PALAJAHAN 6
Apaké Ada Harapan Buat Anak Ané Suba Mati?
1. Ada orti luung apa unduk anak mati?
Dugas Yesus neked di kota Betani, tusing joh uli Yerusalem, timpalné ané madan Lasarus suba mati petang dina. Yesus majalan ka kuburané Lasarus ajak Marta lan Maria nyama-nyamané Lasarus. Suba keto, liu ada anak lénan pada teka. Bisaké ragané mayangang amunapa liang kenehné Marta lan Maria dugas Yesus buin ngidupang Lasarus?—Baca Yohanes 11:21-24, 38-44.
Marta suba nawang orti luung unduk kebangkitan utawi harapan buat anak ané suba mati. Ia nawang yéning Yehuwa lakar ngidupang anak mati apang buin idup di guminé.—Baca Nabi Yesaya 26:19.
2. Kénkén keadaan anaké ané suba mati?
Tuhan ngorahang tekén Adam: ”Sawireh kita malakar aji tanah, ento krana kita lakar mabalik dadi tanah.”—PURWAKANING DADI 3:19.
Manusa gaéna uli tanah. (Purwakaning Dadi 2:7; 3:19) Manusa tusingja ngelah roh ané mapalasan tekén awakné, iraga ené manusa jasmani. Dadiné dugas manusa mati tusing ada bagiané ané enu idup. Otak iraga masih mati lan dadiné keneh iraga makejang ilang. Ento alasané, Lasarus tusing ada nyritaang apa ané alaminé dugas ia mati, krana anak mati tusing inget apa-apa.—Baca Kidung 146:4; Guru Pangajian 9:5, 6, 10.
Apaké Tuhan nyiksa manusané aji api dugas ia mati? Cakepan Suci ngajahang, yén anaké ané suba mati tusing inget apa-apa. Nyiksa anak mati di neraka ajahan ané tusing beneh, ento nganistain Tuhan. Ida tusing taén nundén umatné apang nyiksa pianakné nganggon api.—Baca Nabi Yeremia 7:31.
3. Bisaké anak ané mati ngomong ajak iraga?
Anak mati tusing bisa ngomong utawi ningeh. (Kidung 115:17) Kéwala, ada malékat ané jaat nyaru-nyaru ngomong dadi anaké ané suba mati ento. (Yudas 6) Yehuwa mréntahang iraga apang tusing nyobak-nyobak ngomong ajak anak mati.—Baca Pangeling-eling 18:10, 11.
4. Nyénké ané lakar buin idup?
Yutaan manusa ané suba mati lakar buin idupanga di guminé. Anak ané solahné jelé ulian tondén taén malajah Cakepan Suci, masih lakar kaidupang.—Baca Lukas 23:43; Pamargin Parautusan 24:15.
Manusa ané suba kaidupang, lakar maan kesempatan malajah kasujatian lan nunjukang kapracayané. (Wahyu 20:11-13) Ané nyak malaksana luung, ia lakar idup di guminé seterusné.—Baca Yohanes 5:28, 29.
5. Sipat apa ané bisa iraga plajahin uli Yehuwa unduk kebangkitan?
Kebangkitan bisa ada ulian Tuhan ngutus Yesus kanti mati buat iraga. Ené nunjukang amunapa dalém rasa sayang Yehuwa ané tusing pantes katrima. Yén suba teka masané anak ané suba mati buin idup, nyénké ané lakar kealih malunan?—Baca Yohanes 3:16; Roma 6:23.
