1 Raja-Raja 18:1-46
18 Di taon na patoluhon tikki masa logo ni ari i,+ didok Jahowa ma tu si Elia, “Lao ma ho mandapotton si Ahab. Ai naeng parookku nama udan.”+
2 Dung i lao ma si Elia mandapotton si Ahab. Tikki i, massai posi do haraparon+ na masa di Samaria.
3 Dijou si Ahab ma si Obaja kepala istana ni raja. (Halak na makkabiari Jahowa do si Obaja.
4 Tikki dipamate si Izebel+ akka panurirang* ni Jahowa, ditabunihon si Obaja do 100 panurirang di liang.* Dibahen ma 50 halak di bagasan sada liang. Jala dilehon si Obaja do sipanganon dohot siinumon tu nasida.)
5 Didok si Ahab ma tu si Obaja, “Beta ma lao tu sude mual dohot rura.* Anggiat ma dapotta ramba allangon ni akka hoda dohot halodetta* asa unang mate i.”
6 Jadi ditottuhon nasida ma naeng tudia nasida lao. Gabe masiboan dalanna be ma si Ahab dohot si Obaja.
7 Tikki di tonga dalan si Obaja, pajuppang ma ibana dohot si Elia. Pittor ditanda ibana do na si Elia i, gabe marsomba ma ibana. Didok ibana ma, “Ai ho do i Elia, tuanku?”+
8 Dialusi si Elia ma, “Ido, au do on. Mulak ma ho jala dokkon ma tu tuanmu na dison do au.”
9 Alai didok si Obaja ma, “Ai aha salakku umbahen na suruonmu au mandapotton si Ahab, asa pamateonna do au?
10 Songon pastina mangolu Jahowa Debatam,* nungnga disuru si Ahab au tu saluhut bangso dohot harajaon lao mangalului ho. Molo didok nasida dang adong ho disi, suruon ni si Ahab ma nasida marsumpa paboa na so adong ho disi.+
11 Hape saonari suruonmu au paboahon tu si Ahab na dison ho.
12 Boha ma molo tikki lao au sian on, ro ma tondi parbadia ni Jahowa mamboan ho+ tu sada inganan. Hape nungnga hudokkon tu si Ahab na dison ho. Molo dang juppangna ho dison, pamateonna ma au. Diboto ho do na huhabiari Jahowa mulai sian haposookku.
13 Na so diboto ho do aha na huulahon tikki dipamate si Izebel akka panurirang ni Jahowa? Hutabunihon do 100 panurirang ni Jahowa di liang. Hubahen do 50 halak di bagasan sada gua jala hulehon do sipanganon dohot siinumon ni nasida.+
14 Hape saonari suruonmu au paboahon tu si Ahab na dison ho. Pamateonna ma au da.”
15 Alai didok si Elia ma, “Songon pastina Jahowa Pamimpin ni Akka Tentara i* mangolu, i ma Debata na mangolu na husomba i, sadari on patuduhonokku ma dirikku tu si Ahab.”
16 Dung i lao ma si Obaja paboahon i tu si Ahab. Gabe lao ma si Ahab manjuppangi si Elia.
17 Tikki diida si Ahab si Elia, didok ibana ma, “Dison do ho hape! Alani ho do susa halak Israel.”
18 Dialusi si Elia ma, “Dang au na mambahen susa halak Israel. Alai ho do dohot keluarga ni bapakmu. Ai dialo hamu do paretta ni Jahowa, jala disomba hamu do Baal.+
19 Saonari papungu ma sude halak Israel. Papungu ma muse 450 panurirang ni Baal dohot 400 panurirang ni tiang sisombaon*+ na rap mangan sameja dohot si Izebel. Papungu ma nasida sude di Dolok Karmel.”+
20 Dung i, disuru si Ahab ma halak paboahon i tu sude halak Israel. Jala dipapungu ibana ma akka panurirang i di Dolok Karmel.
21 Dung i dipajonok si Elia ma tu natorop i. Didok ibana ma, “Sadia leleng nai do hamu mardua roha?*+ Molo Jahowa do Debata na sittong, ihutton ma Ibana.+ Alai molo Baal do na sittong, ihutton ma i!” Alai dang dialusi natorop i ibana.
22 Didok si Elia ma muse tu natorop i, “Holan au nama panurirang ni Jahowa.+ Alai adong do 450 panurirang ni Baal.
23 Boan hamu ma tuson dua anak ni lombu jantan. Loas ma dipillit akka panurirang ni Baal i sada lombu jantan i di nasida. Tanggoi ma i jala bahen ma i di ginjang ni soban, alai unang ma ditutung. Au pe, bahenokku ma songon i tu anak ni lombu jantan na sada nai. Bahenokku ma i di ginjang ni soban, alai dang tutungokku i.
24 Dung i, lok ma dijou panurirang ni Baal debata ni nasida.+ Au pe jouokku ma Jahowa. Debata ni ise na parohon api, i ma Debata na sittong.”+ Dialusi natorop i ma, “I pe taho.”
25 Didok si Elia ma tu akka panurirang ni Baal i, “Hamu ma na parjolo mamillit anak ni lombu jantan i. Ai unggodang do hamu. Dung i jou hamu ma debatamuna. Alai unang ma tutung hamu pelean i.”
26 Dibuat akka panurirang ni Baal i ma anak ni lombu jantan naung dilehon tu nasida. Diparade nasida ma i jala sai dijou ma Baal sian manogot sahat tu arian. Didok nasida ma, “Ale Baal, alusi ma hami!” Alai dang adong na mangalusi.+ Sai manortori ma nasida makkaliangi langgatan na binahen ni nasida huhut marhujingjang.
