KIKI di niñ i béba nkoñ isi unu, i mbéda bés biliya bi ngui inyu bana nsañ. Ndi to ngéda di gwé ndék nsañ, di nlama jo inyu tééda wo. Kii Bañga Djob i nkal i i nla hôla bés i léba bañga nsañ, ni u u nom? Lelaa di nla hôla bôt bape i boñ nlélém?

Inyu bana bañga nsañ, di nlama nôgda le di yé nwee, le yom yo ki yo i nkônha bé bés woñi. Di nlama ki bana maada malam ni bôt bape. Jam li nlôôha nseñ inyu yéñ nsañ u nom, li yé le di nlama ba liwanda li Djob. Lelaa di nla pam i boñ hala?

Ngéda di nôgôl mambén ni matiñ ma téé sép ma Yéhôva, di ñunda le di mbôdôl nye ñem ni le di gwé ngôñ i bana maada ma nsañ ni nye. (Yérémia 17:7, 8; Yakôbô 2:22, 23) Ha nyen yak nye a ga kôôge bés bebee, a sayap ki bés ni ñem nwee (nsañ u kété kété). Kaat Yésaya 32:17 i nkal le: “Ndi telepsép y’a gwal nsañ, litam li telepsép ki l’a ba ñemlima; n’a yugyene ki me nyuu mba ni mba.” Di nla léba ñem nwee ngéda di nôgôl Yéhôva ni ñem wés wonsôna.​—Yésaya 48:18, 19.

Di nkôhna ki mahôla inyu hôlôs nsañ u u nom ni njel likébla li mbuma ñañ li li nlôl bés ni Tata wés Nungingii​—le mbuu mpubi wé.​—Minson mi baôma 9:31.

Ñôma Paul a bi sima nsañ kiki lem i yônôs aa i “litam li mbuu.” (Galatia 5:22, 23) Kiki bañga nsañ i nlôl ni mbuu mpubi, di nlama suhus bésbomede i si ngui mbuu  mpubi inyu hôlôs lem i. Di béñge manjel ima ma ma ñunda lelaa mbuu Djob u nla hôla bés i léba nsañ.

Pog, mbuu Djob u nhôla bés ngéda di nsoñgol Bañga Djob hiki ngéda. (Tjémbi 1:2, 3) Ngéda di nsoñda nwin u mpémél Bibel, mbuu Djob u nhôla bés i nok kii i yé sômbôl Djob inyu ngandak mam. Kiki hihéga, mu nyen di ntehe lelaa a ntééda libak li nsañ, ni inyuki nsañ u nlôôha ba nseñ inyu yé. Ngeñ di noñ biniigana bi Bibel bi, di nôgda nsañ i nya i nlôôha i niñ yés.​—Bingéngén 3:1, 2.

Iba, di nlama soohe inyu kôhna mbuu mpubi. (Lukas 11:13) Yéhôva a mbôn le ibale di mbat nye mahôla, “nsañ Nyambe u u nloo mahoñol momasôna w’a tat miñem [nwés] ni mahoñol [més] i Kristô Yésu.” (Filipi 4:6, 7) Ngéda di mbéna soohe inyu kôhna mbuu Yéhôva, Djob a nyônôs bés ni ñem nwee, u a nti ndik ba ba yé mawanda mé.​—Rôma 15:13.

Lelaa bôt bahogi ba bi bii maéba ma bisélél, ba lona ki mahéñha ma bé béda inyu kôhna nsañ u u nom​—ipôla Yéhôva ni bo, ipôla bo ni bôt bape, ni bomede?

I len ini ikété likoda li bikristen, ba nléba bôt ba bé “nyai” behee, ndi nano ba yé bôt ba nyoñ ngéda ilole ba mboñ ngim jam, ba bak bôt ba liyômba, bôt ba hônba, ni bôt ba nsañ. * (Bingéngén 29:22) Di béñge lelaa jam li, li bi yon inyu batéé likalô iba, ba ba bé unup ngandak, i mbus ba kôs mahôla inyu yémbél hiun hiap, ni inyu nigil i niñ ikété nsañ ni bôt bape.

David a bé unda libak libe ikété bipôdôl gwé. Ilole a bé a nyoñ makidik i gwélél Djob, a bééna lem i yahal bôt bape, ni i sol yak bôt bé ba lihaa. Mbus ngéda, David a bi tehe nseñ i lona mahéñha i niñ yé inyu yila mut nsañ. Lelaa a bi pam i boñ hala? David a nkal le: “Me bi bôdôl bii matiñ ma Bibel i bisélél i niñ yem, kayéle lihaa jem li bi kahal ti me lipém.”

