I yigil i ntagbe, di mpôdôl yimbne Yésu a bi ti. I yimbne i i nkwés bés nkaa le Ane Djob i bi tééba nyoo ngii, ni le Yésu nyen a yé Kiñe i Ane i.

Bibel i nkal le ngéda Yésu a bi bôdôl énél, a bi leñ Satan ni mimbuu nwé mimbe hana ’isi. Ibôdôl i nwii 1914, mam ma mbep ndigi bep ni bep inyule Satan ni mimbuu nwé mimbe ba bi léña hana ’isi.​—Masoola 12:7, 9.

Tolakii mam ma nkônde ndigi bep ikété nkoñ ’isi, Kiñe i Ane Djob le Yésu a bi boñ ngandak mam inyu hôla bôt ba binam. Ngandak bôt i nigil i bii matiñ ma Bibel i bisélél ikété niñ yap, ni njel nson ñañ nlam u Ane u Yésu a ñéga. (Yésaya 2:2-4) Didun di bôt di bi nigil i bana litehge lilam inyu bôlô, inyu niñ i ndap lihaa, ni inyu bigwel moo ibabé le ba yila minkol mi gwom bi. Biniigana Bibel i nti, bi yéne bo nseñ ibôdôl nano, bi nhôla ki bo i yila mintén mi bôt mi mi ga ba isi Ane Djob.

Tolakii Yésu a mbôdôl ane nyoo i ngii, bôt ba binam ba ngi kenek ni bisu i ane hana ’isi. Ndi Djob a bi ti Yésu oda le: “An-ge ngembe babala boñ!” (Tjémbi 110:2) Ndék ngéda, Yésu a ga tjé bakolba Ane Djob, a péyés i bet ba nlémél Djob.

Ha ngéda i, Ane Djob i ga:

• Tjé kwéha base hies. Bibase bi bi bi niiga bôt bitembee inyu Djob bi nôgha ki bo njôghe, bi ga tjiba. Bibel i nhégha kwéha base ni muda libambe. Tjiba yé i ga hélés ngandak bôt.​—Masoola 17:15, 16.

• Mélés énél i bôt ba binam. Ane Djob i ga yoñ bitelbene inyu mélés énél i bôt ba binam.​—Masoola 19:15, 17, 18.

• Tjé bibéba bi bôt. Kii i ga pémél i bôt ba nai ndik le ba mboñ béba, ni ba ba ntjél nôgôl Djob? “Ndi bibéba bi bôt gw’a kida mu loñ, yak bôt ba nliba b’a nuba mu.”​—Bingéngén 2:22.

• Tjé Satan ni mimbuu mimbe. Satan ni mimbuu mimbe ba ga la ha bé ‘yumus biloñ.’​—Masoola 20:3, 10.

Kii hala a nkobla inyu i bet ba neebe Ane Djob?

Kiki Kiñe nyoo i ngii, Yésu a ga boñ mam ñane numpe a mah ngi boñ. 144 000 bikiñe bi Djob a bi tep hana ’isi bi ga ke i ngii inyu hôla Yésu mu nson wé. (Masoola 5:9, 10; 14:1, 3) A ga boñ le sômbôl i Djob i bôña hana ’isi. Kii Ane Djob i ga boñ inyu bôt ba binam? Ane Djob i ga:

• Mélés makon ni nyemb. “Mut nye ki nye a nyééne mu nkoñ u a’ kal bé le: ‘Me nkon,’” yak “nyemb y’a ba ha bé.”​—Yésaya 33:24; Masoola 21:4.

• Lona bañga nsañ ni nwee. “Yéhôva nyemede a’ niiga bon boñ bobasôna; nsañ u bon boñ w’a ba nkeñi,” ni ki le “b’a yén ’isi, hi mut isi nkôô wé wai, ni isi e yé faigé. Mut nye ki nye a’ sôha bé bo miñem.”​—Yésaya 54:13; Mika 4:4.

• Ti bôt bôlô i i nkônha bo maséé. “Mintebek nwem mi bôt ki nw’a togbene minson mi moo map ntandaa ngéda. B’a kéba bé ni nson mbelek.”​—Yésaya 65:22, 23.

• Pubus hisi. “Ñoñ ni biték binumnga gw’a séé, mbamba mbok w’a hak, u too ki wengoñle lilañ.”​—Yésaya 35:1.

• Niiga bôt i yom ba nlama boñ inyu niñ i boga ni boga. “I jam lini jon li nkena i niñ boga, le ba pam i yi we, bañga mpom Nyambe wada, ni nu u bi ep le Yésu Kristô.”​—Yôhanes 17:3.

Djob a gwé ngôñ le u kôhna bisai bi. (Yésaya 48:18) Yigil i noñ, i ga toñol kii u nla boñ inyu kôhna bilôl bilam bi.