«АЛЛАҺ Руһдур», буна ҝөрә инсан ҝөзү Ону ҝөрә билмәз (Јәһја 4:24). Бунунла белә, Мүгәддәс Китабда дејилир ки, бәзи инсанлар мүәјјән мәнада Аллаһы ҝөрүбләр (Ибраниләрә 11:27). Бәс бу, неҹә мүмкүндүр? Сиз «ҝөзәҝөрүнмәз» Аллаһы ҝөрә биләрсиниз? (Колослулара 1:15).

Бизим вәзијјәтимизи анаданҝәлмә кор адамын вәзијјәтинә бәнзәтмәк олар. Онун ҝөздән әлил олмасы әтраф аләми дәрк етмәсинә әнҝәл төрәдирми? Там јох! Кор адам мәлуматы мүхтәлиф үсулларла әлдә едир; бу, она инсанлары, әшјалары вә әтрафда баш верәнләри тәсәввүр етмәјә көмәк едир. Ҝөздән әлил олан бир киши демишди: «Биз ҝөзләримизлә јох, ағлымызла ҝөрүрүк».

Ејнилә, физики ҝөзләринизлә Аллаһы ҝөрә билмәсәниз дә, Ону «гәлбинизин [ҝөзү]» илә ҝөрә биләрсиниз (Ефеслиләрә 1:18). Неҹә? Ҝәлин үч үсула нәзәр салаг.

Кор адамын ешитмә вә тохунма габилијјәти, адәтән, даһа ити олур. Ејнилә, сиз дә һиссләриниз васитәсилә әтраф аләми тәдгиг едә вә ону јарадан ҝөзәҝөрүнмәз Аллаһы дәрк едә биләрсиниз. «Онун ҝөзәҝөрүнмәз кејфијјәтләри: әбәди гүдрәти вә илаһилији дүнја јаранандан бәри ајдын ҝөрүнүр вә јарадылмыш шејләр васитәсилә дәрк едилир» (Ромалылара 1:20).

Ҝөтүрәк мәскәнимиз олан Јер күрәсини. Јер садәҹә мөвҹуд олмағымыз үчүн јох, һәм дә һәјатдан зөвг алмағымыз үчүн белә һејрәтамиз јарадылыб. Үзүмүзә вуран сәрин меһи һисс етмәк, ҝүнәшин хумарландыран истисини дујмаг, сулу, ләззәтли мејвәни дадмаг, гушларын гәлбохшајан ҹәһ-ҹәһини динләмәк көнлүмүзү охшајыр. Бу бәхшишләр Јараданымызын неҹә гајғыкеш, нәвазишли вә сәхавәтли олдуғундан хәбәр верир!

Бәс Каинат бизә Аллаһ һагда нәләри ачыглајыр? Биринҹиси, Аллаһын ҝүҹүнү. Сон елми арашдырмалар белә нәтиҹә чыхармаға әсас верир ки, каинат нәинки ҝенишләнир, һәтта ҝетдикҹә онун ҝенишләнмә сүрәти дә артыр! Ҝеҹә сәманы сејр едәндә бир дүшүнүн: «Каинатын ҝенишләнмәсинә вә онун ҝенишләнмә сүрәтинин артмасына тәкан верән гүввәнин мәнбәји нәдир вә ја кимдир?» Мүгәддәс Китабда дејилир ки, Јарадан бол гүввә, бөјүк гүдрәт саһибидир (Јешаја 40:26). Аллаһын әл ишләри Онун Күлли-Ихтијар, јәни гүввәти мөһтәшәм олан Аллаһ олдуғуну ҝөстәрир (Әјјуб 37:23).

Ҝөздән әлил ики өвлад бөјүдән бир ана бөлүшүр: «Данышмаг онлары өјрәтмәк үчүн ән ваҹиб тәлим васитәләриндән биридир. Ҝөрдүјүнүз вә ешитдијиниз һәр шеји онлара данышын, һәмишә онлара нә исә изаһ етмәјә һазыр олун. Онларын ҝөзләри сизсиниз». Ејнилә, «бәшәр өвладларындан һеч ким һеч вахт Аллаһы [ҝөрмәдији]» үчүн Иса Мәсиһ — «илкин илаһи варлыг Ону бизә танытды» (Јәһја 1:18). Аллаһын јаратдығы илк варлыг вә ваһид Оғлу олан Иса Мәсиһ бизим ҝөјләрә ачылан «ҝөзләримиздир». О, ҝөзәҝөрүнмәз Аллаһ һагда ән јахшы мәлумат мәнбәјидир.

Ҝөјдә гәринәләр бојунҹа Аллаһын јанында олан Иса Мәсиһ ҝөрүн Онун һагда бизә нәләри ачыглајыб:

• Јарадан дурмадан чалышыр. «Мәним Атам индијәдәк ишләјир» (Јәһја 5:17).

• Халигимиз һәр еһтијаҹымызы билир. «Аллаһ, Ондан бир шеј истәмәздән әввәл, сизин нәјә еһтијаҹ дујдуғунузу билир» (Матта 6:8).

