I yi gwélél moni
Matiñ ma Bibel ma bi hôla bôt i waa tôñ ngandak inyu mam ma moni.
BANA LOÑGE NTJEGA
LITIÑ LI BIBEL: “Mahoñol ma mut nu a nyamnda ma nyamp nyambak, ndi hi mut a mpabla, gwom bi nsôk héñél nye.”—Bingéngén 21:5.
KII HALA A NKOBLA: Tibil tjek mam moñ, u boñ ki biliya i yônôs mo. Jon, boñ ndugi ntjega ilole u mpémés moni. U hôya bañ le, u nla bé somb mam momasôna u gwé ngôñ. Jon gwélél moni nwoñ ni pék.
YOM U NLA BOÑ:
-
Tibil noñ ntjega woñ moni. Tila mam momasôna u nlama somb kiki bo bijek, mambot tole saa ndap. I mbus, kit moni nwañen u nlama pémés inyu hiki jam. Ibale u ntehe le u nlama pémés moni iloo kiki u nkit inyu ngim jam, yoñ ndék moni mu moni u bi tééda inyu mam mape. Kiki hihéga, ibale u mpémés moni inyu belesin bi matôwa iloo kiki i nsômbla, u nla gwélél moni u ntjek inyu ke i restaurant.
-
U yoñ bañ mapil yañga. Boñ kii yosôna u nla inyu keñgle mapil. Ndi tééda moni nwoñ inyu somb mam u gwé ngôñ. Ibale u yoñ pil ni njel carte bancaire, boñ biliya le u saa pil woñ ilole lisuk li sôñ li nkola, tiga le pil woñ u keñep. Ibale u gwé mapil, téé ngim ngéda inyu saa mo, u boñ ki hala.
Nyiña wada u ñunda le i ngéda mut a ngwélél carte bancaire, a yé a pémés moni ngandak. Ibale u ngwélél carte bancaire, gwélél yo ni pék.
KEÑGLE BILEM BIBE
LITIÑ LI BIBEL: “Nyeyeñgi a ntop bé sal ’isi ngéda lihep, a’ yéñ bijek ngéda libumbul, ndi a bana bé yom.”—Bingéngén 20:4.
KII HALA A NKOBLA: Nwet a nyeñgep, a nla bé bana moni. Jon, gwés bôlô, u gwéélak moni nwoñ ni pék kayéle u la niñ i dilo di nlo.
YOM U NLA BOÑ:
-
Sal ni ngui. Gwés bôlô yoñ kayéle u la tééda yo. Yak baéga bôlô ba ngwés i nya bôt i.
-
Ba maliga. U nibil bañ nwet woñ bôlô. Ibale u yé malôga, i ga bane we ndutu i léba bôlô ipe inyule u ga ôbôs jôl joñ.
-
U hép bañ nkus. Hép nkus u nla ôbôs maada moñ ni bôt bape, yak ni mbôô woñ. Bigda le mam mape ma yé nseñ iloo moni.
MATIÑ MA BIBEL MAPE
U nla añ Bibel ni njel internet, ikété ngandak dilémb i jw.org
U LEP BAÑ NGÉDA YOÑ NI MONI NWOÑ INYU MAM MABE.
“Inyule mut lihiua ni mbéna je b’a kwo liyep, hilo hi ga eñk mut bipéda bi mbot.”—BINGÉNGÉN 23:21.
U TÔÑ BAÑ ILOO HÉGA INYU MAM MA MONI.
“Ni tôñ bañ inyu nom nan, inyu yom n’a je, to inyu yom n’a nyo; to inyu manyuu manan le n’a haba kii.”—MATÉÔ 6:25.
KEÑGLE HÉP YOSÔNA.
“Mut hibañ a nhép ni nkus, a nyi bé le njelel yon y’a pémél nye.”—BINGÉNGÉN 28:22.
