SƆ̃ƆSIRU 7
Mba n Gusunɔn bandu?
1. Mba n sãa Gusunɔn Bandu?
Mban dera Yesu u sãa Sunɔ wi n weenɛ sa n mɔ?—MAAKU 1:40-42.
Gusunɔn Bandu ta sãawa bandu garu te ta wãa wɔllɔ. Ta koo bannu ni nu tie kpuro kɔsi kpa tu deri Gusunɔn kĩru tu koora wɔllu ka temɔ. Labaari Gusunɔn Bandu sɔɔ, ya wã. N sosi, Gusunɔn Bandu ta koo bandu geerun bukata ye tɔnu mɔ debiasia. Ta koo be ba wãa tem sɔɔ kpuro mεnna bu ko turo.—A Daniɛli 2:44; Mateu 6:9, 10; 24:14 gario.
N weenε bandu ta n sunɔ mɔ. Yehofa u win Bii, Yesu Kirisi, sua u ko Win Bandun Sunɔ.—A Kãsiru 11:15 gario.
A fideo ye ba mɔ̀ Mba n Gusunɔn bandu? mɛɛrio
2. Mban sɔ̃na Yesu u sãa Sunɔ wi n weenɛ sa n mɔ?
Gusunɔn Bii u sãawa Sunɔ wi n weenɛ sa n mɔ, yen sɔ̃ u wã ma u tãsi deedeeru sɔɔ. (Yohanu 1:14) Win dam maa tura u ka tɔmbu somi, domi u bandu dimɔ saa wɔllun di tem sɔɔ. Win sikurabun biru, u yɔɔwa wɔllɔ ma u sina u mara Yehofan nɔm geuɔ. (Heberu 10:12, 13) Men nɔru, Gusunɔ u wi dam kã u ka bandu dibu tore.—A Daniɛli 7:13, 14 gario.
3. Wara koo bandu di ka Yesu?
Yigbε te ba sokumɔ “tɔn dεεrobu” ta koo ka Yesu bandu di wɔllɔ. (Daniɛli 7:27) Tɔn dεεro gbiikobu be ba gɔsa ba sãawa Yesun gɔro naanεgibu. Sere ka tɛ̃, Yehofa u maa tɔn durɔ ka tɔn kurɔ naanεgibu gɔsimɔ nge dεεrobu. Nge Yesu, ba ra sikure ka wasi hundegii.—A Yohanu 14:1-3; 1 Korinti 15:42-44 gario.
Tɔmbu nyewa ba dɔɔ wɔllɔ? Yesu u be soka: “Yãa gɔ̃ɔ piibu.” (Luku 12:32) Mεn nɔru, ba koo ko nɔrɔbun suba wunaa weeru ka nnɛ (144 000). Ba koo ka Yesu bandu di saa wollun di tem sɔɔ.—A Kãsiru 14:1 gario.
4. Mba n koora sanam mε Yesu u bandu dibu torua?
Gusunɔn Bandu ta sɔmburu toruawa wɔ̃ɔ nɔrɔbu ka nɛnɛ ka wunɔbu ka wɔkura nnɛ (1914) sɔɔ. * Yesun sɔm gbiikiru nge Sunɔ raa sãawa u Setam ka win wεrεkunu kasa kɔ̃ma tem sɔɔ. Setam u mɔru bara ma u torua u yam kpuro burisinamɔ tem sɔɔ. (Kãsiru 12:7-10, 12) Saa dɔma ten di, tɔmbun gbee swãanu nu maa sosimɔ too too. Tabu, gɔ̃ɔnu, bara bakanu ka tem yĩiribu, ye kpuro yi sãawa yĩrerun baa te ta sɔ̃ɔsimɔ ma n tie fiiko Gusunɔn Ban te tu ka tem wunanɔsu nɔma bεri.—A Luku 21:7, 10, 11, 31 gario.
5. Sɔmbu terà Gusunɔn Bandu ta mɔ̀?
Waasu kobu tem gira kpuro sɔɔn di, Gusunɔn Bandu ta tɔn wɔrusu tem baamεren di mεnnamɔ kɔ, bu ko turo. Tɔn yakom yakom be ba tii kawe, ba gɔsiamɔ Yesun Ban ten tɔmbu. Gusunɔn Bandu ta koo be bere sanam mε ta koo handunia kɔ̃sa yeni kam koosia temɔ. Yen sɔ̃, be ba kĩ kpuro bu Gusunɔn Ban ten arufaani di, n weenε bu mεεri bu Yesu mεm nɔɔwa.—A Kãsiru 7:9, 14, 16, 17 gario.
Wɔ̃ɔ nɔrɔbun (1 000) saa sɔɔ, Ban te ta koo ko kpa Gusunɔn toren himba ye, yu koora tɔmbu sɔɔ. Tem gira kpuro mu koo n sãa alusanna. Mεn nɔru, Yesu u koo win Tundo Ban te wesia. (1 Korinti 15:24-26) A goo yɛ̃ wi a kĩ a Gusunɔn Bandun gari sɔ̃ ro?—A Womu 37:10, 11, 29 gario.
^ garin bɔnu 6 A n kĩ a tubu mɛsum ba ka wɔ̃ɔ 1914 ye wa, a tire te ba mɔ̀ Qu’enseigne réellement la Bible? ten damba 215-218 sɔɔ mεεrio.
