Saa ye i yεnun wãaru torua sannu, wahala dabina koo bεε deema. Ya koo kpĩ ya n sãa yèn sɔ̃ bεεn bwisikunu kun teenu, bεεn bwɛ̃ra kun tia, ǹ kun mɛ i ǹ wãaru mεεra ka nɔnu teu. N koo mam ko wahala yi na saa tɔɔwun di ǹ kun mε saa min di i ǹ yĩiyɔ.

Sɔrɔkudo i ǹ ko i n kĩ i gem wura, adama, Bibeli ya sun bwisi kɛ̃mɔ mɛ sa ko ka wahala yin wɛ̃ɛ nɔɔ wa. (Mateu 5:23, 24) À n ka Bibelin gee kpɛɛkpɛɛkugii sɔmburu mɔ̀, kaa swaa ye ya buram bo wa a ka wahala yi kamia.

YE BIBELI YA GERUMƆ: “Gãanu baanire ka nin saa . . . gari gerubu maa ka bin saa.” (Waasu Kowo 3:1, 7) I hania koowo i saa dendi i ka wahala ye wunana. A wunɛn kĩnasi tubusio gem gem mɛ n nun sãawe wunɛn bwɛ̃ra sɔɔ ka mɛ a gari yi bwisika. A n da baadomma wi a sue “gem sɔ̃”. (Efesu 4:25) Baa mɛ n kua mɛ n dera, a ku de a mɔru se à n kĩ a ka wunɛn kĩnasi sanna. A yaayo ma gari yi yi nukuru yɛmiasiamɔ yi ku ra ka sannɔ nɛ.—Mɔnnu 15:4; 26:20.

Baa mɛ i ka gari yi wunana ya kun ka nun naawɛ, a de a n nuku tia mɔ, a ku maa duari a wi a sue kĩru ka bɛɛrɛ sɔ̃ɔsi. (Kolose 4:6) A kookari koowo a ka wahala yen wɛ̃ɛ nɔɔ kasu fuuku fuuku, a maa de swaa ya n maa yi i ka gari ko.—Efesu 4:26.

YE I KO I KPĨ I KO:

• I saa gea yio ye sɔɔ i ko i gari ko sannu wahala ye sɔɔ

• Swaa dakibun saa sɔɔ,a swaa dakio, a ku wunɛn kĩnasi gari bura. Wunɛn saa ya maa wee ye sɔɔ kaa gari gere

YE BIBELI YA GERUMƆ: “I n kĩanɛ . . . I n kookari mɔ̀ i ka bɛɛrɛ wɛ̃ɛna.” (Romu 12:10) Mɛ a ka gari swaa daki ya sãa girim. A kookari koowo kpa ye wunɛn kĩnasi u bwisikumɔ yu nun yeeri. A wi wɔnwɔndu ka “tii kawabu” sɔ̃ɔsio. (1 Piɛɛ 3:8; Yakɔbu 1:19) À n mɔ̀ nge a wi swaa daki ya ǹ tura. Ya n koo koora, a ye a mɔ̀ derio gina a ka win gari swaa daki mam mam ǹ kun mε a wi kanɔ i n ko i kpĩ i saa yi i ka wesiana. À n wi a sue waamɔ nge wunɛn bɔrɔ, u n kun sãa wunɛn wɛrɔ, a ǹ derimɔ “wunɛn mɔru ya n da fuuku se.”—Waasu kowo 7:9.

YE KAA KPĨ A KO:

• A n bɔ a n swaa daki baa ye a nɔɔmɔ ya kun ka nun naawɛ

• A wunɛn kĩnasin garin asansi kasuo. Sanam mɛ u nun gari sɔ̃ɔmɔ a win wuswaa ka win kookoosu laakari koowo ka maa mɛ u ka win gari nɔɔsiamɔ

YE BIBELI YA GERUMƆ: “Sɔmburu kpurowa ta ra n are mɔ, adama gari saarinu, sãara nu ra ka nɛ.” (Mɔnnu 14:23) Ì n nɔɔsina i ka gari yin wɛ̃ɛ nɔɔ wa ya wã, adama ya ǹ kpa. N weenɛ i swĩi ye i yi i ko sere ka nɔrɔ.Ya koo kpĩ yu sɔm bakaru ka hania dabinu kana adama yen are ya kpã. (Mɔnnu 10:4) Ma i sɔmburu mɔ̀ sannu nge sɔm kowo kpaasibu, i ko i deema bɛɛn “sɔmburun are yi kpã”.—Waasu kowo 4:9.

YE I KO KPĨ I KO:

• I swaa yio ye bɛɛn baawure koo kpĩ u swĩi dee dee i ka bɛɛn gari wunana

• Saa ka saa, i bɛɛn wuswaa daabu wɛ̃ɛrio