PALAJAHAN 7
Apaké Kerajaan Tuhan Ento?
1. Apaké Kerajaan Tuhan Ento?
Apa alasané Yesus ané paling cocok dadi Raja?—MARKUS 1:40-42.
Kerajaan Tuhan ento pamréntahan ané ada di suargan. Ené lakar nganti pamréntahan manusané makejang tur lakar ngisinin Sabdan Tuhan di gumi lan di suargan. Ené orti luung buat iraga. Tusing makelo buin, Kerajaan Tuhan lakar dadi pamréntahan ané paling luunge buat manusané. Kayangé ento, lakar ada abesik pamréntahan ané mréntah manusa di guminé.—Baca Nabi Daniel 2:44; Matius 6:9, 10; 24:14.
Kerajaan kapréntah baan raja. Yehuwa suba milih Putrané, Yesus Kristus, dadi Raja di Kerajaan Tuhan.—Baca Wahyu 11:15.
2. Apa alasané Yesus ané paling cocok dadi Raja?
Yesus paling cocok dadi Raja krana ia jemet lan kukuh mélanin ané beneh. (Yohanes 1:14) Alasan ané lénan, ia ngelah kuasa nulungin manusané lan ia lakar mamréntah guminé uli suargan. Sasubané Yesus kabangkitang, ia menék ka suargan lan ngantiang di samping kenawan Tuhan. (Ibrani 10:12, 13) Akhirné, Tuhan ngemaang Yesus kuasa buat mréntah guminé.—Baca Nabi Daniel 7:13, 14.
3. Nyén ané lakar mamréntah marengin Yesus?
Kelompok ané kasebut ”para kaulan” ané kapilih, lakar mamréntah marengin Yesus di suargan. (Nabi Daniel 7:27) Ané kapilih malunan ento para murid Yesus ané satia. Nganti jani, Yehuwa enu milih anak eluh lan muani satia apang dadi para kaulan pilihané ento. Patuh cara Yesus, ipun lakar kabangkitang ka suargan maraga rohani.—Baca Yohanes 14:1-3; 1 Korintus 15:42-44.
Ajaké kuda ané lakar ka suargan? Yesus ngadanin ipun soroh ”abedik”. (Lukas 12:32) Liuné 144.000. Ipun lakar mréntah gumi marengin Yesus.—Baca Wahyu 14:1.
4. Lakar kénkén dadiné yén Yesus suba mamréntah?
Kerajaan Tuhan mamréntah sekat taun 1914. * Di pajumu pamréntahané, Yesus ngentungang I Setan lan pengikutné ané madan hantu-hantu ka guminé. I Setan gedeg, ia ngaé rusuh di guminé. (Wahyu 12:7-10, 12) Uli sekat ento idup manusané ngancan ngéwehang. Perang, kelaparan, grubug, lan linuh dadi ”ciri” yéning pamréntahan Idané enggal lakar nguasain guminé.—Baca Lukas 21:7, 10, 11, 31.
5. Apaja ané lakar asilanga tekén Kerajaan Tuhan?
Uli pegaé ngumumang orti luung kanti ka tanggun-tanggun guminé, Tuhan lakar munduhang kumpulan anak liu uli sabilang negari. Yutaan anak ané polos lakar dadi rakyat pamréntahan Yesus. Ipun lakar kalindungin kayangé Kerajaan Tuhan ngediang sistem ané ada di guminé jani. Sabilang anak ané dot ngalih kaslametan uli Kerajaan Tuhan patut malajah lan nuutin Yesus.—Baca Wahyu 7:9, 14, 16, 17.
1000 tiban makeloné, Kerajaan ento lakar nyalanang tetujon Tuhan tekén manusané. Guminé makejang lakar kaubah dadi pirdaus. Suba kéto, Yesus lakar buin nyerahang Kerajaané ento tekén Bapané. (1 Korintus 15:24-26) Nyén ané dot ortain ragané unduk Kerajaan Tuhan?—Baca Kidung 37:10, 11, 29.
^ par. 6 Katrangan tambahan unduk nubuat ané nunjukang taun 1914, ada di Catatan No. 22 buku Apa yang Bisa Kita Pelajari dari Alkitab? (ada di basa Indonesia).
