NSIK u bé nseñ ngandak i nlômbi Israel. Bibel i mbéna pôdôl bôt ba bé kôt bikôkôda, ba tôbôk tjémbi. Yom kiki bo jôm li bikaat bi Bibel li yé tjémbi, kiki hihéga kaat i Tjémbi, Hiémbi hi Salômô ni Minlénd mi Yérémia, bi bi tilba inyu tuba. Kaat yada i i mpôdôl niñ i nlômbi Israel i nkal le: “Bibel i ñunda loñge le nsik u bé nseñ ngandak i niñ i bon ba Israel.”

Nsik i niñ i hiki kel. Bon ba Israel ba bé kôt bikôkôda, ba tôbôk tjémbi inyu unda i yom ba bé nôgda. (Yésaya 30:29) Bôda ba bé tuk dingoma, ba tôbôk tjémbi ni maséé, ba sagak i ngéda ba bé téé kiñe, i mangand, tole i ngéda bisônda bi bé bi yémbél gwét. (Bakéés 11:34; 1 Samuel 18:​6, 7; 1 Bikiñe 1:​39, 40) Bon ba Israel ba bé tôp tjémbi yak i ngéda ndutu i bé i kwél bo, kiki bo i ngéda mut a nwo. (2 Miñañ 35:25) Ibabé pééna bon ba Israel ba bé gwés nsik ngandak.

Nsik i yale i kiñe. Bikiñe bi Israel bi bé gwés bi ñemble nsik. Kiñe Saulô a bi sébél David i yale yé inyu kôt nsik. (1 Samuel 16:​18, 23) I mbus, i ngéda David a bi yila kiñe, nyemede a bi bañ bikôkôda, a tila tjémbi dilam, a tjek yak ntôñ u bakôt nsik inyu témpel i Yéhôva. (2 Miñañ 7:6; Amôs 6:5) Bôlôm ni bôda ba bé tubul Kiñe Salômô tjémbi i yale yé.​—Ñañal 2:8.

Nsik ikété bibégés. Bon ba Israel ba bé gwélél nsik inyu bégés Yéhôva. I maliga, 4 000 di bôt di bé tôp tjémbi i témpel i Yérusalem. (1 Miñañ 23:5) Ba bé kôt bibende bi mamuna, bikôkôda bi manganda, diluñ, ba hemek sép. (2 Miñañ 5:12) Ndi batuk nsik bana botama bé bon ba bé bégés Yéhôva ni nsik. Ngandak bon ba Israel i bé tôp tjémbi i ngéda i bé ke i Yérusalem i ngéda mangand, ba bé sébél i tjémbi di le tjémbi di mabet. (Tjémbi 120-134) Inoñnaga ni miñañ mi Lôk Yuda, bon ba Israel ba bé tôp ngim tjémbi a i ngand i Pasa.

Nsik u ngi yii nseñ ngandak inyu bagwélél ba Yéhôva i len ini. (Yakôbô 5:13) Nsik u yé pes yada mu bibégés di nti Yéhôva. (Éfésô 5:19) I ngéda di ntôp tjémbi ntôñ, di nôgda toi le adna i yé ipôla yés. (Kôlôsé 3:16) Hala a nlédés bés i ngéda di mboma mandutu. (Minson mi baôma 16:25) Nsik u yé njel i nlôôha ilam inyu unda Yéhôva hémle yés ni gwéha yés.