Bésbobasôna di mboñ bé mam nlélém, jon i nla pam le ibale mut numpe a mboñ bé jam kiki bés, di nla hoñol le wee a nhôs tole a mboñ bé jo loñge. Di hoñol ki le, bésbotama ndik bon di nyi lelaa ba mboñ ngim jam. Ibale di mbôdôl bana i nya ntén mahoñol mabe i inyu bôt bape, y’a yila bés ndutu i nôgda i yom bôt bape ba nôgda. Ibale di gwé bé lem i nôgda i yom bôt bape ba nôgda, bebek hala a ñunda le kon u sôli bés ikété: Di ntodol bôt bape.

“Kona maséé lôñni ba ba nkon maséé; ni ee ki lôñni ba ba ñee.” ​—RÔMA 12:15.

Kii hala a nkobla? I sem kwep, Bibel i nsômbôl kal le di nôgda i yom bôt bape ba nôgda. I lem i, i mboñ le u yoñ libak li mut numpe, u yoñ ndutu yé kiki ndutu yoñ.

Ngéda di nyoñ ndutu i mut numpe kiki ndutu yés, di nsôk tehe le, di ta bé maselna kiki di hoñlak. Di nsôk nok le, i munlôm nu, tole i muda nu yak nye a gwé ñem, a nôgda mam nlélém kiki bés, a ntehe ki mam nlélém kiki bés. I ngéda di nôgda i yom bôt bape ba nôgda, di nsôk tehe le, too mut a nlôl hee, too mut a gwé imbe kôgôô, bésbobasôna di yé ndik mut wada. Ibale di mboñ biliya i béñge mam bôt bape ba mboñ nlélém kiki bés, di nsôk tehe le, di mpôna, d’a bana ha bé to ngôñ i kéés bo.

I nôgda i yom bôt bape ba nôgda, y’a hôla bés le di ti bo lipém. Anne-Marie, nu a niñ i loñ Sénégal a bé yan bôt ba ngim litén mu loñ yé. A ntoñol lelaa i nôgda i yom bôt bape ba nôgda i bi hôla nye, a nkal le: “I ngéda me bé tehe i mam mabe ma bé pémél i bôt ba, me bé badba le: ‘Ibale men i mam mabe ma, ma pémél ki me nôgda lelaa?’ Hala a bi boñ me le, me bôdôl badba le, inyuki me nyan i bôt ba, ki le me bé nyen me bi pohol i gwééne mu litén jem, to saa, me bi saa bé to.” Maliga ma yé le, ibale di nyoñ ndutu i mut numpe kiki ndutu yés, hala a ga hôla bés le, di nôgda i yom a nôgda, d’a kéés bé nye, to yan nye.

Ibale u ntodol ngim mut, tole ngim litén, iloole u béñge ndik i mam ma mboñ le ni ba maselna, béñge i mam ma nla at bé. Kiki hihéga, noode le hégda i yom ba nôgda:

• I ngéda ba njéla ni bôt bap ba lihaa

• I ngéda ba mélés bôlô i ngui ba salak

• I ngéda ba yé ni mawanda map

• I ngéda ba ñemble nsik u nlémél bo

Nano, boñ wengoñle, wen u yé i kôhna i mam di ntip sima. Badba le:

• ‘Kii me yé le me nôgda ibale mut a nyan me?’

• ‘Kii me yé le me nôgda ibale bôt bape ba nkéés me, bo ngi yi me?’

• ‘Ibale men me gwéé mu litén li, ki me ngwés le bôt bape ba yoñ laa me?’