунда хәрҹләмәк әнәнәси Мүгәддәс Јазылара дајаныр. Бәзи һалларда Аллаһын хидмәтчиләри конкрет лајиһәләр үчүн төһфәләр верирдиләр. Мәсәлән, Мүгәддәс чадыр тикиләндә Муса пејғәмбәр бу иш үчүн халгы ианә вермәјә чағырмышды. Давуд пејғәмбәр дә мәбәдин иншасы үчүн ејни шеји етмишди (Чых. 35:5; 1 Салн. 29:5—9). Падшаһ Јуәсин вахтында да мәбәдин тәмири үчүн халгдан вәсаит јығылмышды (2 Пад. 12:4, 5). Биринҹи әсрдә мәсиһиләр хәбәр тутанда ки, Јәһудијјәдәки диндашлары гытлыг уҹбатындан  еһтијаҹ ичиндәдир, имканлары чатан гәдәр јардым јығыб онлара ҝөндәрмишдиләр (Һәв. 11:27—30).

⁸ Аллаһын халгы һәмчинин ибадәтдә апарыҹы рол ојнајан шәхсләри дә мадди ҹәһәтдән дәстәкләјирди. Төврат ганунуна ҝөрә лавилиләр диҝәр гәбиләләр кими торпаг пајы алмамышдылар. Онлар халгын вердији ондабир верҝисинин һесабына јашајырды. Бу, онлара вахтларыны Мүгәддәс чадырда хидмәтә һәср етмәјә имкан јарадырды (Сај. 18:21). Исанын дөврүндә дә мөмин гадынлар пејғәмбәрә вә шаҝирдләринә сәхавәт ҝөстәрир, «нәләри вардыса онларла бөлүшүрдүләр» (Лука 8:1—3).

9. Аллаһын кечмишдә јашајан хидмәтчиләринин етдији ианәләрә нәләр дахил иди?

⁹ Кечмишдә Аллаһын иши үчүн едилән ианәләрә мүхтәлиф шејләр дахил иди. Мәсәлән, Мүгәддәс чадырын иншасы үчүн едилән ианәләрин ичиндә чох ҝүман ки, исраиллиләрин Мисирдән ҝәтирдикләри гәнимәтләр дә вар иди (Чых. 3:21, 22; 35:22—24). Биринҹи әсрдә бәзи мәсиһиләр мүлкләрини сатыб пуллары һәвариләрә верирдиләр. Һәвариләр дә һәмин вәсаитләри еһтијаҹы оланлара пајлајырды (Һәв. 4:34, 35). Диҝәр иманлылар гыраға пул гојараг Аллаһын ишини дәстәкләмәк үчүн мүтәмади ианә верирдиләр (1 Кор. 16:2). Ҝөрүндүјү кими, ианә ишиндә һамынын, варлынын да, касыбын да пајы вар иди (Лука 21:1—4).

10, 11. а) Аллаһын гәдимдә јашамыш сәхавәтли хидмәтчиләриндән неҹә нүмунә ҝөтүрә биләрик? б) Падшаһлығын ишини дәстәкләмәк шәрәфинә малик олдуғунуз үчүн һансы һиссләри кечирирсиниз?

¹⁰ Бу ҝүн дә Аллаһын халгы конкрет лајиһәләри дәстәкләмәјә тәшвиг олунур. Мәсәлән, ола билсин, сизин јығынҹаг үчүн јени ибадәт евинин иншасы, јахуд мөвҹуд ибадәт евинин тәмири планлашдырылыр. Һәмчинин, бәзән әразимиздәки филиал бинасынын тәмири, топлантынын кечирилмәси вә ја тәбии фәлакәтдән зәрәр чәкмиш диндашларымыза јардымла бағлы ианә етмәјә еһтијаҹ јараныр. Бундан башга, биз баш идарәнин вә филиалларын фәалијјәтини дәстәкләмәк үчүн дә ианә едирик. Хүсуси тәјинатлы мүждәчиләрин, хүсуси өнҹүлләрин вә сәјјар хидмәтдә иштирак едән баҹы-гардашларын хидмәти дә ианәләр һесабына һәјата кечирилир. Сөзсүз ки, сизин јығынҹаг да бүтүн дүнјада ибадәт евләринин вә топланты залларынын тикинтиси үчүн ианә етмәклә бағлы гәтнамә гәбул едиб. Билдијиниз кими бу ианәләр бүтүн дүнјадакы баҹы-гардашларын рифаһы үчүн хәрҹләнир.

¹¹ Ахырзаман адланан бу дөврдә Јеһованын һәјата кечирдији иши ианәләримизлә дәстәкләмәјә һәр биримизин ҝүҹү чатар. Адәтән ианәләрин чоху аноним шәкилдә едилир. Мәсәлән, ианәләр ибадәт евләриндәки ианә гутуларына атылыр, ја да jw.org сајты васитәси илә едилир. Бәзән, бизә елә ҝәлә биләр ки, етдијимиз кичик ианәләрин елә дә бөјүк әһәмијјәти јохдур. Амма нәзәрә алын ки, јығылан ианәнин бөјүк гисми бир нечә бөјүк ианәнин јох, мәһз бу кичик ианәләрин пајына дүшүр. Һәтта касыб баҹы-гардашларымыз белә, «јохсул олмаларына бахмајараг», мүгәддәсләрә јардым ишиндә көнүл хошлуғу илә иштирак едән македонијалы мәсиһиләр кими, сәхавәт ҝөстәрирләр (2 Кор. 8:1—4).

