Job 1:1-22
1 Adong ma sahalak bawa di luat Us na margoar si Job.*+ Halak na tigor marroha do ibana jala setia do ibana tu Debata.+ Dihabiari do Debata jala dang diulahon ibana na jahat.+
2 Pitu ma anakna jala tolu ma boruna.
3 Adong do muse 7.000 biru-biruna, 3.000 untana, 1.000 lombuna,* jala 500 halodena.* Massai godang do parkarejona. Ibana ma na ussangap jala na ummora martimbakkon sude halak na di Timur.
4 Margatti-gatti do anak ni si Job mambahen pesta di jabuna be mangihutton giliranna be. Diundang nasida do iboto ni nasida na tolu i asa rap mangan minum dohot nasida.
5 Molo dung sae sude anakna i mambahen pesta, dijou si Job ma akka anakna i lao pabadiahon nasida. Hatop ma si Job dungo manogotna i, jala dipelehon ibana ma pelean situtungon+ tu Debata. Godang ni pelean na dipelehon ibana dos do tu godang ni akka anakna. Ai didok si Job do, “Atik boha nungnga mardosa akka anakki jala diburai nasida Debata di bagasan roha ni nasida.” Songon i ma na sai diulahon si Job.+
6 Dung i dapot ma tikkina ro akka anak ni Debata na sittong*+ tu jolo ni Jahowa.+ Dohot do Sibolis*+ ro tusi.+
7 Didok Jahowa ma tu Sibolis, “Na sian dia do ho?” Dialusi Sibolis ma Jahowa, “Na makkalilingi jala mamareso tano an do au.”+
8 Didok Jahowa ma tu Sibolis, “Diida* ho do si Job naposokki? Dang adong na songon ibana di tano i. Halak na tigor marroha do ibana,+ jala setia do ibana tu Au. Dihabiari do Au jala dang diulahon ibana na jahat.”
9 Dialusi Sibolis ma Jahowa, “Dang mungkin si Job makkabiari Debata molo so adong na binuatna.+
10 Ai dibahen Ho do tembok di sakalilingna+ lao manjaga ibana, keluargana, dohot akka artana. Dipasu-pasu Ho do na diulahon ibana.+ Jala martamba-tamba do dibahen Ho akka binatang na dipiaro ibana.
11 Alai autsugari ma dibuat Ho sude na adong di ibana, pasti buraanna do Ho di jolom.”
12 Didok Jahowa ma tu Sibolis, “Attong, bahen ma lomom tu* sude na adong di ibana. Alai unang ma dihahua ho ibana!” Dung i lao ma Sibolis sian jolo ni Jahowa.+
13 Di sada tikki, mangan jala minum anggur ma akka anak dohot boru ni si Job di jabu ni anak siakkanganna.+
14 Dung i ro ma halak na mamboan barita manjuppangi si Job. Didok ma, “Tikki mambajak akka lombu jala manggagat akka halode di labbung ni akka lombu i,
15 toppu ma ro halak Seba. Dibuat nasida ma sude binatang i jala dipamate do akka parkarejom mamakke podang. Holan au do na malua. Alani i ma boi au ro paboahon i tu ho.”
16 Tikki makkatai dope bawa i, ro ma halak na asing. Didok ma, “Nungnga turun api ni Debata* sian langit manutung akka biru-biru dohot akka parkarejom! Holan au do na malua. Alani i ma boi au ro paboahon i tu ho.”
17 Tikki makkatai dope bawa i, ro ma muse halak na asing. Didok ma, “Nungnga ro tolu punguan ni akka pangarampok na sian Kasdim+ mambuat akka untam. Jala dipamate nasida do akka parkarejom mamakke podang. Holan au do na malua. Alani i ma boi au ro paboahon i tu ho.”
18 Tikki makkatai dope bawa i, ro ma muse halak na asing. Didok ma, “Mangan jala minum anggur do akka anak dohot borum di jabu ni anak siakkanganmu.
19 Hape toppu ma ro haba-haba sian gurun mangaruppakkon jabu i. Ditipa ma akka anakmu dohot borum. Gabe mate ma nasida sude. Holan au do na malua. Alani i ma boi au ro paboahon i tu ho.”
20 Pittor jongjong ma si Job jala diribak ibana ma abitna. Dung i dicukkur ibana ma obukna jala marsinggang ma ibana.
21 Didok ma,
“Dang adong huboan manang aha tikki tubu au,Jala dang adong boanokku manang aha molo dung mate au.*+
Jahowa do na mangalehon,+ jala Jahowa do na mambuat.
Sai toktong ma dipuji goar ni Jahowa.”
22 Nang pe masa i sude, dang mardosa si Job jala dang disalahon ibana Debata.
Surat na di toru
^ Olo do ra lapatanna, “Na Dihasogohon Akka Halak”.
^ As. “500 pasang lombuna”.
^ As. “halode boru-boru”.
^ Istilah di bahasa Heber lao mandok akka suru-suruan ni Debata.
^ Manang “Diparrohahon”.
^ Manang “rajai ma”.
^ Manang boi do “turun sillam”.
^ As. “Salang-salang do au kaluar sian bortian ni omakku, Jala salang-salang do au mulak”.
