5 Musa 11:1-32
11 “Ikkon dihaholongi hamu do Jahowa Debatamuna.+ Ikkon toktong do diulahon hamu tanggung jawabmuna tu Ibana. Jala ikkon oloanmuna do patikna, aturan naung ditottuhon Ibana, dohot sude parettana.
2 Diboto hamu do sadari on, tu hamu do au makkatai. Dang tu akka ianakkonmuna au makkatai. Ai dang diboto nasida tudu-tudu* na sian Jahowa Debatamuna i,+ jala dang diida nasida hasangaponna,+ tanganna na gogo i,+ dohot hagogoonna na tung massai balga i.
3 Dang diida nasida akka tanda halongangan* dohot akka na masa na hubahen di Mesir tu si Firaun raja ni Mesir i, dohot sude na masa di luat i.+
4 Jala dang diida nasida aha na hubahen tikki dilele halak Mesir hamu. Dang diida nasida aha na hubahen tu akka tentara ni Mesir, tu akka hoda ni nasida, dohot tu kareta porang ni si Firaun na maup di Laut Merah. Tikki i, Jahowa do na pamatehon nasida, na mambahen nasida dang mangolu sahat tu saleleng ni lelengna.*+
5 Dang diida nasida muse aha na binahenna tu hamu di gurun sappe tu na sahat hamu tuson.
6 Jala dang diida nasida na binahenna tu si Datan dohot tu si Abiram anak ni si Eliab, anak ni si Ruben. Di jolo ni sude halak Israel, bola dua do tano mamboddut nasida rap dohot keluarga ni nasida, kemah ni nasida, dohot sude na mangolu na mangihutton nasida.+
7 Tutu, hamu sandiri do na mangida sude ulaon na balga na binahen ni Jahowa.
8 “Ikkon oloanmuna do sude paretta na hupaboa tu hamu sadari on, asa lam margogo hamu, asa boi hamu sahat tu luat na lao buatonmuna i gabe appunamuna,
9 jala asa leleng hamu mangolu+ di luat naung dijanjihon Jahowa mardongan sumpa tu akka ompumuna dohot tu pinoppar ni nasida,+ i ma luat na godang susu dohot madu.+
10 “Luat na lao buatonmuna gabe appunamuna i, dang songon Mesir luat naung ditadikkon hamu. Tikki di Mesir, molo disabur hamu boni, ikkon sappe loja* do hamu mambahen dalan ni aek tu ladang, songon mambahen dalan ni aek tu ladang sayur.
11 Alai di luat na lao sitopotonmuna, jala na lao buatonmuna gabe appunamuna i, godang do akka dolok dohot rura disi.+ Jala maraek do i binahen ni udan na turun sian langit.+
12 Luat na diurus Jahowa Debatamuna do luat i. Toktong do diparrohahon Jahowa Debatamuna luat i, sian mula ni taon sahat ro di ujungna.
13 “Molo marsitutu hamu mangoloi akka paretta na hupaboa tu hamu sadari on, jala dihaholongi hamu Jahowa Debatamuna, disomba hamu Ibana sian nasa rohamuna dohot sian nasa ngolumuna,+
14 paroonna* do udan tu luatmuna di tikki na ditottuhon, i ma musim udan na parjolo dohot musim udan na parpudi.* Papunguonmuna ma godang sipanganon, anggur na baru, dohot miakmuna.+
15 Bahenokku ma tubu akka ramba di ladangmuna lao gabe sipanganon ni akka binatang na dipiaro hamu. Jala paradeokku do tong godang sipanganon lao di hamu.+
16 Manat ma hamu asa unang gabe manirpang rohamuna lao manomba akka debata na asing jala marsomba tu nasida.+
17 Molo dibahen hamu songon i, muruk situtu ma Jahowa tu hamu. Tutuponna ma langit, dang paroonna be udan,+ jala dang marhasil be tano na niulamuna. Gabe tibu ma hamu mate sian luat na denggan na nilehon ni Jahowa tu hamu.+
18 “Ikkon sippanonmuna do sude hata i di roha dohot di pikkiranmuna. Ikkatton ma i sudena di tanganmuna gabe parningotan, jala bahen ma sudena i songon tali na diikkatton di dahimuna.*+
19 Ajarhon ma sudena i tu anakkonmuna. Hatahon ma i sudena tikki rap hundul hamu di jabu, tikki di pardalanan, tikki naeng modom, jala tikki dungo.+
20 Suratton ma sudena i di kusen ni pintu jabumuna dohot di gerbangmuna,
21 asa leleng hamu mangolu+ dohot ianakkonmuna di luat na dijanjihon Jahowa lao lehononna tu akka ompumuna+ mardongan sumpa, saleleng langit mangalinggomi tano on.
