1. Биз һансы чәтинликләрлә мүбаризә апарырыг вә биздәки һансы әһвали-руһијјә Јеһованы разы салыр? (Мәгаләнин әввәлиндәки шәклә бахын.)

ҺАМЫМЫЗА јахшы мәлумдур ки, бу шәр дүнјада һәјат проблемсиз өтүшмүр. Нә гәдәр баҹы-гардашымыз ҹидди хәстәликләрлә мүбаризә апарыр. Кимиси өзү аһыл јашда олса да, хәстә гоһумларына бахыр; кимиси аиләсинин ән хырда еһтијаҹларыны өдәмәк үчүн диши илә, дырнағы илә чарпышыр. Еләләри дә вар ки, бүтүн бу проблемләрин һамысыны бирдән јашајыр. Бу проблемләр инсанын вахтыны вә мәнәви ҝүҹүнү әлиндән алыр, һәлә бунун мадди тәрәфиндән данышмырыг. Амма һеч нәјә бахмајараг, бизим Јеһованын вәдләринә иманымыз мөһкәм, ҝөзәл ҝәләҹәјә үмидимиз сарсылмаздыр. Сөзсүз ки, хидмәтчиләринин бу әһвали-руһијјәси Јеһованын көнлүнү шад едир.

2. Әшија 40:29 ајәси бизи неҹә руһландырыр вә мәсиһи һансы јанлыш гәрары верә биләр?

² Ола билсин, һәрдән проблемләрин дөзүлмәз һәддә чатдығыны һисс едирсиниз. Әмин олун ки, бу һиссләри јашајан тәкҹә сиз дејилсиниз. Мүгәддәс Китабда ады чәкилән мөмин инсанлар да һәрдән ҝүҹләринин түкәндијини һисс едирди (1 Пад. 19:4; Әјј. 7:7). Амма онлар әлләрини јана салмырды, Јеһоваја үз тутуб Ондан ҝүҹ истәјирдиләр. Аллаһымыз Јеһова «јорғунлара ҝүҹ» верән Аллаһ  олдуғу үчүн онлар мәјус олмурду (Әшј. 40:29). Тәәссүф ки, бәзи диндашларымыз јашадыглары проблемләри һәлл етмәк үчүн ибадәтә «фасилә» вермәк гәрарына ҝәлир. Онларын бу һәрәкәтиндән елә чыхыр ки, мәсиһи ибадәти немәт јох, јүкдүр. Онлар Мүгәддәс Китабы охумаға, ибадәт ҝөрүшләринә ҝәлмәјә, тәблиғә чыхмаға сон гојурлар. Елә Шејтанын да истәдији мәһз будур.

3. а) Ибадәтдә зәифләмәјимизи истәјән Шејтанын арзусуну неҹә ҝөзүндә гоја биләрик? б) Бу мәгаләдә сөһбәт нәдән ҝедәҹәк?

³ Шејтан чох ҝөзәл билир ки, биз ибадәтдә нә гәдәр чох олсаг, бир о гәдәр ҝүҹлү олаҹағыг. Тәбии ки, о, буну истәмир. Буна ҝөрә дә, физики вә емосионал ҝүҹүнүзүн түкәндијини һисс едәндә Јеһовадан узаглашмајын, әксинә Она әввәлкиндән даһа јахын олмаға чалышын, чүнки О, «сизи ҝүҹлү, мәтин» едәҹәк (1 Бут. 5:10; Јаг. 4:8). Бу мәгаләдә ибадәтимизи зәифләдә биләҹәк ики вәзијјәти нәзәрдән кечирәҹәјик вә ҝөрәҹәјик ки, бу вәзијјәтләри Мүгәддәс Китабдакы нәсиһәтләрин көмәји илә неҹә аша биләрик. Амма әввәлҹә ҝәлин Әшија 40:26—31 ајәләринә нәзәр салаг вә Јеһованын бизә ҝүҹ вермәјә гадир олдуғуну сүбут едән дәлилләри арашдыраг.