• Аллаһ бәндәләринә гаршы чох сәхавәтлидир. «Ҝөјдәки [Атаныз]... ҝүнәшә әмр едир ки, писләрин дә, јахшыларын  да үзәринә доғсун; јағыша әмр едир ки, салеһләрин дә, гејри-салеһләрин дә үзәринә јағсын» (Матта 5:45).

• Уҹа Аллаһымыз һәр биримизә ајры-ајрылыгда дәјәр верир. «Мәҝәр ики сәрчәни бир гара гәпијә сатмырлар? Һәрчәнд онлардан һеч бири Атанызын хәбәри олмадан јерә дүшмүр. Сизин исә сачынызын телләри белә бир-бир сајылыб. Буна ҝөрә дә горхмајын. Сиз сәрчәләрдән гат-гат гијмәтлисиниз» (Матта 10:29—31).

Ҝөздән әлил олан инсанлар чох вахт мүхтәлиф мәфһумлары ҝөрмә габилијјәти олан инсанлардан фәргли шәкилдә гаврајырлар. Мәсәлән, әҝәр ҝөрән инсан көлҝәни ҝүнәшин дүшмәдији бир јер кими билирсә, кор инсан көлҝәни ҝүнәш шүаларынын дүшмәдији сојуг јер кими баша дүшүр. Неҹә ки тамамилә кор инсан нә көлҝәни, нә дә ки ишығы ҝөрә билмәз, биз дә тәк башымыза Јеһованы дәрк едә билмәрик. Буна ҝөрә дә Јеһова јер үзүнә Онун хүсусијјәтләрини вә шәхсијјәтини мүкәммәл шәкилдә әкс етдирән бир инсан ҝөндәрмишди.

Бу, Иса Мәсиһдир (Филипилиләрә 2:7). Иса Јеһова һаггында данышмагдан савајы, Онун неҹә Аллаһ олдуғуну да ҝөстәрмишди. Исанын шаҝирди Филип бир дәфә ондан: «Аға, бизә Атаны ҝөстәрсән, бәсимиздир», — дејә хаһиш едәндә о ҹаваб вермишди: «Мәни ҝөрән Атаны да ҝөрүб» (Јәһја 14:8, 9). Иса пејғәмбәрин әмәлләринә баханда биз нә «ҝөрүрүк»?

Иса Мәсиһ меһрибан, тәвазөкар, садә, әлчатан инсан иди (Матта 11:28—30). Онун елә хасијјәти вар иди ки, адамы өзүнә чәкирди, инсанын үрәји ачылырды. Башгасынын дәрдини дәрд едәр, севинҹинә севинәрди (Лука 10:17, 21; Јәһја 11:32—35). Мүгәддәс Китабда Иса пејғәмбәр һаггында јазыланлары охујанда вә ја динләјәндә һиссләринизи ишә салын вә һадисәләри хәјалынызда ҹанландырын. Онун инсанларла неҹә рәфтар етдији һагда дүшүнсәниз, Аллаһын мәфтунедиҹи хүсусијјәтләрини даһа ајдын ҝөрәҹәк вә Она јахын олмаг истәјәҹәксиниз.

Бир јазычы кор инсанын дүнјаны неҹә дәрк етдији барәдә јазыр: «Кор инсан мәлуматы мүхтәлиф јолларла (тохунма, ијбилмә, ешитмә вә саирә габилијјәтләр) һиссә-һиссә алыр. Там мәнзәрә әлдә етмәк үчүн о, бу һиссәләри неҹәсә бир араја ҝәтирмәлидир». Ејнилә, Аллаһын әл ишләринә нәзәр саланда, Иса Мәсиһин Онун һаггында дедикләрини охујанда вә Аллаһын хүсусијјәтләрини неҹә әкс етдирдијини дүшүнәндә Јеһова һагда ҝөзәл бир мәнзәрә әрсәјә ҝәләҹәк. Онда Аллаһ сизин үчүн даһа реал олаҹаг.

Гәдимдә јашамыш Әјјуб пејғәмбәр дә Аллаһы јаратдыглары васитәсилә дәрк етмишди. Әввәл–әввәл о, Аллаһ һаггында билмәдији шејләри данышмышды (Әјјуб 42:3). Анҹаг Јараданын харигүладә ишләри үзәриндә дүшүнәндә о, үрәкдән демишди: «Гулагларыма сорағын чатмышды, индисә Сәни ҝөзләримлә ҝөрүрәм» (Әјјуб 42:5).

Сиз дә Аллаһы бу ҹүр ҝөрә биләрсиниз. Әҝәр Јеһованы ахтарсаныз, мүтләг Ону тапаҹагсыныз (1 Салнамәләр 28:9). Јеһованын Шаһидләри бөјүк мәмнунијјәтлә сизә ҝөзәҝөрүнмәз Јараданымыза јахынлашмаға көмәк едәҹәкләр.