Јеһованын Шаһиди олан бизләр Иса Мәсиһин өјрәтдији вә онун һәвариләринин әмәл етдији мәсиһи тәлимләринә риајәт едирик. Бу мәгаләдә әсас тәлимләримиз ҝөстәрилир.

1. Аллаһ. Биз Гадир, Јарадан вә тәк олан Аллаһа ибадәт едирик. Онун ады Јеһовадыр (Зәбур 83:18; Вәһј 4:11). О, Ибраһим, Муса вә Иса пејғәмбәрин Аллаһыдыр (Чыхыш 3:6; 32:11; Јәһја 20:17).

2. Мүгәддәс Китаб. Биз әминик ки, Мүгәддәс Китаб Аллаһ тәрәфиндән ҝөндәрилиб (Јәһја 17:17; 2 Тимутијә 3:16). Мүгәддәс Китаб, јәни Төврат, Зәбур вә Инҹил 66 бөлмәдән ибарәтдир вә биз онун һәр бөлмәсинин Аллаһдан олдуғуна инанырыг. Бу фикри профессор Ҹејсон Д. Бедун да тәсдигләјир. О дејир ки, Јеһованын Шаһидләринин иман вә әмәлләри еһтималлара јох, сырф Мүгәддәс Китабын дедијинә әсасланыр («Truth in Translation», сәһ. 165).

   Аллаһын Кәламынын һәр кәлмәсини гәбул етсәк дә, биз фундаменталист дејилик. Баша дүшүрүк ки, Мүгәддәс Китабын бәзи һиссәләри мәҹази мәнада олдуғу үчүн онун һәр сөзүнү һәрфи мәнада гәбул етмәк лазым дејил (Вәһј 1:1).

3. Иса Мәсиһ. Биз Иса Мәсиһин тәлим вә нүмунәсинә ујғун јашајырыг. Ону Хиласкар вә Аллаһын Оғлу кими гәбул едирик (Мәтта 20:28; Һәвариләрин ишләри 5:31). Буна ҝөрә биз мәсиһиләр адланырыг (Һәвариләрин ишләри 11:26). Мүгәддәс Китабдан өјрәндик ки, Иса Мәсиһ Гадир Аллаһ дејил вә Үч үгнум тәлими дә Аллаһын Кәламына әсасланмыр (Јәһја 14:28).

4. Аллаһын Падшаһлығы. Бу, инсанын үрәјинин вәзијјәти јох, реал сәмави һөкумәтдир. О, бүтүн инсан һөкумәтләрини әвәз едәҹәк вә Аллаһын јер үчүн олан нијјәтини һәјата кечирәҹәк (Дәнјал 2:44; Мәтта 6:9, 10). Бүтүн бунлар тезликлә баш верәҹәк, чүнки Мүгәддәс Китабда дејилир ки, биз ахырзаманда јашајырыг (2 Тимутијә 3:1—5; Мәтта 24:3—14).

   Иса Мәсиһ Аллаһын Падшаһлығынын Падшаһыдыр. О, 1914-ҹи илдә идарә етмәјә башлајыб (Вәһј 11:15).

5. Хиласымыз. Инсанлар ҝүнаһ вә өлүмдән Иса Мәсиһин фидјә гурбанлығы сајәсиндә азад ола биләр (Мәтта 20:28; Һәвариләрин ишләри 4:12). Фидјә гурбанлығындан фајдаланмаг үчүн Иса Мәсиһә иман етмәк кифајәт дејил. Инсан өз һәјат тәрзини дәјишиб вәфтиз олмалыдыр (Мәтта 28:19, 20; Јәһја 3:16; Һәвариләрин ишләри 3:19, 20). Инсанын иманы әмәлиндән ҝөрүнүр (Јагуб 2:24, 26). Анҹаг бу о демәк дејил ки, биз хиласы газана биләрик. Бу, јалныз Аллаһын лүтфү сајәсиндә мүмкүндүр (Галатијалылара 2:16, 21).

6. Ҝөјләр. Јеһова Аллаһ, Иса Мәсиһ вә садиг мәләкләр руһани аләмдә јашајырлар * (Зәбур 103:19—21; Һәвариләрин ишләри 7:55). Ҝөјдә јерләшән Аллаһын Падшаһлығында Иса Мәсиһлә бирликдә идарә етмәк үчүн 144 000 нәфәрдән ибарәт кичик бир груп дирилдиләҹәк (Дәнјал 7:27; 2 Тимутијә 2:12; Вәһј 5:9, 10; 14:1, 3).

7. Јер күрәси. Јарадан јери инсанларын әбәди јашамасы үчүн јарадыб (Зәбур 104:5; 115:16; Ваиз 1:4). Итаәткар инсанлара Аллаһ мүкәммәл сағламлыг вә јерүзү Ҹәннәтдә әбәди һәјат верәҹәк (Зәбур 37:11, 34).

8. Писликләр вә әзаб-әзијјәт. Бунлар мәләкләрдән биринин Аллаһа гаршы үсјан етмәси илә башлады (Јәһја 8:44). Аллаһа аси чыхараг «Шејтан» вә «Иблис» адланан бу мәләк илк инсан ҹүтүнү она гошулмаға тәһрик етди. Нәтиҹәдә бу, бүтүн бәшәријјәти бәлаја салды (Јарадылыш 3:1—6; Ромалылара 5:12). Шејтанын иттиһамынын әсассыз олдуғуну сүбут етмәк үчүн Аллаһ пислик вә әзаб-әзијјәтләрә јол верди. Лакин бунлар чох чәкмәјәҹәк.