4. Әшија 40:26 ајәси бизә нә өјрәдир?

⁴ Әшија 40:26 ајәсини охујун. Дүнјада елә бир инсан јохдур ки, Каинатдакы бүтүн улдузлары сајыб гуртара билсин. Алимләр дејир ки, тәкҹә бизим Сүд Јолу галактикасында 400 милјарда јахын улдуз вар. Амма сиз Јеһованын гүдрәтинә фикир верин: О, јаратдығы һәр бир улдуза ад вериб. Бурадан нә өјрәнирик? Әҝәр Јеһова јаратдығы ҹансыз варлыглара бу ҹүр диггәт јетирирсә, ҝөрүн О, сизә, Она шүурсуз шәкилдә дејил, мәһәббәтдән ирәли ҝәләрәк ибадәт едән бәндәсинә неҹә мәһрәм һиссләр бәсләјир! (Зәб. 19:1, 3, 14). Меһрибан Атамыз бизи биздән дә јахшы таныјыр. Мәтта 10:30 ајәсиндә јазылыб: «Сизин исә башыныздакы түкләр белә, бир-бир сајылыб». Һәмчинин Зәбур 37:18 ајәсиндә дејилир: «Јеһова саф инсанларын нәләр чәкдијини билир». Бәли, Аллаһ бизим чәкдијимиз бүтүн дәрдләрдән аҝаһдыр вә бизә онларын һәр биринә дөзмәк үчүн ҝүҹ вермәјә гадирдир.

5. Јеһованын бизә ҝүҹ вермәјә гадир олдуғуну нә тәсдиг едир?

⁵ Әшија 40:28 ајәсини охујун. Јеһова һәдсиз гүввәјә саһиб олан Аллаһдыр. Ҝәлин, Онун тәкҹә Ҝүнәшә вердији енержи барәдә данышаг. Бир сыра елми әсәрләрин мүәллифи олан Дејвид Боданис јазыр: «Ҝүнәшин бир санијәдә һасил етдији енержи бомбаларын [милјардларла атом бомбасынын] енержисинә бәрабәрдир». Һәмчинин диҝәр бир тәдгигатчынын һесабламаларына әсасән, «ҝүнәшдән бир санијәдә ајрылан енержи бәшәријјәтин 200 000 иллик енержи тәләбатыны гаршылаја биләр». Инди бир дүшүнүн: мәҝәр Ҝүнәшә бу енержини верән Халиг бизә истәнилән проблеми һәлл етмәк үчүн ҝүҹ вермәјә гадир дејил?!

6. Һансы мәнада Иса Мәсиһин бојундуруғу раһатдыр вә буну билмәк бизә неҹә тәсир етмәлидир?

⁶ Әшија 40:29 ајәсини охујун. Јеһоваја ибадәт етмәк инсана чохлу севинҹ јашадыр. Иса Мәсиһ давамчыларына демишди: «Бојундуруғуму үзәринизә ҝөтүрүн». Сонра белә бир әлавә етмишди: «Онда ҹаныныз тәравәтләнәр. Чүнки бојундуруғум раһат, јүкүм јүнҝүлдүр» (Мәт. 11:28—30). Сөзсүз ки, бу сөзләрин һәгигилијинә сиз дә шаһид олмусунуз. Елә олубму ки, евдән чыхыб јығынҹаға, тәблиғә ҝедәндә тагәтиниз олмајыб? Бәс евә гајыданда өзүнүзү неҹә һисс етмисиниз? Јәгин Исанын дедији кими, тәравәт тапмысыныз, проблемләрлә чарпышмаға өзүнүздә ҝүҹ һисс етмисиниз. Доғрудан да, Мәсиһин бојундуруғу раһатдыр!

