Бөјүк мүсибәт бәшәријјәтдә индијә гәдәр ҝөрүнмәмиш бир мүсибәт олаҹаг. Мүгәддәс Китаб пејғәмбәрлијинә әсасән, бу, «ахырзаманда» баш верәҹәк (2 Тимутијә 3:1; Дәнјал 12:4). Бу «елә бир мүсибәт олаҹаг ки, беләси Аллаһ дүнјаны јарадандан һәмин вахтадәк олмајыб вә бир даһа олмајаҹаг» (Марк 13:19; Дәнјал 12:1; Мәтта 24:21, 22).

Бөјүк мүсибәтдә баш верәҹәк һадисәләр

• Јалан динин мәһви. Јалан дин бир ҝөз гырпымында мәһв едиләҹәк (Вәһј 17:1, 5; 18:9, 10, 21). Бирләшмиш Милләтләр Тәшкилаты адланан сијаси гүввәләр бу гәрары вермәклә Аллаһын истәјини һәјата кечирмиш олаҹаглар * (Вәһј 17:3, 15—18).

• Һәгиги динә һүҹум. Һизгијалын ҝөрүнтүсүндә «Мәҹуҹ өлкәсиндән олан Јәҹуҹ» кими тәсвир олунан халглар бирлији һәгиги динин үзвләрини мәһв етмәјә чалышаҹаг. Лакин Аллаһ Өз хидмәтчиләрини бу мәһвдән горујаҹаг (Һизгијал 38:1, 2, 9—12, 18—23).

• Бәшәријјәтә чыхарылан һөкм. Иса Мәсиһ бүтүн бәшәријјәтә һөкм чыхараҹаг вә «инсанлары чобан гојунлары кечиләрдән ајырдығы кими, бир-бириндән ајыраҹаг» (Мәтта 25:31—33). О, инсанлары ҝөјдә онунла бирҝә һакимијјәт сүрәҹәк гардашларыны дәстәкләјиб-дәстәкләмәмәләри әсасында ајыраҹаг (Мәтта 25:34—46).

• Падшаһлыгда идарә едәҹәк кәсләр топланыр. Иса Мәсиһлә бирҝә идарә етмәк үчүн сечилмиш садиг инсанлар јер үзүндәки ишләрини тамамлајыб ҝөјләр һәјаты үчүн дирилдиләҹәкләр (Мәтта 24:31; 1 Коринфлиләрә 15:50—53; 1 Салоникилиләрә 4:15—17).

• Армаҝеддон. «Гадир Аллаһын бөјүк ҝүнүндә олаҹаг» бу мүһарибә һәмчинин «Јеһованын ҝүнү» адланыр (Вәһј 16:14, 16; Әшија 13:9; 2 Бутрус 3:12). Мәсиһин һагларында һөкм чыхардығы кәсләр мәһв едиләҹәк (Сәфәнја 1:18; 2 Салоникилиләрә 1:6—10). Бура Мүгәддәс Китабда једдибашлы вәһши һејван кими тәсвир олунан бүтүн дүнјадакы сијаси системин мәһви дахилдир (Вәһј 19:19—21).

Бөјүк мүсибәтдән сонра

• Шејтан вә онун ҹинләри буховланыр. Баш мәләк Шејтаны вә онун ҹинләрини «дибсиз гујуја» атаҹаг, јәни өлү вәзијјәтдә, фәалијјәтсиз олаҹаглар (Вәһј 20:1—3). Шејтанын дибсиз гујуда сахланылмасы, санки, һәбсдә олмасы демәкдир; о, һеч нәјә вә һеч кимә тәсир едә билмәјәҹәк (Вәһј 20:7).

• Миниллик башлајыр. Аллаһын Падшаһлығынын 1000 иллик фәалијјәти башлајаҹаг вә бәшәријјәтә бөјүк хејир-бәрәкәтләр ҝәтирәҹәк (Вәһј 5:9, 10; 20:4, 6). Сајсыз-һесабсыз «бөјүк бир издиһам» бөјүк мүсибәтдән сағ чыхыб јер үзүндәки Миниллик һакимијјәтин башланғыҹыны ҝөрәҹәкләр (Вәһј 7:9, 14; Зәбур 37:9—11).