12. Тәшкилатымыз ианәләрдән дүзҝүн шәкилдә истифадә етмәк үчүн нә едир?

¹² Рәһбәрлик Шурасы ианә едилән вәсаитләрин хәрҹләнмәсиндә садиг вә ағыллы шәкилдә давранмаға чалышыр (Мәт. 24:45). Шураја дахил олан гардашлар дуа едәрәк Јеһовадан бу вәсаитләрдән дүзҝүн шәкилдә истифадә етмәк үчүн көмәк истәјир, ианәләрин һара вә неҹә хәрҹләнәҹәјини јахшы-јахшы ҝөтүр-гој едирләр (Лука 14:28). Гәдимдә ианәләрә бахан  инсанлар нәзарәт едирдиләр ки, бу вәсаитләр сырф Јеһованын ишинә хәрҹләнсин. Мәсәлән, Үзејир пејғәмбәр Јерусәлимә гајыданда Фарс шаһы Јеһованын мәбәди үчүн буҝүнкү өлчү илә 100 милјон доллар дәјәриндә бәхшиш — гызыл, ҝүмүш вә саир әшјалар ианә етмишди. Јоллары тәһлүкәли әразидән кечдији үчүн бу бәхшишләрин Јеһоваја һәср олундуғуну дәрк едән пејғәмбәр ианәләрин Јерусәлимә иткисиз чатдырылмасы үчүн мүәјјән тәдбир ҝөрмүшдү (Үзр. 8:24—34). Һәвари Булус да Јәһудијјәдәки мәсиһиләрә јардым мәгсәди илә вәсаит топламышды. О, тәдбир ҝөрдү ки, бу јардымы баҹы-гардашлара чатдыранлар «тәкҹә Јеһованын ҝөзүндә јох, инсанларын ҝөзүндә дә һәр ҹәһәтдән дүрүст» олсунлар. (2 Коринфлиләрә 8:18—21 ајәләрини охујун.) Тәшкилатымыз да ианәләрин истифадәси илә бағлы мәсәләләрә Үзејир пејғәмбәр вә һәвари Булус кими ҹидди јанашыр.

13. Бу јахынларда тәшкилатда баш верән дәјишикликләрә нә сәбәб олмушду?

¹³ Аилә өз хәрҹләрини ҝәлирә ујғунлашдырмаг, һәмчинин Јеһованын ишини даһа чох дәстәкләмәк үчүн садә јашамаг вә хәрҹләри азалтмаг гәрарына ҝәләндә мүәјјән дәјишикликләр етмәли олур. Тәшкилатымыз да ејни принсиплә давраныр. Сон бир нечә ил әрзиндә тәшкилатда бир сыра јени лајиһәләр һәјата кечирилмишди. Лакин һәрдән бу лајиһәләрә хәрҹләнән вәсаит топланан ианәләрин мигдарыны ашырды. Одур ки, сизин үрәкдән етдијиниз ианәләрдән сәмәрәли шәкилдә истифадә етмәк мәгсәдилә тәшкилат хәрҹләри азалтмаг вә иши садәләшдирмәк үчүн мүәјјән тәдбирләр ҝөрдү.

14—16. а) Ианәләрин һесабына һансы лајиһәләр һәјата кечирилир? б) Бу лајиһәләрин шәхсән сизә һансы фајдасы олуб?

¹⁴ Јеһоваја узун илләрдир хидмәт едән мәсиһиләрин әксәријјәти гејд едир ки, руһани гида һәлә һеч вахт бу гәдәр бол олмамышды. Бу, һәгигәтән дә, беләдир. Сон бир нечә ил әрзиндә бу саһәдә хејли наилијјәтләр әлдә олунмушдур. Мисал кими, jw.org сајтынын вә JW телевизијасынын истифадәјә верилмәсини, «Јени Дүнја Тәрҹүмәси»нин чохлу дилләрдә дәрҹ олунмасыны чәкмәк олар. Һәмчинин 2014, 2015-ҹи илләрдә дүнјанын 14 шәһәринин ән бөјүк стадионларында кечирилән «Аллаһын Падшаһлығыны һәр шејдән үстүн тутун!» адлы бејнәлхалг топлантыны да бу сијаһыја дахил етмәк олар. Бу топлантыда иштирак едән баҹы-гардашлар өзләрини чох хошбәхт һисс едирдиләр.

