Jesaya 40:1-31
40 “Apuli, apuli hamu ma bangsokki,” ninna Debatamuna.+
2 “Pasonang ma roha* ni penduduk ni Jerusalem,Paboa ma naung marujung masa hasusaan ni nasida,Nungnga lunas digarar hasalaan ni nasida.+
Ai nungnga dijalo nasida dua hali loppit hukuman sian tangan ni Jahowa alani sude dosa ni nasida.”+
3 Adong ma soara na jou-jou di padang gurun:
“Parade hamu ma dalan ni Jahowa!+
Parade hamu ma dalan na tigor+ di gurun lao tu Debatanta.+
4 Timbun hamu ma sude rura,Parata hamu ma sude dolok.
Padosdos hamu ma tano na marbatu-batu,Jala bahen hamu ma tano na marbuttul-buttul gabe tano na dosdos.+
5 Pataridaonna ma hamuliaon ni Jahowa,+Jala sude ma jolma mangida i,+Ai pamangan ni Jahowa do na mandok i.”
6 Tangihon ma! Adong na mandok, “Marsurak ma ho!”
Na sada nai mandok, “Aha ma dohonokku?”
“Dos songon duhut-duhut do sude jolma.
Dos songon bunga na di ladang do holong* ni nasida.+
7 Gabe koring do akka duhut-duhut,Jala malos do akka bunga,+Ala nungnga diombusson Jahowa hosana tu nasida.+
Tutu, dos songon duhut-duhut do jolma i.
8 Koring do akka duhut-duhut,Jala malos do akka bunga,Alai martahan do hata ni Debatanta ro di saleleng ni lelengna.”+
9 Hamu akka borua na mamboan barita na uli tu Sion,+Nakkok ma hamu tu dolok na timbo.
Pagogo hamu ma soaramuna,Ale hamu akka borua na mamboan barita na uli tu Jerusalem.
Pagogo hamu ma soaramuna i, unang mabiar hamu.
Songon on ma dokkon hamu tu akka kota na di Juda, “On do Debatamuna.”+
10 Ida ma! Na lao ro nama Jahowa Tuan Natumimbul i patuduhon huasona,Tangan kananna* ma na lao mamaretta.+
Ida ma! Nungnga diboan Ibana upa,Jala nungnga rade be Ibana lao manggarar upa.+
11 Songon parmahan do Ibana na mangurus akka binatang na diparmahan Ibana.+
Dipapungu Ibana do anak ni biru-biru,*Diboan Ibana do nasida di andorana,
Jala manat do ditogu-togu Ibana akka biru-biru na manusui anakna.+
12 Ise ma na boi mambahen sude aek ni laut tu talapak ni tanganna,+Jala na boi manjokkal* langit lao mamboto sadia bidangna?
Ise ma na boi mambahen sude tano na di portibi on di sada takkar,+Manang na boi manimbang borat ni dolok,Dohot akka dolok-dolok marhite timbangan?
13 Ise ma na hea mangukkur* sadia godang tondi parbadia ni Jahowa,Jala ise ma na boi mangalehon poda tu Ibana dohot na mangalehon tudu-tudu?+
14 Tu ise do Ibana hea mangido tudu-tudu lao mangattusi,Manang ise do na hea mangajari Ibana taringot dalan na tigor,Manang na hea mangajari Ibana taringot tu parbinotoan,Manang ise do na hea patuduhon tu Ibana dalan na sittong lao mangattusi?+
15 Ida ma! Dos songon sattetek aek na sian timba do akka bangso,Jala dos songon orbuk na lokkot di timbangan do nasida.+
Ida ma! Boi do diangkat Ibana akka pulo dos songon na mangangkat orbuk na massai halus.
16 Haru akka hau na di Libanon pe dang sae lao mambahen api toktong galak,*Jala sude binatang liar na adong disi pe dang sae lao gabe pelean situtungon di Ibana.
17 Dos songon na so adong do sude bangso di jolona,+Dang adong argana di Ibana.+
18 Ise ma na boi dipatudos hamu tu Debata?+
Aha ma na boi disarupahon hamu tu Ibana?+
19 Sahalak tukkang mambahen patung,*Tukkang logam mangalappis patung i mamakke mas,+Jala ditopa ibana do ratte na sian perak.
20 Dipillit ibana do sada hau lao gabe peleanna,+Hau na so busuk.
Dilului ibana ma tukkang na maloLao mambahen i gabe patung na so mura ponggol.+
21 Na so diboto hamu do?
Na so hea dope dibege hamu?
Na so hea dope i dipaboa tu hamu mulai sian najolo?
Na so hea do dipikkiri hamu akka bukti na adong mulai sian na dibahen fondasi ni tano on?+
22 Adong do Debata na tinggal di atas ni portibi na bulat* on,+Jala songon sihapor* do akka pangisina di Ibana.
Dipahembang Ibana do langit dos songon kain na tipis,Dipahembang Ibana do sudena i dos songon tenda na lao diingani.+
23 Dibahen Ibana do akka pejabat tinggi gabe dang marlapatan,Jala dibahen Ibana do akka hakim* na di tano on gabe dang marguna.
24 Songon suan-suanan na baru disuan do nasida,Baru dope nasida disabur,Baru marurat dope tu tano batang ni nasida,Nungnga diullus alogo nasida jala gabe koring,Diullusson alogo ma nasida dao dos songon lapung ni eme.*+
25 “Tu ise ma tarpatudos hamu Au lao mandok na sarupa Au dohot ibana?” ninna Debata Nabadia.
26 “Bereng ma doppak langit, jala ida ma.
Ise do na manoppa sudena i?+
Debata, Ibana do na manjou nasida kaluar dos songon manjou tentara mangihutton bilanganna be.Dijou Ibana do goar ni nasida sada-sada.+
Dang adong nanggo sada pe sian nasida na so ro,Ai massai balga situtu do huasona jala massai gogo situtu do Ibana.+
27 Ale Jakkob, boasa ma didok ho, ale Israel boasa didok ho songon on,‘Dang diida Jahowa parngoluokku,Dipasombu Debata do au susa’?+
28 Na so diboto ho do? Na so dibege ho do?
Debata na toktong adong sahat tu saleleng ni lelengna do Jahowa Sitoppa saluhut na di tano on.+
Dang hea Ibana loja manang gale.+
Dang adong nanggo sahalak pe na boi mamboto aha na diattusi Ibana.*+
29 Dilehon Ibana do gogo tu na loja,Jala dibahen Ibana do margogo situtu halak na gale.+
30 Nang pe gabe gale jala loja akka doli-doli,Tartuktuk jala madabu akka na poso,
31 Alai halak na marhaposan tu Jahowa margogo do muse.
Dos songon na marhabong ma nasida songon lali+ na boi habang timbo.
Marlojong ma nasida alai dang marnaloja,Mardalan do nasida torus alai dang habis gogona.”+
Surat na di toru
^ Manang “Dokkon ma hata na mangapuli roha”.
^ As. “Tanganna”.
^ Manang “Diangkat Ibana do anak ni biru-biru pakke tanganna”.
^ Ida Lampiran B14.
^ Manang boi do “mangattusi”.
^ Manang “lao gabe soban”.
^ Manang “patung sian logam”.
^ Manang “belalang”.
^ Manang “na songon bola”.
^ Manang “pamaretta”.
^ Manang “na boi mangattusi sude pikkiranna”.