7. Мәтта 11:28—30 ајәләриндәки сөзләрин һәгигилијини сүбут едән һадисәләр данышын.

 ⁷ Кајла адлы (ад шәртидир) бир баҹы хроники јорғунлуг, депрессија вә мигрендән әзијјәт чәкир. Тәбии ки, бу һалына ҝөрә һәрдән она јығынҹаға ҝетмәк чох чәтин олур. Бир дәфә о, ҝүҹүнү топлајыб мәрузәјә гулаг асмаға ҝедир. Баҹы өз һиссләрини бөлүшүр: «Мәрузә руһ дүшкүнлүјү барәдә иди. Гардаш о гәдәр шәфгәтлә, мүлајимликлә данышырды ки, мән ҝөз јашларымы сахлаја билмәдим. Бу, мәнә бир даһа хатырлатды ки, мән јығынҹагда олмалыјам». Баҹы әлиндән ҝәләни едиб бу ҝөрүшдә иштирак етдији үчүн чох хошбәхт иди.

8, 9. «Мән зәиф оланда ҝүҹлүјәм» демәклә һәвари Булус нәји нәзәрдә тутурду?

⁸ Әшија 40:30 ајәсини охујун. Нә гәдәр баҹарыглы, габилијјәтли олсаг да, һамымызын ҝүҹү мәһдуддур. Буну һәр биримиз гәбул етмәлијик. Һәвари Булус истедадлы инсан олса да, истәдији һәр шеји едә билмирди, онун да јолуну кәсән манеәләр вар иди. О, бу мәсәлә илә бағлы нараһатлығыны дуада Јеһоваја билдирәндә белә ҹаваб алмышды: «Сән зәиф оланда Мәним ҝүҹүм өзүнү бүтүнлүклә ҝөстәрир». Булус бу сөзләрин нә мәна дашыдығыны баша дүшмүшдү. Буна ҝөрә дә о, белә јазмышды: «Мән зәиф оланда ҝүҹлүјәм» (2 Кор. 12:7—10). Һәвари бу сөзләрлә нә демәк истәјирди?

⁹ Булус дәрк едирди ки, о, өз ҝүҹү илә чох аз шеји едә биләр, она Аллаһын көмәји лазымдыр. Ҝүҹүнүн чатмадығы мәгамларда Аллаһын руһу она лазым олан ҝүҹү верә биләрди. Бу руһ Булусу өз ҝүҹү илә әсла едә билмәјәҹәји ишләри ҝөрмәјә габил едәҹәкди. Биз дә бу көмәји дуја биләрик. Биздәки ҝүҹүн мәнбәји Јеһова Аллаһ оларса, сөзсүз, биз дә ҝүҹлү оларыг.

10. Јеһова Аллаһ Давуда чәтинликләрин өһдәсиндән ҝәлмәјә неҹә көмәк етмишди?

¹⁰ Давуд пејғәмбәр Аллаһын мүгәддәс руһунун гүдрәтини өз үзәриндә дәфәләрлә һисс етмишди. О, бәстәләдији нәғмәдә белә сөзләр јазмышды: «Сәнин көмәјинлә гулдурларын габағына чыхарам, Аллаһын ҝүҹү илә сәдләр ашарам» (Зәб. 18:29). Бизим дә сәдд кими јолумузу кәсән елә проблемләримиз вар ки, онлары өз ҝүҹүмүзлә аша билмәрик, бизә мүтләг Јеһованын көмәји лазымдыр.

11. Мүгәддәс руһ бизә проблемләрин өһдәсиндән ҝәлмәјә неҹә көмәк едир?