 ¹⁵ Тәшкилатымызын тәгдим етдији бу әнамлара ҝөрә чохлу миннәтдарлыг сөзләри ешидирик. Мисал үчүн, Асијадан олан бир ҹүтлүк јазмышды: «Биз кичик бир шәһәрә тәјинат алмышыг. Баҹы-гардашлардан узаг дүшдүјүмүз үчүн һәрдән өзүмүзү чох јалгыз һисс едирик. Бәзән Јеһованын ишинин ҝениш мигјасда һәјата кечирилдији нәзәримиздән гачыр. Амма JW телевизијасындакы програмлара бахандан сонра бејнәлхалг гардашлығын бир үзвү олдуғумузу хатырлајырыг. Бурадакы баҹы-гардашлар JW телевизијасыны чох севирләр. Чох вахт онлар гејд едирләр ки, телевизијанын ајлыг програмына бахандан сонра өзләрини Рәһбәрлик Шурасындакы гардашлара даһа јахын һисс едирләр. Онлар Јеһованын тәшкилатынын бир үзвү олдуглары үчүн инди даһа чох фәхр дујурлар».

¹⁶ Һал-һазырда тәхминән 2500 ибадәт евинин тикинтиси вә ја әсаслы тәмири һәјата кечирилир. Һондурасдакы бир јығынҹағын үзвләри јени ибадәт евини истифадә етмәјә башлајандан сонра јазмышдылар: «Јеһова Аллаһын бу бөјүк аиләсинин вә бејнәлхалг гардашлығын үзвү олдуғумуз үчүн өзүмүзү хошбәхт сајырыг. Онларын сајәсиндә бизим чохдан арзуладығымыз ибадәт евимиз вар». Өз дилиндә Мүгәддәс Китаб вә саир нәшрләрин чап олундуғуну ҝөрән, тәбии фәлакәтдән сонра көмәк алан, хүсуси иҹтимаи шаһидлик ишинин ҝәтирдији бәһрәләрин шаһиди олан баҹы-гардашлар да өз миннәтдарлыгларыны билдирирләр.

17. Тәшкилатымыздакы наилијјәтләрин архасында Јеһованын дурдуғу нәдән ҝөрүнүр?

¹⁷ Јеһованын Шаһиди олмајан инсанлар тәшкилатын ҝөрдүјү ишләрин јалныз ианәләрин һесабына һәјата кечирилдијинә инана билмир. Мисал үчүн, бөјүк бир ширкәтин нүмајәндәси чапханаларымыздан бирини зијарәт едәркән орадакы бүтүн ишләрин көнүллүләр тәрәфиндән һәјата кечирилдијини, үстәлик бу иш үчүн әлавә ҝәлир јеринин олмадығыны, јалныз ианәләрин һесабына әрсәјә ҝәлдијини биләндә һејран галмышды. О демишди ки, биз мүмкүнсүз бир иши һәјата кечиририк. Бәли, бу һәгигәтдир. Биз дәрк едирик ки, бу иш бизим јох, Јеһованын сајәсиндә әрсәјә ҝәлир (Әјј. 42:2).

18. а) Мадди рузиләриндән Падшаһлығын иши үчүн хәрҹләјәнләр һансы немәтләри дадыр? б) Ушаглара вә Мүгәддәс Китабы јени өјрәнәнләрә әлиачыг олмағы неҹә ашыламаг олар?

¹⁸ Јеһова Аллаһ бизә чох бөјүк шәрәф нәсиб едиб, бизә мадди рузимизлә Онун ишини дәстәкләмәк имканы вериб. Јараданымыз бизи әмин едир ки, Падшаһлығын ишини дәстәкләјәнләрин башындан бол немәтләр төкәҹәк (Мәл. 3:10). О сөз верир ки, әлиачыг адам боллуға јетишәҹәк. (Мәсәлләр 11:24, 25 ајәләрини охујун.) Әлиачыг олмаг, һәмчинин инсаны бәхтијар едир, чүнки «вермәк алмагдан даһа чох хошбәхтлик ҝәтирир» (Һәв. 20:35). Биз, еләҹә дә сөзүмүз вә әмәлимизлә өвладларымыза вә Мүгәддәс Китабы јени өјрәнәнләрә пајлашмағы ашылаја биләрик. Гој, онлар да сәхавәт ҝөстәриб әвәзиндә Аллаһдан немәтләр алсынлар.

19. Бу мәгалә сизи нәјә тәшвиг едир?

¹⁹ Һәјатда нәјимиз, варса Јараданымызын бизә әрмәған етдији немәтләрдир. Бу немәтләрдән Онун иши үчүн сәрф етмәклә Она мәһәббәтимизи вә миннәтдарлығымызы изһар етмиш олуруг (1 Салн. 29:17). Гәдимдә Аллаһын халгы мәбәдин иши үчүн «көнүллү тәгдимәләри ҝәтирдијинә ҝөрә севинирди, чүнки бунлары Јеһоваја үрәкдән вермишдиләр» (1 Салн. 29:9). Ҝәлин биз дә Јеһованын бизә бәхш етдији немәтләрдән Онун јолунда хәрҹләјәрәк бол севинҹ вә хошбәхтлик дадаг!