Ba nkal le mut a nlédés ngéda a nkwo a telbak. I mbéda ngandak ngéda inyu hôlôs i lem i. Kiki man woñ a nla bé nigil liké ibabé i kwo; hala ki nyen a nla bé ki to tôôs niñ yé ibabé nye i baage ngim mangéda.

Ngim boñge i yé i nsomol ngéda i mbaage, ngéda i mboma ngolba tole ngeñ ba nti bo maéba. Ndi boñge bape ba yé ba somol tjagda. Jon i mbéda le ba nôgha bo le:

• Ngim mam i yé le di nla bé boñ ngi dihôha.​—Yakôbô 3:2.

• Mut nye ki nye a ta bé le a keñgle mandutu.​—Ñañal 9:11.

• Mañge a nla bé nigil ibale ba nkodol bé nye.​—Bingéngén 9:9.

Ibale mañge a nlédés, a ga yémbél manoodana.

Ngéda man woñ a nhôs.

LITIÑ LI BIBEL: “Mut a téé sép a nkwo makwona masaambok, ndi a telep ki.”​—Bingéngén 24:16.

Hôla man woñ i yi kii a ga boñ i niñ yé. Kiki hihéga, ibale a nkwo makégse, a ga boñ lelaa? A nla somol a kalak le: “Me nwaa!”

Inyu hôla man woñ i lédés, ti nye makeñge. Ha nyen a ga kôhna ngui i kolba manoodana iloole a ke mo ngwéé.

I nlélém ngéda, yi le we bé nyen w’a mélés ndutu yé, hôla nye i mélés yo nyemede. U nla bat nye le: “Kii u nla boñ inyu tibil nok i jam lini u yé nigil?”

Ngéda man woñ a mboma mandutu.

LITIÑ LI BIBEL: “Ndi bé ni nyi bé mam ma yani.”​—Yakôbô 4:14.

Mam ma nla puhe bés. I mut a yé ngwañ len, a nla kwo liyep yani; mut a nla ba mbôô len, yani a kwo kon. Bibel i nkal le: “Pééna ngwéé i tane bé inyu bikwele bi bôt, to gwét inyu mimpémba mi bôt . . . ndi ngéda ni mpuhge ngéda ba mpémél bôt bobasôna.”​—Ñañal 9:11.

Lakii u yé ngwal, u nlama ndik yoñ bitelbene bi bi mbéda inyu sôñ man woñ. Ndi yi le w’a la bé sôñ man woñ ikété mandutu momasôna.

 I pot maliga, i nla pam le man woñ a mpamnaga bé nwii inyu i yi mandutu mut a nok ngéda a nimis bôlô tole ngéda moni a mal. Ndi u nla ya hôla nye i kolba mandutu mape kiki bo nyemb i liwanda jé tole nyemb i mut nan lihaa. *

Ngéda ba nti nye maéba.

LITIÑ LI BIBEL: “Emble . . . maéba, le ndi u bana pék nwii nwoñ mi nsôk.”​—Bingéngén 19:20.

Maéba ma ta bé nyayak; ndi ma nlama hôla man woñ i lémés libak jé.

Ngéda u nhôla man woñ i neebe bikodlene, hala a ga bahle bé bo iba. Isañ mbai nu ba nsébél John, a nkal le: “Ibale u ntop bé le bon boñ ba kodlana inyu dihôha tjap, ba ga kida ditégéé. Ba ga ba ba mboñ ndigi mam mabe ni mam mabe, hala nyen w’a nimis ngéda yoñ yosôna i sañgal mindañ dihôha tjap di nlona. Hala a nôgha bagwal ni bon bap ndutu.”

Lelaa u nla hôla man woñ i neebe le ba kodol nye? Ngéda ba nkodol nye​—to i suklu to homa numpe​—u pala bañ kal le bikodlene bi, bi kôli bé. Ndi, u nla bat nye le:

• “Baa u nhoñol le ba nkodol we yañga?”

• “Kii u yé le u lémés mu libak joñ?”

• “Ibale jam li, li ntiimba pémél we, w’a boñ laa?”

Yi le bikodlene bi yé nseñ ngandak inyu man woñ, he nano ndik bé ndi yak mu dilo di nlo.