 Binéñél bi Rachel bi bi boñ le a bana lem i unup. A nkal le: “Letee ni i len ini, me ngi jok ni hiun, inyule me bi nañ i lihaa i het hiki mut a bé bep unup.” Kii i bi hôla nye i yila muda nsañ? A ntimbhe le: “Me bééna lem i bat Yéhôva mahôla ikété masoohe.”

David bo Rachel ba yé ndik ndémbél i bôt iba i i ñunda le ngéda di mbii matiñ ma Bibel bisélél, ndi di badak mahôla ma mbuu mpubi, di ga bana nsañ. Ntiik, tolakii di niñil i béba nkoñ isi unu, di nla bana ñem nwee u u nhôla bés i niñ ikété nsañ ni lihaa jés, yak ni lôk kéé yés i mbuu. Ñ, Yéhôva a nti bés makénd i yén “ni nsañ ni bôt bobasôna.” (Rôma 12:18) Baa hala a nla toi bôña, bimbe bisai di nkôs mu kii di mboñ biliya i yéñ nsañ?

Ni njel nson wés likalô, di naña bôt i ôt nseñ ni nwin wés u nsañ inyu Ane Djob. (Yésaya 9:6, 7; Matéô 24:14) Masoda le, ngandak i nleege wo. Jon ba niñ ha bé kiki bôt ba nhañ botñem, tole kiki bôt ba nyai ngéda ba ntehe mam ma mbôña ipañ yap. Maselna ni hala, ba gwé bañga botñem inyu bilôl, ba nke ki ni bisu i ‘yéñ nsañ ni i noñ wo.’​—Tjémbi 34:15.

Ndi bôt bobasôna bé bon ba nleege nwin u. (Yôhanes 3:19) Ndi to hala, mbuu Djob u nhôla bés i tééne bo likalô ikété nsañ ni lipém. Ngéda di mboñ hala, di noñ biniigana bi Yésu a bi ti i kaat Matéô 10:11-13 inyu likalô i het a kal le: “Kii ni njôp ndap, yégnana yo. Ndi ibale ndap i kôli, wee nsañ nan u ba mukété; ndi ibale i kôli bé, wee nsañ nan u témb i béni.” Ngéda di noñ maéba ma Yésu ma, di nla bagla ni bo ibabé i unup, to ibale ba ntjél emble bés, di ban-ga botñem le b’a la emble lisañ lipe.

Di nla ki hôñôs nsañ ngéda di nti ngomin lipém​—yak bakolba nson wés. Kiki hihéga, bôt ba ngomin ba loñ Afrika yada ba bi tjél ti bés kunde maoñ inyule ba bé hémle bitembee bôt ba bé tôô inyu nson wés. Ni botñem le jam li li mal ikété nsañ, ba bi om mankéé wada nu a bi sal nyoo kiki nsañal i loñ ipe, i yuuga Ngomin yap ikeñi yada nu a bé sal i tison London, i loñ Ngisi. A bé lama toñle nye nson nlam Mbôgi Yéhôva i mboñ i loñ yé nyoo Afrika. Lelaa mayuuga ma, ma bi sôk?

“Ngéda me bi jôp i het ba nleege bôt, me nôgda le muda a bé sal ha a bé pot hilémb me nigil, inoñnaga ni mahabga mé. Me bi yéga nye ni hop wé ligwéé. A bi hel ngandak, a bat me le: ‘Kii i nlona we?’ Me timbhe nye ni lipém le, me nsômbôl tehe Ngomin keñi. A bi sébél Ngomin i téléfôn, ha nyen nyemede a bi lo i boma me, a yéga me ni hop wap. Mbus hala, a bi tibil emble mam me bééna i kal nye mu nson nlam Mbôgi Yéhôva i mboñ i loñ yé.”

Ndoñi mankéé a bi ti nye ni lipém i bi héya béba liteghe ni mahoñol mabe i Ngomin keñi ini a bééna inyu nson wés. Ndék ngéda mbus, ngomin i loñ Afrika i, a bi ti bés kunde maoñ. Kinje maséé lôk kéé yés i bi nok inyu lisuk lilam! Ntiik, i ti bôt bape lipém, i nlona ngandak bisai​—kiki bo nsañ.

I len ini, bagwélél ba Yéhôva ba nok lingoñoo ikété paradis i mbuu, nyonok ni nsañ. Nsañ ni gwé u ga kônde keñep mu kii ni mboñ biliya inyu hôlôs lem lam i litam li mbuu i, i niñ nan. Jam li nlôôha nseñ li yé le, ni ga kônha Yéhôva maséé, ni ga bana ki nsañ u nlôôha, i boga ni boga i mbok yondo.​—2 Pétrô 3:13, 14.