27 Hira-hira tonga ari, dilesengi si Elia ma akka panurirang ni Baal i. Didok ibana ma, “Gogo attong jou hamu. Kan debata do ibana!+ Atik na marangan-angan do ibana, manang buang air.* Manang atik na modom do ibana jala ikkon didungoi.”
28 Lam gogo ma dijou nasida Baal. Diseati nasida ma daging ni nasida mamakke balati dohot tombak,* songon hasomalan ni nasida. Gabe margulu-gulu mudar ma nasida sude.
29 Sahat tu na salpu arian, dang adong na mangalusi nasida. Torus ma nasida songon na rittik* sahat tu borngin, i ma sappe dapot tikki mangalehon pelean sipanganon.* Alai tong dope dang adong na masa manang aha.+
30 Dung i didok si Elia ma tu natorop i, “Pajonok hamu ma tu au.” Gabe manjonok ma sude natorop i. Dipadenggan si Elia ma langgatan ni Jahowa naung maruppak hian.+
31 Dibuat si Elia ma 12 batu songon godang ni akka marga pinoppar ni si Jakkob. Ai tu si Jakkob do didok Jahowa, “Israel nama goarmu.”+
32 Dipakke ibana ma akka batu i lao pajongjokkon langgatan+ na pasangappon goar ni Jahowa. Dibahen ibana ma bondar di sakaliling ni langgatan i. Bidang do bondar i, boi do disabur hira-hira 15 liter* boni tusi.
33 Disusun si Elia ma soban tu ginjang ni langgatan i. Ditanggoi ibana ma anak ni lombu jantan i, jala dibahen ma tu ginjang ni soban i.+ Dung i didok ibana ma, “Buat hamu ma aek opat gucci na balga. Usehon hamu ma i tu pelean situtungon i dohot tu soban i.”
34 Didok ibana ma muse, “Bahen hamu ma muse songon i.” Dibahen nasida ma muse songon i. Didok ibana ma muse, “Bahen hamu ma muse songon i sahali nai.” Dibahen nasida ma muse songon i sappe tolu hali.
35 Gabe maraek ma di sakaliling ni langgatan i. Dung i diisi si Elia ma muse aek tu bondar i sappe gok.
36 Di borngin i, dung dapot tikkina mangalehon pelean sipanganon,+ dipajonok si Elia ma tu langgatan i. Didok ibana ma, “Ale Jahowa Debata ni si Abraham,+ si Isak,+ dohot si Israel, patuduhon ma sadari on na Ho do Debata ni Israel, jala naposom do au. Jala patudu ma na Ho do marsuru au mangulahon on sude.+
37 Ale Jahowa, alusi ma au! Alusi ma au asa diboto bangso on, Jahowa do Debata na sittong, jala asa diboto bangso on Ho do na mambahen roha ni nasida mulak tu Ho.”+
38 Dung i turun ma api sian ginjang dibahen Jahowa. Habis ma tartutung pelean situtungon i,+ akka soban i, akka batu i, dohot orbukna. Habis ma muse aek na di bagasan bondar i alani api i.+
39 Dung diida natorop i na masa i, pittor marsomba ma nasida. Jala didok ma, “Jahowa do Debata na sittong! Jahowa do Debata na sittong!”
40 Dung i didok si Elia ma tu natorop i, “Takkup ma sude panurirang ni Baal i! Unang adong na malua nanggo sada!” Ditakkup natorop i ma sude panurirang ni Baal i. Diboan si Elia ma panurirang ni Baal i tu Sunge* Kison,+ jala disi ma nasida dibunu.+
41 Didok si Elia ma tu si Ahab, “Lao ma ho, asa mangan ho jala minum. Ai nungnga hubege soara ni udan na gogo.”+
42 Lao ma si Ahab mangan jala minum. Dung i, lao ma si Elia tu pussu ni Dolok Karmel. Disi, marsomba ma ibana, unduk ma ibana sappe jonok bohina tu dugul-dugulna.+
43 Dung i didok si Elia ma tu naposona, “Nakkok ma ho, tatap ma jo doppak laut.” Lao ma naposona i, alai mulak ma ibana muse, ninna ma, “Dang adong huida manang aha.” Sappe pitu hali ma ibana mulak-ulak disuru si Elia mangida doppak laut.
44 Dung papituhalihon didok naposona i ma, “Adong huida ombun na gelleng sabolak tangan ni jolma nakkok sian laut.” Didok si Elia ma tu ibana, “Lao ma ho, dok ma tu si Ahab, ‘Parade ma kareta hodam! Mulak ma ho, sotung so boi ho mulak molo dung dobar udan.’”
45 Dung i makkolom ma langit, mangullus ma alogo, jala ro ma udan na massai doras.+ Torus ma si Ahab markareta mulak tu Jisreel.+
46 Alai dilehon Jahowa ma gogo tu si Elia. Dung i diikkat ibana ma bajuna tu gottingna jala marlojong ma ibana manjoloani si Ahab sahat tu Jisreel.
Surat na di toru
^ Manang “gua”.
^ Di bahasa Heber, binatang on i ma hasil perkawinan ni halode jantan dohot hoda boru-boru.
^ Sumpa on patuduhon pasti do ikkon saut janji on, songon pastina Debata mangolu.
^ Manang “Sebaot”, lapatanna pamimpin ni akka suru-suruan na di banua ginjang.
^ As. “hamu mekkat-ekkat mandalani dua dalan”.
^ Manang boi do “mardalani”.
^ Manang “hujur”.
^ Manang “songon panurirang”.
^ As. “dua sea”. Ida Lampiran B14.
