5 Musa 4:1-49
4 “Saonari, ale Israel tangihon hamu ma au. Ajarhonokku ma tu hamu patik dohot aturan naung ditottuhon. Ikkon diulahon hamu do sudena i, asa mangolu hamu+ jala boi masuk tu luat i. Jala asa boi dibuat hamu luat na lao dilehon Jahowa Debata ni akka ompumuna i tu hamu.
2 Unang tambai hamu manang orui hamu+ akka paretta na hupaboa tu hamu. Alai ikkon oloanmuna do sude paretta ni Jahowa Debatamuna i, dos songon paretta na hupaboa tu hamu.
3 “Takkas do diida hamu aha na dibahen Jahowa tu sude halak na mangihutton Baal Peor.+ Dipamate Jahowa Debatamuna i do nasida sian tonga-tongamuna.
4 Alai hamu akka na toktong setia tu Jahowa Debatamuna i, mangolu do hamu sude sahat tu sadari on.
5 Nungnga huajarhon tu hamu patik dohot aturan naung ditottuhon,+ songon naung diparettahon Jahowa Debatakku tu au. Ikkon diulahon hamu do sudena i di luat na lao buatonmuna gabe appunamuna.
6 Ikkon marsitutu do hamu mangihutton sudena i.+ Alani i, gabe marbisuk+ jala marpangattusion+ ma hamu. Idaon ni halak na mambege taringot tu sude aturan i ma i. Jala dohonon ni nasida ma, ‘Tutu do bangso na balga on, bangso na marbisuk jala na marpangattusion.’+
7 Ai bangso na balga na dia ma na songon i jonokna tu debatana? Na songon hita jonokna tu Jahowa Debatanta? Toktong do Ibana jonok tu hita manang sadihari pe tajou Ibana.+
8 Jala bangso na balga na dia ma na adong patikna na tigor dohot aturan na ditottuhon tu bangsona, songon na adong di sude patik na hupaboa tu hamu sadari on?+
9 “Jaga hamu ma dirimuna jala manat ma hamu, asa unang lupa hamu tu sude naung diida hamu. Jala asa toktong adong i di rohamuna saleleng mangolu hamu. Ikkon paboaonmuna do muse sude nai tu akka anakmuna dohot tu pahoppumuna.+
10 Tikki jongjong hamu di jolo ni Jahowa Debatamuna di Horeb, didok Jahowa do tu au, ‘Suru ma marpungu bangso i tu jolokku, asa dibege nasida hatakku,+ asa huajari nasida makkabiari Au+ saleleng mangolu nasida di tano on. Jala asa boi diajari nasida akka anak ni nasida.’+
11 “Dipajonok hamu ma tu toru ni dolok i jala jongjong ma hamu disi. Marsigorgor ma api di dolok i jala apina sahat tu langit, gabe makkolom ma sude, adong ma ombun na hapal jala na golap situtu.+
12 Makkatai ma Jahowa tu hamu sian api i.+ Jala dibege hamu ma akka hatana. Alai dang adong diida hamu songon dia rupana,+ holan soarana do dibege hamu.+
13 Dipaboa Ibana ma parjanjianna tu hamu,+ i ma Patik na Sappulu* i.+ Diparettahon Ibana do na ikkon ulahononmuna i. Dung i, disuratton Ibana ma sudena i tu dua batu panuratan i.+
14 Tikki i, diparettahon Jahowa do au mangajarhon tu hamu akka patik dohot aturan naung ditottuhon. Dilehon do sudena i, asa boi ulahononmuna i di luat na lao buatonmuna gabe appunamuna.
15 “Alani i, jaga ma hamu. Ai dang diida hamu songon dia rupa ni Jahowa tikki makkatai Ibana dohot hamu sian tonga-tonga ni api di Horeb.