¹¹ Әшија 40:31 ајәсини охујун. Гарталлар узун мүддәт һавада сүзә билир. Амма бу, сырф онларын өз ҝүҹү сајәсиндә баша ҝәлмир. Гарталлар өз ҝүҹләринә гәнаәт етмәк үчүн исти һава ахынына дахил олур вә бу ахынын көмәји илә јүксәкдә гала билир. Ҝәлин чәтинликлә үзләшәндә гарталы јадымыза салаг. Јеһоваја јалвараг ки, бизә «көмәкчи,.. мүгәддәс руһ» васитәсилә өз ҝүҹүмүздән әлавә ҝүҹ версин (Јәһ. 14:26). Шүкр олсун ки, Јеһова ҝүнүн 24 сааты бу көмәји бизә вермәјә һазырдыр. Инди исә ҝәлин Јеһованын бу көмәјинә еһтијаҹ дујдуғумуз вәзијјәтләрдән бирини мүзакирә едәк. Сөһбәт диндашларымызла ҝәрҝинлик јашадығымыз һаллардан ҝедир. Илк нөвбәдә ҝәлин бахаг ҝәрҝинликләр нәјин нәтиҹәсиндә јараныр?

12, 13. а) Нәјә ҝөрә мәсиһиләр арасында анлашылмазлыг јараныр? б) Јусифин башына ҝәләнләрдән Јеһова һаггында нә өјрәнирик?

¹² Һамымыз гејри-камил олдуғумуз үчүн бәзән арамызда анлашылмазлыг јараныр. Һәрдән ја диндашларымыз бизи, ја да биз онлары сөзүмүз вә ја һәрәкәтимизлә гыҹыгландыра биләрик. Бу, ҹидди сынаға чеврилә биләр. Башга сынагларда олдуғу кими, бу вәзијјәтләрдә дә Јеһова бизә фүрсәт верир ки, Она сәдагәтимизи сүбут едәк. Гејри-камил олмаларына бахмајараг, Јеһованын севимли бәндәләри олан бу баҹы-гардашларымызла чијин-чијинә хидмәт етмәји өјрәнмәклә буну сүбут едә биләрик.

 ¹³ Јусифин дә һадисәсиндән ҝөрмәк олар ки, Јеһова хидмәтчиләринин сынагларла үзләшмәсинә изин верир. Јусиф ҝәнҹ оланда гардашлары пахыллыгларындан ону гул кими сатыр вә нәтиҹәдә о, ҝәлиб Мисирә чыхыр (Јар. 37:28). Јеһова баш верәнләрдән һалы иди вә сөзсүз ки, салеһ досту Јусифин нәләр јашадығыны ҝөрәндә пис олурду. Бунунла белә, Јеһова бу сынағы арадан галдырмады. Јусиф Фитфирин арвадына тәҹавүз етмәкдә иттиһам олунуб зиндана атыланда да, Јеһова мәсәләјә гарышмады. Бәс бу о демәк идими ки, Јеһова Јусифи атмышды? Әсла! Әксинә, Јусиф «әлини һансы ишә атырдыса, Јеһова ону аванд едирди» (Јар. 39:21—23).

14. Гәзәби рам етмәк инсана һәм руһани, һәм дә физики ҹәһәтдән неҹә фајда ҝәтирир?

¹⁴ Инди исә ҝәлин Јеһованын башга бир хидмәтчисинин, Давудун нүмунәсинә бахаг. Чох аз адам тапылар ки, инсанлардан Давуд гәдәр јара алсын. Бунунла белә, Давуд јол вермәди ки, гәзәб ону јејиб-битирсин. О јазмышды: «Гәзәби бурах, һиддәтдән чәкин, дилхор олуб шәрә әл атма» (Зәб. 37:8). Бизә гәзәби бурахмаға әсас верән ән ҝүҹлү нүмунә Јеһованын Өзүдүр, ахы О, «бизимлә ҝүнаһларымыза ҝөрә рәфтар етмир» (Зәб. 103:10). Гәзәби рам етмәк инсанын сағламлығы үчүн дә фајдалыдыр. Чүнки гәзәб инсанда јүксәк ган тәзјиги, тәнәффүс проблемләри кими мүхтәлиф хәстәликләр төрәдә, гара ҹијәрә, мәдәалты вәзә вә һәзм системинә тәсир едә биләр. Һәмчинин һирсли башда ағыл олмаз дејәрләр, биз гәзәбли оланда сағлам дүшүнә билмирик. Һәрдән гәзәбин нәтиҹәсиндә инсан узун сүрән депрессија јашаја биләр. Гәзәбин әкси олан сакит үрәк исә «ҹаны сағлам едәр» (Мәс. 14:30). Јаралы гәлбимизи сакитләшдириб диндашымызла мүнасибәти дүзәлтмәјә бизә нә көмәк едә биләр? Бу ишдә ҝөзәл нәтиҹә әлдә етмәк үчүн, Мүгәддәс Китабын һикмәтли мәсләһәтләринә әмәл етмәлијик.

