5 Musa 8:1-20
8 “Ikkon marsitutu do hamu mangulahon ganup paretta na hupaboa tu hamu sadari on. Molo diulahon hamu i, toktong ma hamu mangolu,+ jala lam godang ma hamu. Boi ma hamu masuk jala mambuat luat na dijanjihon Jahowa tu akka ompumuna i.+
2 Ingot hamu ma pardalananmuna na ganjang, na binahen ni Jahowa Debatamuna saleleng 40 taon di gurun.+ Dibahen Ibana do songon i,+ lao mangajari hamu asa serep rohamuna jala asa diboto Ibana aha na di bagasan rohamuna.+ Sian i botoonna ma diulahon hamu do parettana manang dang.
3 Dipasombu Ibana do hamu male,+ asa serep rohamuna. Dilehon Ibana ma tu hamu manna,+ i ma sipanganon na so ditanda hamu dohot akka ompumuna. Dibahen do songon i, asa diattusi hamu na so holan sian roti jolma boi mangolu, alai sian ganup hata na kaluar sian pamangan ni Jahowa.+
4 Saleleng 40 taon on, dang sega pakkeanmuna jala dang bongkak patmuna.+
5 Takkas do diboto hamu di bagasan rohamuna, dipasingot Jahowa Debatamuna i do hamu+ dos songon sahalak ama na pasingotton anakna.
6 “Ikkon oloanmuna do paretta ni Jahowa Debatamuna marhite mangihutton sude dalanna jala makkabiari Ibana.
7 Ai boanon ni Jahowa Debatamuna i do hamu tu luat na denggan.+ Godang do sunge* di luat i, mata mual, jala mardalan do aekna* di akka luat na di dolok-dolok dohot di akka rura.
8 Godang do di luat i gandum, barli,* anggur, hau ara, delima,+ miak jetun, dohot madu.+
9 Dang na lao masa haraparon tu hamu di luat i, jala dang na lao hurangan manang aha hamu disi. Marcampur bosi do akka batu na di luat i, jala boi do buatonmuna tombaga sian akka dolok na di luat i.
10 “Molo dung mangan hamu sappe butong, ikkon pujionmuna do Jahowa Debatamuna. Ai Ibana do na mangalehon luat na denggan i tu hamu.+
11 Manat ma hamu asa unang lupa tu Jahowa Debatamuna i, gabe dang diulahon hamu parettana, aturan naung ditottuhon Ibana, dohot akka patikna songon na hupaboa tu hamu sadari on.
12 Molo dung mangan hamu sappe butong, dibangun hamu akka jabu na denggan, jala tinggal hamu disi,+
13 molo dung lam godang akka binatang na dipiaro hamu, perak dohot masmuna, jala lam godang sude na adong di hamu,
14 unang ma gabe ginjang rohamuna.+ Jala unang ma lupa hamu tu Jahowa Debatamuna, na mamboan hamu kaluar sian Mesir, sian ingananmuna tikki dibahen gabe hatoban.*+
15 Nungnga ditogu-togu Ibana hamu mardalan sian gurun na bidang jala na parohon biar.+ Godang do ulok na marbisa dohot kalajengking di gurun i. Harsang do tanona jala dang adong aek disi. Alai dibahen Ibana do kaluar aek sian batu na massai pir.+
16 Jala dilehon Ibana do manna lao allangonmuna+ di gurun i, i ma sipanganon na so ditanda akka ompumuna. Dibahen Ibana do songon i, asa serep rohamuna+ jala asa diboto Ibana aha na di bagasan rohamuna. Ai marguna do i tu hamu di ari na naeng ro.+
17 Molo didok hamu di bagasan rohamuna, ‘Alani gogo dohot huasokku sandiri do umbahen na dapottu sude hamoraon on,’+
18 ingot hamu ma, Jahowa Debatamuna i do na mangalehon tu hamu huaso asa dapotmuna hamoraon i.+ Dibahen Ibana do songon i, lao pasautton parjanjian na binahenna mardongan sumpa tu akka ompumuna, songon na binahenna sahat tu sadari on.+
19 “Molo pola lupa hamu tu Jahowa Debatamuna i, jala diihutton hamu akka debata na asing, disomba hamu akka debata i, jala marsinggang hamu tusi, sadari on hupasingot ma hamu, molo diulahon hamu songon i, pasti mate do hamu.+
20 Pamateonna ma hamu dos songon akka bangso na dipamate Jahowa di jolomuna. Ai dang ditangihon hamu hata ni Jahowa Debatamuna.+
Surat na di toru
^ Manang “mata mual na bagas”.
^ Suan-suanan na songon eme.
^ As. “sian jabu ni akka hatoban”.