16 Alani i, unang ulahon hamu dosa marhite mambahen patung na suman tu manang aha pe, manang na suman tu bawa manang na suman tu borua,+
17 manang na suman tu binatang manang aha pe di tano on, manang na suman tu pidong manang aha pe na habang di langit,+
18 manang na suman tu binatang manang aha pe na mangissir di tano on, manang na suman tu dekke manang aha pe na adong di aek na di toru ni tano.+
19 Jala molo diida hamu tu langit, diida hamu ma mataniari, bulan, bintang, dohot sude na adong di langit, unang olo hamu marsomba tusi manang manomba i.+ Ai nungnga dilehon Jahowa Debatamuna sudena i tu akka bangso na adong di toru ni langit.
20 Alai hamu do bangso na dibuat jala na diboan Jahowa kaluar sian Mesir, sian inganan ni panutungan ni bosi,* asa gabe bangsona sandiri+ hamu songon sadari on.
21 “Muruk do Jahowa tu au alani hamu.+ Marsumpa do Ibana na so boi au manaripari Sunge Jordan, manang masuk tu luat na denggan na lao lehonon ni Jahowa Debatamuna tu hamu gabe appunamuna.+
22 Mate nama au di luat on. Dang dohot au manaripari Sunge Jordan.+ Alai anggo hamu, lao nama hamu manaripari jala mambuat luat na denggan i gabe appunamuna.
23 Alai manat ma hamu, asa unang lupa hamu tu parjanjian na dibahen Jahowa Debatamuna i tu hamu.+ Unang bahen hamu patung na suman tu manang aha pe. Ai diorai Jahowa Debatamuna do hamu mangulahon i.+
24 Ai songon api na pasudahon+ do Jahowa Debatamuna i. Jala dipangido Ibana do asa holan Ibana Debata na disomba.*+
25 “Molo adong anakmu dohot pahoppum, jala molo nungnga leleng ho tinggal di luat i, hape diulahon hamu dosa marhite mambahen patung+ na suman tu manang aha pe, jala diulahon hamu na jahat di jolo ni Jahowa Debatamuna, na mambahen haccit rohana,+
26 pasti tibu do hamu pamateonna sian luat na lao buatonmuna i dung manaripar hamu sian Sunge Jordan. Langit dohot tano on ma na gabe saksina sadari on. Molo diulahon hamu i, dang leleng hamu mangolu disi, ai pasti pamateonna do hamu.+
27 Bahenon ni Jahowa ma hamu marserak tu tonga-tonga ni akka bangso.+ Dung dibahen Jahowa hamu marserak, holan saotik do hamu na toktong mangolu+ di tonga-tonga ni bangso i.
28 Disi, sombaonmuna ma akka debata na binahen ni jolma sian hau dohot batu,+ i ma akka debata na so boi marnida manang mambege, na so boi mangan manang manganggo.
29 “Molo dilului hamu do Jahowa Debatamuna disi, pasti do dapotmuna Ibana.+ Alai ikkon sian nasa rohamuna dohot sian nasa ngolumuna*+ do hamu mangalului tudu-tudu sian Ibana.