15, 16. Диндашымыз бизим хәтримизә дәјибсә, мүнасибәти неҹә бәрпа едә биләрик?

¹⁵ Ефеслиләрә 4:26 ајәсини охујун. Бу дүнјанын инсанлары бизимлә пис рәфтар едәндән тәәҹҹүбләнмирик. Амма диндашларымыз вә ја аилә үзвләримиз сөзләри, јахуд һәрәкәтләри илә бизә јара вуранда, санки, дүнјамыз алт-үст олур. Туталым, олуб-кечәни унуда билмирик: инди нә едәк, кини, гәзәби илләрлә гәлбимиздә ҝәздирәк? Бәлкә даһа јахшы оларды ки, Мүгәддәс Китабын мәсләһәтинә әмәл едиб, мәсәләни дәрһал һәлл едәк? Унутмајын, буну нә гәдәр чох тәхирә салсаныз, диндашынызла мүнасибәти дүзәлтмәк бир о гәдәр чәтин олаҹаг.

¹⁶ Тәсәввүр един ки, баҹы-гардашлардан кимсә сизин хәтринизә дәјиб вә сиз һеч  ҹүр бунун үстүндән кечә билмирсиниз. Ҝәлин ҝөрәк белә вәзијјәтдә сүлһ јаратмаг үчүн нә едә биләрсиниз. Биринҹиси, Јеһоваја һәрарәтлә дуа един. Хаһиш един ки, сизә диндашынызла хош сөһбәт етмәјә көмәк етсин. Јадда сахлајын, о инсан Јеһованын достларындан биридир (Зәб. 25:14). Јеһова ону чох истәјир. Јеһова Өз достлары илә хош рәфтар едир вә О, ҝөзләјир ки, биз дә онларла ејни ҹүр рәфтар едәк (Мәс. 15:23; Мәт. 7:12; Кол. 4:6). Һәмчинин сөһбәт етмәздән әввәл, нә дејәҹәјинизи дүшүнүн. Бир шеји дә нәзәрә алын ки, диндашыныз буну гәсдән етмәјиб, она етибар един. Мүнасибәтиниздә јаранан чатлары бәрпа етмәјә көмәк едә биләҹәк истәнилән фүрсәтә ачыг олун. Сөһбәтә белә башламаг олар: «Бәлкә дә, мән чох һәссас инсанам, амма дүнән сән мәнә о сөзләри дејәндә өзүмү...» Әҝәр сөһбәтиниз истәдијиниз нәтиҹәни вермәсә, мүнасибәти дүзәлтмәк үчүн башга бир фүрсәт ахтарын. Һәмчинин диндашыныз үчүн дуа един, Аллаһдан она хејир-дуа истәјин. Јеһовадан хаһиш един ки, сизә диггәтинизи диндашынызын мүсбәт ҹәһәтләринә ҹәмләмәјә көмәк етсин. Нәтиҹә неҹә олур олсун, бир шејә әмин олун ки, Јеһова диндашынызла, Онун досту илә мүнасибәтинизи дүзәлтмәк үчүн сәмими гәлбдән атдығыныз аддымлары јүксәк дәјәрләндирир.