22 “Molo marsitutu hamu mangoloi jala mangulahon sude paretta na hupaboa tu hamu, jala dihaholongi hamu Jahowa Debatamuna,+ diihutton hamu sude dalanna, jala toktong hamu setia* tu Ibana,+
23 usiron ni Jahowa ma sude bangso sian jolomuna.+ Talu ma bahenonmuna akka bangso na umgogo jala na unggodang rakyatna sian hamu.+
24 Gabe appunamuna ma ganup luat na didege hamu.+ Mulai sian gurun sahat tu Libanon, mulai sian Sunge Euprat sahat tu laut* na di sabola barat, i ma annon na gabe parbatasan ni luatmuna.+
25 Dang adong na boi martahan mangalo hamu.+ Bahenon ni Jahowa Debatamuna i do makkahitir jala mabiar sude halak na di luat i tu hamu,+ songon naung dijanjihon Ibana tu hamu.
26 “Saonari, lehononna ma dua sipilliton tu hamu, pasu-pasu manang bura:+
27 Dapotmuna ma pasu-pasu molo dioloi hamu paretta ni Jahowa Debatamuna songon na hupaboa tu hamu sadari on.+
28 Alai hona bura ma hamu molo dang dioloi hamu paretta ni Jahowa Debatamuna,+ molo manirpang hamu sian dalan na ikkon ihuttononmuna songon na hupaboa tu hamu sadari on. Jala hona bura ma hamu molo diihutton hamu akka debata na so ditanda hamu.
29 “Tikki diboan Jahowa Debatamuna i hamu tu luat na lao gabe appunamuna i, hatahon* hamu ma pasu-pasu di Dolok Gerizim jala bura di Dolok Ebal.+
30 Dolok na dua i adong di sabola barat* ni Sunge Jordan, di luat ni halak Kanaan na tinggal di Araba, na di bariba ni Gilgal, na di jonok ni akka hau na balga di More.+
31 Ai manaripar nama hamu sian Sunge Jordan lao masuk tu luat na lao lehonon ni Jahowa Debatamuna i gabe appunamuna.+ Molo dung dibuat hamu luat i, jala tinggal hamu disi,
32 ikkon manat do hamu jala marsitutu mangulahon sude patik dohot aturan naung ditottuhon songon naung hupaboa tu hamu sadari on.+
Surat na di toru
^ Manang “disiplin”.
^ Manang “mukjizat”.
^ Manang “sahat tu sadari on”.
^ Manang “ikkon mamakke pat”, na nidokna dison mamutar roda padalatton aek manang mambukka saluran ni aek mamakke pat.
^ As. “parookku”. Na nidokna dison, i ma Debata.
^ Musim udan na parjolo dimulai hira-hira parsitongaan ni bulan Oktober, jala musim udan na parpudi dimulai hira-hira parsitongaan ni bulan April.
^ Manang “di holang-kolang ni matamuna; di ulumuna”.
^ Manang “marsitiopan”.
^ I ma Laut na Balga manang Laut Tengah.
^ Manang “lehon”.
^ Manang “sabola parbonom ni mataniari”.