30 Tikki masa sudena i tu hamu jala massai susa hamu, gabe mulak ma hamu tu Jahowa Debatamuna i jala dioloi hamu ma hatana.+
31 Ai Debata parasi roha do Jahowa Debatamuna i.+ Dang tadikkononna hamu, manang dang pasombuonna hamu mate, manang dang lupahononna parjanjian naung dibahen Ibana tu akka ompumuna.+
32 “Saonari, pikkiri hamu ma aha na hea masa najolo, tikki so adong dope hamu, mulai sian na ditoppa Debata jolma di tano on. Lului hamu ma jo mulai sian ujung ni langit on tu ujung ni langit an, hea do najolo masa songon on hebatna? Adong do halak na hea mambege akka ulaon sisongon on?+
33 Hea do adong bangso na songon hamu na mambege soara ni Debata makkatai sian api alai toktong mangolu?+
34 Manang hea do naeng dipillit Debata sada bangso gabe appunana sian tonga-tonga ni akka bangso, songon na binahenna tu hamu tikki di Mesir? Ai di jolomuna do dibahen Jahowa Debatamuna i akka tanda, hukuman, tanda halongangan,*+ dohot porang+ lao mamboan hamu kaluar sian Mesir. Jala alani hamu, dipatudu Ibana do hagogoonna na tung massai balga+ dohot akka ulaon na parohon biar.+
35 Dipatuduhon Ibana do sudena i tu hamu, asa diboto hamu Jahowa do Debata na sittong.+ Dang adong Debata, asing ni Ibana.+
36 Dipaloas Ibana do hamu mambege soarana sian surgo lao pasingotton hamu. Dipaloas Ibana do hamu mangida apina na balga i. Jala dibege hamu do soarana sian api i.+
37 “Alani holong ni rohana tu akka ompumuna, jala ala nungnga dipillit Ibana akka pinoppar ni nasida,+ didongani Ibana do hamu jala diboan do hamu kaluar sian Mesir marhite huasona na balga i.
38 Dipalao Ibana do sian jolomuna akka bangso na umbalga jala na umgogo sian hamu. Dung i boi ma diboan Ibana hamu masuk tu luat ni nasida, jala dilehon Ibana do luat ni nasida i gabe appunamuna, songon na masa sadari on.+
39 Alani i, sadari on, boto hamu ma i jala sippan ma di rohamuna, na Jahowa do Debata na sittong di langit dohot di tano on.+ Dang adong na songon Ibana.+
40 Ikkon toktong do oloanmuna aturan dohot paretta ni Debata na hupaboa tu hamu sadari on, asa denggan ngolumuna dohot pinopparmuna, jala asa ganjang umurmuna di luat na lao lehonon ni Jahowa Debatamuna i tu hamu.”+
41 Di tikki i, dipillit si Musa ma tolu kota na di Sunge Jordan di sabola timur.+
42 Molo adong halak na so sengaja mambunu donganna jolma, jala dang ala na hea sogo rohana tu donganna i,+ ikkon lari do na mambunu i tu sada sian kota i, asa toktong ibana mangolu.+
43 Kota na parjolo, i ma Bezer+ na di gurun na adong di dolok. Kota on ma na diparade tu marga Ruben. Kota na paduahon, i ma Ramot+ na di Gilead. Kota on ma na diparade tu marga Gad. Kota na patoluhon, i ma Golan+ na di Basan. Kota on ma na diparade tu marga Manasse.+
44 On ma Patik+ na dipasahat si Musa tu halak Israel.
45 On ma sipasingot, hukum, dohot aturan na ditottuhon na dipaboa si Musa tu halak Israel dung kaluar nasida sian Mesir.+
46 Dipaboa do i tikki di luat na di Jordan nasida, di rura na di jolo ni Bet-peor,+ di luat ni si Sihon raja ni halak Amori na tinggal di Hesbon.+ Ibana do raja na ditaluhon si Musa dohot halak Israel dung kaluar nasida sian Mesir.+
47 Dibuat nasida do luatna i gabe appuna ni nasida. Dibuat nasida do muse luat ni si Og+ raja ni Basan. Raja ni halak Amori do nasida na dua na tinggal di Sunge Jordan sabola timur.
48 Mulai sian Aroer+ ma luat ni nasida na adong di topi ni Rura* Arnon sahat tu Dolok Sion, i ma Dolok Hermon.+
49 Dohot do muse luat ni nasida sude Araba na di Sunge Jordan sabola timur sahat tu Laut Araba,* na di toru ni Pisga.+
Surat na di toru
^ As. “Sappulu Paretta”.
^ Panutungan ni bosi patuduhon sitaonon na massai borat.
^ Manang “Massai sogo do rohana molo adong debata na asing na dipatudos songon Ibana”.
^ Manang “mukjizat”.
^ Na nidokna dison, i ma Laut Sira manang Laut Mati.
