LISA a a nkal le: “Loñgeñem i lôk kéé i bôda ni i bôlôm yon i bi lôôha tihba me.” Jam li bisu li bi lémél nye i ngéda a bi boma Mbôgi Yéhôva jo li. Yak Anne a bi tehe jam li. A nkal le: “Loñgeñem yap i bi tihba me ngandak iloo biniigana.” Bisita bini gwobiba bi ngwés bi añ Bibel bi ôdôk pék mu. Ndi loñgeñem i lôk kéé yon i bi lôôha tihba bo.

Lelaa di nla unda bôt loñgeñem? Di béñge manjel ima: Bibuk gwés ni maboñok més. Di ga tehe ki bonjee di nlama unda loñgeñem.

Kaat Bingéngén pes 31 i ñunda le bañga muda i ñunda “loñgeñem” ni bipôdôl bi bi mpam nye i nyo. (Bingéngén 31:26) Loñgeñem i nene mu bibuk a mpot, ni mu i kiñ yé hop. Yak basañ mbai ba nlama pot ni loñgeñem. Ngandak bagwal i nyi le i ngéda ba mbep pôdôs bon bap hala a nla tééñga bo. Ibale bagwal ba mbéna nyai, bon bap ba yé le ba tjél emble bo. Jon ibale bagwal ba nsômbôl le bon bap ba emble bo, ba nlama jo sañ le ba pôdôs bo ni loñgeñem.

Too di yé bagwal, too di ta bé lelaa di yé le di unda bôt loñgeñem ni bibuk gwés? Bibel i ntimbhe i mbadga i bibôdle bi kaat Bingéngén 31:26, i nkal le: “A nyibil nyo ni pék.” Hala a nkobla le di nlama tibil pohol bibuk gwés, yak kiñ yés hop i nlama ba ilam. Hiki ngéda di nsômbôl pot, di nla badba le: ‘Baa i yom me nsômbôl pot i ga unbaha bôt tole i ga kônha bo maséé?’ (Bingéngén 15:1) I yé loñge le di ôt pék i nwaa di mpot.

Nlôñ u Bibel umpe i kaat Bingéngén u nkal le: “Mut wada a mpot bipopoda kiki pansoñ i mbabaa.” (Bingéngén 12:18) I ngéda di nyoñ ngéda i ôt pék mu bibuk di nsômbôl gwélél ni kiñ yés hop, ha nyen d’a la pôdôs bôt loñge. Ibale di nsômbôl toi unda bôt “loñgeñem,” di ga pôdôs bé bo ni bibuk bibe. (Éfésô 4:31, 32) Di ga nwas mahoñol mabe ni bibuk bibe, di gwélél bibuk bilam ni kiñ hop i kôli. Yéhôva a bi éba bés ndémbél mu i jam li i ngéda a bé pôdôs Élia nu a bé kon woñi. Añgel Yéhôva a bi ep i bi pôdôs nye ni “himagaa hi kiñ nwee.” (1 Bikiñe 19:12) Ndi i unda bôt loñgeñem i ta ndik bé i pôdôs bo loñge. Di nlama yak unda loñgeñem ni maboñok més. Lelaa?

Inyu nigle Yéhôva, di nlama unda loñgeñem ni bipôdôl gwés yak ni maboñok més. (Éfésô 4:32; 5:1, 2) Lisa nu di mbôk di pôdôl bibôdle a ntoñol lelaa Mbôgi Yéhôva i bi unda nye loñgeñem, a nkal le: “Ngim jam i bi boñ le di hoo nyodi i het di bé. Inyu hala nyen lôk kéé iba lôñni baa bap ba bi bat kunde i homa wap bôlô inyu lo i hôla bés i lôñôl masañgô. Ha i ngéda i me bé ngi to bôdôl nigil i Bibel!” I loñgeñem  lôk kéé i bi unda Lisa yon i bi tinde nye i bôdôl nigil Bibel.

Yak Anne nu di mbôk di pôdôl bibôdle, a bé maséé ngandak inyu loñgeñem Mbôgi Yéhôva i bi unda nye. A bi kal le: “Mam mabe ma nai munu nkoñ ’isi unu, jon me nkon woñi. Bun bé le me bôdôl mut ñem. Inyu hala nyen i ngeñ me bi boma Mbôgi Yéhôva, me bé kon bo woñi, me bé badba le ‘Umbe ntén gwéha unu laana?’ Ndi kiki me bi léba le i mankéé a bé niiga me Bibel a bééna toi loñgeñem, jon me bi bôdôl nye ñem.” Mam ma bi sôk lelaa? Anne a nkal le: “Ha nyen me bi kahal yoñ ngéda ni yigil yem i Bibel.”

