Егоистлик инсанда гәрәз һисси јарадыр. Егоист инсан өзү барәдә чох јүксәк фикирдә олур. О өзүнү һамыдан үстүн сајыр, өзүндән фәргләнән адамлара исә јухарыдан ашағы бахыр. Бу тәләјә һамы дүшә биләр. Бир енсиклопедијада дејилир: «Әксәр халглар — кимиси аз, кимиси чох — дүшүнүр ки, онларын һәјат тәрзи, јемәкләри, ҝејимләри, вәрдишләри, етигадлары, дәјәрләри вә с. башга халгларынкындан үстүндүр» («Енҹјҹлопæдиа Британниҹа»). Бу ҹүр јанлыш дүшүнҹәјә јолухмамаг үчүн нә едә биләрик?

«Тәвазөкар олуб башгаларыны өзүнүздән үстүн сајын» (ФИЛИППИЛИЛӘРӘ 2:3).

Мәнасы: Өзүмүз барәдә һәддән артыг јүксәк фикирдә олмамаг үчүн тәвазөкар олмағы өјрәнмәлијик. Тәвазөкар инсан баша дүшүр ки, башгалары һәјатын мүәјјән саһәләриндә ондан үстүндүр. Елә бир ҹәмијјәт јохдур ки, бүтүн јахшы кејфијјәтләрә вә баҹарыглара саһиб олсун.

Мисал үчүн Стефанын нүмунәсинә бахаг. О, коммунист өлкәсиндә бөјүјүб боја баша чатмышды. Бу ҝөрә дә гејри-коммунист өлкәләриндән  олан инсанлара гәрәзлә јанашырды. Амма Стефан үрәјиндә бу һисси боғмаға мүвәффәг олду. О дејир: «Мән баша дүшүрәм ки, гәрәз һиссинин өһдәсиндән ҝәлмәк үчүн башгаларыны өзүндән үстүн сајмаг ваҹибдир. Мән һәр шеји билмирәм, она ҝөрә дә һәрәдән бир шеј өјрәнмәк олар».

Өзүнүзә гаршы дүрүст олмаға чалышын вә сәһвләринизи ҝөрүн. Гәбул един ки, башгалары мүәјјән саһәләрдә сиздән даһа баҹарыглыдыр. Дүшүнмәјин ки, мүәјјән ҹәмијјәтдән олан инсанларын һамысы ејни сәһвләри едир.

Мүәјјән ҹәмијјәтдән олан инсан һаггында мәнфи гәнаәтә ҝәлмәздән өнҹә дүшүнүн:

• «Бу инсанда хошума ҝәлмәјән хүсусијјәтләр доғрудан да пис хүсусијјәтләрдир, јохса садәҹә биз фәрглијик?»

• «Бәс о мәндә сәһв тапа биләр?»

• «О һансы саһәләрдә мәндән баҹарыглыдыр?»

Бу суаллара дүрүст ҹаваб версәниз, нәинки гәрәз һиссини дәф едәрсиниз, үстәлик һәмин адамда ҝөзәл ҹәһәтләр ҝөрә биләрсиниз.