9. Өлүм. Инсан өләндә мөвҹудлуғуна сон гојур (Зәбур 146:4; Ваиз 9:5, 10). О, ҹәһәннәм әзабы чәкмир.

   Аллаһ милјардларла инсаны дирилдәҹәк (Һәвариләрин ишләри 24:15). Һәјата гајыдандан сонра Аллаһы гәбул етмәјән инсанлар әбәдилик мәһв олаҹаг. Онларын артыг дирилмәјә һеч бир үмидләри олмајаҹаг (Вәһј 20:14, 15).

10. Аилә. Аллаһын ҝөзүндә аилә бир киши илә бир гадынын бирлијидир. Бошанмаја јеҝанә сәбәб исә зинадыр (Мәтта 19:4—9). Биз дә бу гануна әмәл едирик. Әминик ки, аиләнин хошбәхтлији Мүгәддәс Китаб принсипләринә әмәл етмәкдән асылыдыр (Ефеслиләрә 5:22—6:1).

11. Ибадәтимиз. Биз хача вә ја диҝәр сурәтләрә ситајиш етмирик (Ганунун тәкрары 4:15—19; 1 Јәһја 5:21). Ибадәтимизин әсас һиссәләри бунлардыр:

    • Аллаһа дуа етмәк (Филиппилиләрә 4:6).

    • Мүгәддәс Китабы охумаг вә арашдырмаг (Зәбур 1:1—3).

    • Өјрәндикләримизин үзәриндә дүшүнмәк (Зәбур 77:12).

    • Дуа етмәк, Аллаһын Кәламыны арашдырмаг, руһани маһнылар охумаг, иманымызы тәзаһүр етдирмәк, һәмчинин диндашларымызы вә диҝәр инсанлары руһландырмаг үчүн бир јерә топлашмаг (Колослулара 3:16; Ибраниләрә 10:23—25).

    • Падшаһлыг һаггындакы мүждәни инсанлара чатдырмаг (Мәтта 24:14).

    • Еһтијаҹы оланлара көмәк етмәк (Јагуб 2:14—17).

    • Ибадәт евләрини вә Мүгәддәс Китабын үмумдүнја маарифләндирмә ишинә хидмәт едән диҝәр биналары тикмәк вә тәмир етмәк (Зәбур 127:1).

    • Тәбии фәлакәтдән зәрәр чәкәнләрә көмәк етмәк (Һәвариләрин ишләри 11:27—30).

12. Јығынҹагларымыз. Биз јығынҹаг шәклиндә топлашырыг. Һәр јығынҹаға ағсаггаллар шурасы нәзарәт едир. Анҹаг ағсаггаллар руһаниләр синфи дејилләр вә мааш алмырлар (Мәтта 10:8; 23:8). Биз ондабирләр вә ја кимдәнсә мәҹбури пул јығмырыг (2 Коринфлиләрә 9:7). Фәалијјәтимиз бүсбүтүн көнүллү ианәләр һесабына малијјәләшир.

    Јеткин мәсиһиләрдән ибарәт кичик груп олан Рәһбәрлик Шурасы баш идарәмиздә хидмәт едәрәк бүтүн дүнјадакы Јеһованын Шаһидләринин фәалијјәтини идарә едир (Мәтта 24:45).

13. Арамыздакы бирлик. Дүнјанын һансы јериндә јашасаг да, һамымыз һәмфикирик (1 Коринфлиләрә 1:10). Әлимиздән ҝәләни едирик ки, арамызда сосиал, етник, ирги вә тәбәгә фәрги олмасын (Һәвариләрин ишләри 10:34, 35; Јагуб 2:4). Һәмфикир олсаг да, һәр биримиз сечим етмәкдә азадыг. Һәр бир Јеһованын Шаһиди Мүгәддәс Китаб әсасында тәрбијә олунмуш виҹданына ҝөрә гәрар верир (Ромалылара 14:1—4; Ибраниләрә 5:14).

14. Давранышымыз. Биз инсанлара һәр саһәдә мәһәббәт ҝөстәрмәјә чалышырыг (Јәһја 13:34, 35). Ганкөчүрмә кими Аллаһын бәјәнмәдији ишләрдән гачырыг (Һәвариләрин ишләри 15:28, 29; Галатијалылара 5:19—21). Сүлһпәрвәрик, мүһарибәләрдә иштирак етмирик (Мәтта 5:9; Әшија 2:4). Биз јашадығымыз өлкәнин һакимијјәтинә һөрмәтлә јанашырыг вә онун ганунларына әмәл едирик, бир шәртлә ки, бу ганунлар Аллаһын әмрләринә зидд олмасын (Мәтта 22:21; Һәвариләрин ишләри 5:29).

15. Башгалары илә мүнасибәтимиз. Иса әмр етмишди: «Башгасыны өзүнү севдијин кими сев». Мәсиһиләр һаггында исә онларын дүнјаја мәхсус олмадығыны демишди (Мәтта 22:39; Јәһја 17:16). Буна ҝөрә дә биз һамыја јахшылыг етмәјә чалышырыг. Ејни заманда сијаси ишләрдә битәрәф мөвге тутуруг вә башга динләрә гошулмуруг (Галатијалылара 6:10; 2 Коринфлиләрә 6:14). Лакин инсанларын дин сечиминә һөрмәтлә јанашырыг (Ромалылара 14:12).

Һаггымызда даһа чох өјрәнмәк истәјирсинизсә, сајтымыза дахил олун, јахуд филиалларымыздан биринә мүраҹиәт един. Бундан башга, сизә јахын олан ибадәт евимизә ҝәләрәк јығынҹагларымызда иштирак едә, һәмчинин әразиниздә јашајан бир Јеһованын Шаһиди илә сөһбәт едә биләрсиниз.