Di yimbe le Lisa bona Anne ba bi bôdôl gwés yigil i Bibel inyule lôk kéé i bôlôm ni i bôda i bi unda bo loñgeñem. Hala a bi boñ le ba bôdôl Yéhôva ni bagwélél bé ñem.

Ngim bôt i mpôdôs bôt loñge, i yé ki minyaô inyule ba meya ba boñ hala. I ngéda di yé minyaô inyule di bi gwéé  hala, tole hala nyen ba bi néñés bé, hala a yé loñge jam. Di hala a nkobla bé le di ñunda loñgeñem kiki Yéhôva.​—Hégha ni Minson mi baôma 28:2.

Loñgeñem i i nlôl yak Yéhôva i yé mu litam li mbuu mpubi. (Galatia 5:22, 23) Jon, i mut a gwé loñgeñem a nwas le mbuu mpubi u éga nye. A nlama ki nigle Yéhôva bo Yésu. Bikristen bi nlama unda bôt bape loñgeñem. Jon di ngwés Yéhôva, di gwéhék mut wés libôk. Ibale di mboñ hala, ha nyen d’a unda toi bôt loñgeñem, Yéhôva a ga kônôl ki bés maséé.

Di yé le di hoo unda i bôt ba mbôñôl bés loñge ni bôt di nyi loñgeñem. (2 Samuel 2:6) Di yé le di ti bo mayéga. (Kôlôsé 3:15) Ndi di ga boñ lelaa ibale di nhoñol le mut a kôli bé le di unda nye loñgeñem?

Yéhôva nyen a yé mut bisu i unda konangoo i mbuma ñañ, Bibel i nkal ki le yak bés di nlama unda i len ilam i. Bitilna bi Grikia bi ngwélél i buk ini le “konangoo i mbuma ñañ” ngandak ngélé. Lelaa Nyambe a ñéba bés loñgeñem?

Di hoñol le didun di bôt Nyambe a ñunda loñgeñem, a tinak bo kii yosôna i mbéda bo. (Matéô 5:45) Ilole di nyi Yéhôva, a bi bôk a unda bés loñgeñem. (Éfésô 2:4, 5, 8) Kiki hihéga, a bi ti pom yé Man sesema inyu bôt ba binam bobasôna. Ñôma Paul a bi kal le Yéhôva a bi ti binoñ “inoñnaga ni ligwañ li konangoo yé i mbuma ñañ.” (Éfésô 1:7) Ni le tolakii di mboñ béba, di ñunbaha ki Yéhôva, a nke ni bisu i éga bés ni i niiga bés. Biniigana gwé bi yé kiki “hilônde.” (Ndiimba Mbén 32:2) Di ta bé le di timbhe nye loñgeñem a ñunda bés. Di nyi ki le ibale Yéhôva a unda bé bés loñgeñem, ki di gwé bé botñem yo ki yo.​—Hégha ni 1 Pétrô 1:13.

Loñgeñem i Yéhôva i nkônha bés maséé, i ntinde ki bés i unda bôt bape loñgeñem. Jon, di nlama bé todol bôt, di nigle Yéhôva, di unda bôt loñgeñem hiki kel. (1 Tésalônika 5:15) I ngéda di mbéna unda bôt loñgeñem, di yé kiki hié hi bôt ba nohop. Di nlédés bôt bés ba lihaa, lôk kéé yés, bôt bés ni bo di nsal, baudu bés ni bo di boñ suklu, ni bôt bés ba libôk.

Hoñol le ngim bôt mu lihaa joñ tole likoda joñ u yé le u unda loñgeñem ni bibuk gwoñ yak ni maboñok moñ. Bebek mut a yé mu likoda joñ nu a gwé ngôñ le u hôla nye i bôñgôl ndap yé, i sal i wom wé tole i kil nye i bôm. Yak i likalô, ibale u mboma mut nu a gwé ngôñ ni mahôla, u yé le u hôla nye ibale u nla.

Kiki Yéhôva, di kee ni bisu i unda bôt “loñgeñem” ni bibuk gwés yak ni maboñok més.