17. Биз ҝүнаһ ишләдәндә, Јеһова бизә ајаға галхмаға неҹә көмәк едир? Јеһованын тәгдим етдији көмәкдән неҹә јарарлана биләрик?

¹⁷ Бәзиләри ҹидди ҝүнаһа јол вердикләри үчүн, өзләрини Јеһоваја ибадәт етмәјә лајиг билмир. Ҝүнаһ чох залым ағадыр. Өз ҝүнаһлары илә савашан Давуд пејғәмбәрин сөзләриндән буну ајдын ҝөрмәк олар: «Мән сусдугҹа бүтүн ҝүнү инилдәдим, сүмүкләрим әриди. Ҝеҹә-ҝүндүз әлин үзәримдә ағыр јүк олду». Давуд бу проблеми киши кими, руһән јеткин инсан кими һәлл еләди. О јазмышды: «Нәһајәт, ҝүнаһымы Сәнә етираф етдим... Сән дә ҝүнаһларымдан кечдин» (Зәб. 32:3—5). Сиз дә ағыр ҝүнаһа јол вермисинизсә, Јеһоваја үз тутун, О, сизә көмәк етмәјә, сизи ајаға галдырмаға һазырды. Бу көмәји сиз јығынҹаг васитәсилә ала биләрсиниз (Мәс. 24:16; Јаг. 5:13—15). Бу иши тәхирә салмајын, чүнки сизин әбәди ҝәләҹәјиниз тәһлүкәдәдир. Бәс ҝүнаһларынызын бағышланмасына рәғмән, кечмиш сәһвләринизә ҝөрә һәлә дә әзаб чәкирсинизсә, неҹә раһатлыг тапа биләрсиниз?

18. Јарарсызлыг һисси илә мүбаризә апаран мәсиһиләрә Булусун нүмунәси неҹә көмәк едә биләр?

¹⁸ Һәвари Булус кечмишдә төрәтдији хәталара ҝөрә һәрдән пәришан олурду. О, һиссләрини белә ифадә етмишди: «Мән һәвариләрин ән кичијијәм вә һәвари адланмаға лајиг дејиләм, чүнки Аллаһын јығынҹағына зүлм етмишәм». Бунунла белә һәвари демишди: «лакин инди бу мөвгеји Аллаһын лүтфү сајәсиндә тутурам» (1 Кор. 15:9, 10). Јеһова Булусу олдуғу кими гәбул етмишди вә истәјирди ки, о, да буну билсин. Әҝәр сиз дә кечмиш ҝүнаһларыныза ҝөрә үрәкдән төвбә едәрәк онлары етираф етмәк үчүн бүтүн лазыми аддымлары атмысынызса, әмин ола биләрсиниз ки, Јеһова сиздән мәрһәмәтини әсирҝәмәјәҹәк. Јеһова Өзү буна сөз верир. Онун сөзүнә инанын вә әфвинә сығынын! (Әшј. 55:6, 7).

19. 2018-ҹи илин ајәси һансыдыр вә нәјә ҝөрә бу ајә јериндәдир?

¹⁹ Јашадығымыз дүнја сонуна јахынлашдыгҹа проблемләрин артмасы гачылмаздыр. Амма архајын ола биләрик ки, «јорғунлара ҝүҹ, тагәтсизләрә гүввәт» Верәнин сајәсиндә биз сарсылмаз гала биләрик (Әшј. 40:29; Зәб. 55:22; 68:19). Бу фикир шүурумуза һәкк олсун дејә ил боју ибадәт евләримиздә Әшија 40:31 ајәси нүмајиш етдириләҹәк: «Јеһоваја бел бағлајанларын ҝүҹү тәзәләнәр». Мәһз бу ајә 2018-ҹи ил үчүн илин ајәси сечилмишдир.