Inyu boñ maselna ipôla bet ba ngwélél Djob ni bet ba ngwélél bé nye, Bibel i nkal le: “N’a yil bo i matam map. Baa bôt ba nket matam ma nkôô wai i biloo, tole matam ma faigé i mbônji biloo?” (Matéô 7:16) Nlélém kiki mut a nla boñ maselna ipôla e faigé ni mbônji biloo ngéda a béñge matam map, hala nyen u nla boñ maselna ipôla bañga base ni kwéha base ngéda u béñge matam map.

1.   Bañga base i nyôñôl ndik biniigana gwé ikété Bibel, he bé i mahoñol ma bôt ba binam. (Yôhanes 4:24; 17:17) Kiki hihéga, Bibel i niiga toi kii i ntagbe i mbus nyemb, ni botñem i niñ i boga ni boga i paradis hana ’isi. (Tjémbi 37:29; Yésaya 35:5, 6; Ézékiel 18:4) Bañga base i nkoñ bé woñi i yelel bitembee bi kwéha base.​—Matéô 15:9; 23:27, 28.

2.   Bañga base i nhôla bôt i yi Djob, i niigaga bo jôl jé, le Yéhôva. (Tjémbi 83:18, MN; Yésaya 42:8; Yôhanes 17:3, 6) I niiga bé le Djob a yé haa ni bés; maselna ni hala i ñunda bés le Djob a gwé ngôñ le di yila liwanda jé.​—Yakôbô 4:8.

3.   Bañga base i nyelel tel ikeñi i Yésu Kristô, le nyen a yé njel Djob a ngwélél inyu tohol bôt. (Minson m baôma 4:10, 12) I bôt ba yé mu, ba nôgôl Yésu, ba boñok biliya bi ngui i noñ ndémbél yé.​—Yôhanes 13:15; 15:14.

4.   Bañga base i niiga le Ane Djob yotama yon i nla mélés mandutu ma nkoñ ’isi. I bet ba yé mu, ba ñañal ñañ nlam u Ane Djob ni makénd.​—Matéô 10:7; 24:14.

5.   Bañga base i niiga bañga gwéha. (Yôhanes 13:35) I niiga le di nlama ti bôt bobasôna lipém, di leegege bo, ibabé béñge het ba nlôl, kôgôô yap i nyuu, bilem gwap bi loñ, to hop wap. (Minson mi baôma 10:34, 35) I bôt ba noñ bañga base, gwéha i mboñ bo le ba yoñ bañ ngaba i gwét gwo ki gwo.​—Mika 4:3; 1 Yôhanes 3:11, 12.

6.   I bet ba nyoñ ño mu bañga base ba bééga bé mbôm bitel, ba nkôs bé to nsaa.​—Matéô 23:8-12; 1 Pétrô 5:2, 3.

7.   Bañga base i nyoñ bé ngaba i mam ma m’bô. (Yôhanes 17:16; 18:36) Hala a nkéñ bé le i bôt ba yé mu ba nôgôl bangomin ba loñ, i het ba niñil, inoñnaga ni ini oda i Bibel: “Timbhana ni Kaisa mam ma Kaisa [hala wee ngomin], Nyambe ki mam ma Nyambe.”​—Markô 12:17; Rôma 13:1, 2.

8.   Bañga base i ta bé jam li bihéñba, tole ndik i bitéé bi mis, heni. I bet ba yé ikété bañga base ba niñ inoñnaga ni matiñ ma Bibel, ba noñok mo ikété makas momasôna ma niñ yap. (Éfésô 5:3-5; 1 Yôhanes 3:18) Ba modop bé, ndi ba yé maséé inyule ba mbégés “Nyambe nu maséé.”​—1 Timôtéô 1:11.

9.   Ndék bôt ndik yon i yé ikété bañga base. (Matéô 7:13, 14) Bôt ba mbéna yahal bo ni tééñga bo, ndik inyule ba boñ nsômbôl i Djob.​—Matéô 5:10-12.

Bañga base i ta ndik bé le, ‘Men me mpohol base yem, i i nlémél me.’

 I ta bé loñge i pohol base ndik inyule i nlémél bés. Bibel i bi bôk pot le ngim ngéda i ga pam le bôt “ba ga yiñil bomede ngandak balét [ba bibase] inyu nyuñgul bo maôô.” (2 Timôtéô 4:3) Ndi maselna ni hala, Bibel i nti bés makénd i noñ “Ntén base u u yé mpubi, u u gwé bé to mahindi i liteghe li Nyambe ni Tata wés,” to ibale base i, ngandak bôt i ngwés bé yo.​—Yakôbô1:27, buk isi lipep; Yôhanes 15:18, 19.