«İqlim dəyişikliyi fəlakət həddinə çatıb. Yer kürəsi həyat üçün yararsız hala düşmək üzrədir» («The Guardian»).

 Bəşəriyyət özünün törətdiyi böhranla üz-üzə gəlib. Əksər alimlər insan fəaliyyətinin qlobal istiləşməyə səbəb olduğu fikrində yekdildirlər. Temperaturun artması ucbatından iqlim artıq dəyişib və bu, böyük fəlakətlərə gətirib. Məsələn:

•   Anomal istilər, quraqlıq, qasırğaların sayı və intensivliyi artıb, bu isə öz növbəsində, daha çox daşqına və meşə yanğınlarına səbəb olur.

•   Buzlaqlar və Arktika buzları əriyir.

•   Dənizin səviyyəsi qalxır.

 İqlim böhranı heç bir ölkədən yan keçməyib. 193 ölkədə hökm sürən vəziyyət barədə «New York Times» qəzetində yazılmışdı: «Planet bizə fəlakət siqnalı göndərir». İqlim dəyişikliyi insan tələfatına və əzablara səbəb olur. Bu səbəbdən Ümumdünya Səhiyyə Təşkilatı onu «bəşəriyyətin sağlamlığı üçün ən böyük təhlükə» adlandırıb.

 Bununla belə, gələcəyə ümidlə baxmaq üçün əsaslı səbəbimiz var. Bu gün baş verən hadisələr Müqəddəs Kitabda peyğəmbərlik olunmuşdu. Orada həmçinin izah olunur ki, nəyə görə biz Allahın vəziyyətə müdaxilə edəcəyinə ümid edə bilərik və bizi qorumaq üçün O nə edəcək.

 Bəli. Qlobal istiləşmənin səbəb olduğu iqlim böhranı yaşadığımız dövr barədə Müqəddəs Kitabda deyilənlərə uyğun gəlir.

 Peyğəmbərlik. «Axırzamanda son dərəcə çətin bir vaxt gələcək. Çünki insanlar xudbin, pulpərəst... vəfasız... barışmaz... xain, tərs... olacaqlar» (2 Timutiyə 3:1—4).

 Müqəddəs Kitabda iqlim böhranının yaranmasına gətirən xüsusiyyətlər və davranış tərzi qabaqcadan peyğəmbərlik edilmişdi. Dövlətlər və böyük biznes sahibləri iqtisadi maraqlarını hər şeydən üstün tuturlar və gələcək nəslin hansı şəraitdə yaşayacağını heç düşünmürlər. Hətta əməkdaşlıq etməyə cəhd etsələr də, qlobal istiləşmənin qarşısını almaq üçün konkret tədbirlər görmək lazım gəldikdə, razılığa gələ bilmirlər.

 Bu peyğəmbərlikdən görünür ki, biz insanların davranışlarını kökündən dəyişəcəklərini və Yer kürəsini xilas edəcəklərini gözləməməliyik. Əksinə, Müqəddəs Kitabda deyilir ki, xudbin insanlar «get-gedə daha betər işlər görəcəklər» (2 Timutiyə 3:13).

 Müqəddəs Kitabda deyilir ki, Yehova a Allah Yer kürəsinə və onun sakinlərinə qarşı biganə deyil. Gəlin Allahın vəziyyətə müdaxilə edəcəyinə dəlalət edən üç ayəyə baxaq.

1.  1. Allah yeri «boş yerə deyil, yaşayış üçün [yaradıb]» (Əşiya 45:18).

    Allah yerə dair niyyətini həyata keçirəcək (Əşiya 55:11). O, yerin məhv olmasına və ya sakinsiz qalmasına yol verməyəcək.

2.  2. «Həlimlər yer üzünə sahib olacaq, əmin-amanlığın bolluğundan həzz alacaqlar. Salehlər yerə sahib olacaq, orada əbədi yaşayacaqlar» (Zəbur 37:11, 29).

    Allah vəd edir ki, insanlar yer üzündə sülh içində əbədiyyən yaşayacaqlar.

3.  3. «Pislərin isə kökü yer üzündən kəsiləcək» (Məsəllər 2:22).

    Allah, yeri məhv edənlər də daxil olmaqla, pis işlərindən əl çəkməyənlərin kökünü kəsəcəyini vəd edir.

 Allah yerə dair vədlərini necə yerinə yetirəcək? Öz Padşahlığı vasitəsilə. Allahın Padşahlığı bütün dünyanı idarə edəcək hökumətdir (Mətta 6:10). Bu Padşahlıq yeri göydən idarə edəcək. O, Yer kürəsi və ətraf mühit məsələlərində insan hökumətləri ilə danışıqlar aparmayacaq, çünki onların hamısını əvəz edəcək (Dənyal 2:44).

 Allahın Padşahlığı həm bəşəriyyət, həm də təbiət üçün böyük işlər görəcək (Zəbur 96:10—13). Görün Yehova Allah Padşahlığı vasitəsilə nələr edəcək.

•   Ətraf mühiti bərpa edəcək

   Müqəddəs Kitabda deyilir: «Səhra və quraq torpaq sevinəcək, düzlər şadlanacaq, zəfərantək çiçəklənəcək» (Əşiya 35:1).

   Bu nə deməkdir? Yehova bütün planeti, hətta insan fəaliyyətinin ciddi ziyan vurduğu yerləri belə bərpa edəcək.

•  Ekstremal hava şəraitini nəzarətdə saxlayacaq

   Müqəddəs Kitabda deyilir: «[Yehova] qasırğanı ram edir, dənizin dalğaları yatır» (Zəbur 107:29).

   Bu nə deməkdir? Yehova təbiət qüvvələrini idarə etmək gücünə malikdir. İnsanlar daha heç vaxt ekstremal hava şəraitindən əziyyət çəkməyəcəklər.

•   İnsanlara yerə düzgün qulluq etməyi öyrədəcək

   Müqəddəs Kitabda deyilir: «Səni öyrədəcəyəm, doğru yola yönəldəcəyəm» (Zəbur 32:8).

   Bu nə deməkdir? Yehova insanlara yerə qulluq etməyi tapşırmışdı (Yaradılış 1:28; 2:15). O bizə təbiətlə harmoniyada yaşamağı və yaratdıqlarının qayğısına qalmağı öyrədəcək.