Na disurat si Mateus 12:1-50
-
Jesus do “Tuan ni ari Sabat” (1-8)
-
Bawa na mate tanganna sabbariba (9-14)
-
Naposo haholongan ni Debata (15-21)
-
Dipalao suru-suruan na jahat (22-30)
-
Dosa na so tarsesa (31, 32)
-
Sian parbuena tandaon hau (33-37)
-
Tanda na masa tu si Jona (38-42)
-
Ro suru-suruan na jahat tu ingananna hian (43-45)
-
Omak ni Jesus dohot anggina (46-50)
12 Di tikki ari Sabat, mamolus ma Jesus sian ladang gandum. Diputikkon akka siseanna ma biur ni gandum i jala diallang,+ ai nungnga male nasida.
2 Tikki diida halak Parise na binahen ni sisean i, didok ma tu Jesus, “Ida ma, diulahon akka siseanmu do ulaon na so boi diulahon di ari Sabat.”+
3 Dialusi Jesus ma nasida, “Na so hea do dijaha hamu taringot tu si Daud tikki male ibana dohot akka donganna?+ Aha do na diulahon ibana?
4 Masuk do ibana tu bagas joro ni Debata jala diallang do roti pelean.+ Hape dang boi allangonna manang allangon ni akka donganna i. Ai mangihutton patik, holan malim do na boi mangallang i.+
5 Manang na so hea do dijaha hamu di bukku Patik, karejo do akka malim di bagas joro tikki ari Sabat alai dang didok nasida marsala?+
6 Alai hudok ma tu hamu, adong do dison na umbalga sian bagas joro.+
7 Alai molo diattusi hamu do lapatan ni hata on, ‘Unlomo do rohakku tu halak na patuduhon asi ni roha+ sian tu halak na mangalehon pelean’,+ dang dihukum be halak na so marsala.
8 Ai Anak ni jolma i do Tuan ni ari Sabat.”+
9 Dung ditadikkon Jesus inganan i, lao ma ibana tu sinagoga.*
10 Adong ma disi sahalak bawa na mate* tanganna sabbariba.+ Dung i disukkun halak Parise ma Jesus, “Mangihutton patik, boi do dipamalum na marsahit di ari Sabat?” Disukkun nasida pe songon i, ala naeng mangalului sala ni Jesus do nasida.+
11 Dialusi Jesus ma nasida, “Molo adong biru-birumuna na madabu tu lombang di ari Sabat, ise sian hamu na so mambuat jala na so pakaluarhon biru-biru i sian i?+
12 Dao do ummarga jolma sian biru-biru! Alani i, boi do mangulahon na denggan di ari Sabat.”
13 Dung i ninna Jesus ma tu bawa i, “Patigor ma tanganmi.” Dipatigor ibana ma tanganna i, gabe malum ma tanganna i songon tanganna na sada nai.
14 Dung i, lao ma halak Parise i jala direncanahon nasida ma lao mambunu Jesus.
15 Dung diboto Jesus rencana ni nasida i, lao ma Jesus sian i. Godang ma halak mangihutton ibana+ jala dipamalum ibana do nasida sude.
16 Alai, takkas do didok tu nasida asa unang dipaboa-boa taringot tu ibana.+
17 Marhite songon i, saut ma hata ni Panurirang* Jesaya na mandok,
18 “Ida ma! On do naposokku+ na hupillit, haholongakki, las situtu do rohakku mangida ibana!+ Lehonokku ma tondi parbadia tu ibana,+ jala bahenonna ma hukum na tigor tu akka bangso.
19 Dang olo ibana marbada+ manang marsurak jala dang tarbege soarana di akka dalan.
20 Dang diponggolhon ibana batang ni bulu naung maropuk. Jala dang bahenonna mittop sumbu na mellep+ sahat tu na dipatudu ibana hukum na tigor i.
21 Sasittongna, pos situtu do roha ni akka bangso paimahon saut akka na denggan di bagasan goarna.”+
22 Dung i, diboan ma tu ibana sahalak bawa na bisu jala na mapitung na disonggopi suru-suruan na jahat. Dipamalum Jesus ma bawa i, gabe boi ma ibana makkatai jala marnida.
23 Longang ma sude halak na disi jala didok nasida ma, “On do nuaeng Anak ni si Daud i?”
24 Dung dibege halak Parise na masa i, didok nasida ma, “Dang na boi palaoonna suru-suruan na jahat i molo dang diurupi si Belsebul* pamimpin ni suru-suruan na jahat i ibana.”+
25 Ala diboto Jesus do aha na di pikkiran ni nasida, gabe ninna ma, “Molo tarbagi jala marbadai sada harajaon, pasti hancur do i. Dung i molo tarbagi jala marbadai sada kota manang keluarga, pasti dang martahan i.
26 Songon i ma, molo Sibolis do na palaohon Sibolis, na mangalo dirina sandiri do ibana disi. Alani i, songon dia ma boi martahan harajaonna?
27 Molo hupalao suru-suruan na jahat marhite Belsebul, marhite ise ma siihutton hamu palaohon i? Alani i, akka na mangihutton hamu ma na patuduhon na sala hamu.
28 Alai molo marhite tondi parbadia do au palaohon suru-suruan na jahat, i ma tandana naung ro Harajaon ni Debata tu hamu.+
29 Manang, songon dia ma cara ni sasahalak lao mambuat arta ni sahalak bawa na gogo sian jabuna molo dang jolo ditali bawa i? Ikkon jolo ditali do bawa i asa boi buatonna artana i.
30 Manang ise na so rap dohot au, na mangalo au do i. Jala manang ise na so rap papunguhon dohot au, na paserakkon do i.+
31 “Alani i hudok ma tu hamu, disesa do nasa dosa ni jolma. Nang pe dileai jolma akka na badia, disesa do dosa ni nasida. Alai dang disesa+ dosa ni halak na mangaleai tondi parbadia.
32 Uppamana, manang ise na mandok hata lao mangalo Anak ni jolma i, disesa do dosana.+ Alai manang ise na mandok hata lao mangalo tondi parbadia, dang disesa dosana di tikki* on, nang di tikki na naeng ro.+
33 “Molo hau na denggan disuan, denggan ma parbuena. Molo hau na so denggan disuan, dang hasea parbuena. Ai sian parbuena do botoon na denggan hauna i manang na dang.+
34 Hamu pinoppar ni ulok na marbisa,+ songon dia ma hamu boi makkatahon na denggan, ai jahat do hamu? Ai nasa na adong di roha, i do dihatahon pamangan.+
35 Alani i, dihatahon halak na burju do na denggan, ai akka na denggan do di rohana. Alai, dihatahon halak na jahat do na roa, ai akka na roa do di rohana.+
36 Hudok ma tu hamu, di Ari Panguhuman, ikkon dipartanggung jawabhon+ jolma do ganup hata ni nasida na so marguna.
37 Ai marhite hatamuna i do hamu didok sittong jala marhite hatamuna i do tong hamu didok marsala.”
38 Dung i, ro ma deba siboto surat* dohot halak Parise mandok tu Jesus, “Guru, naeng idaonnami do tanda halongangan* na sian ho.”+
39 Alai, dialusi Jesus ma nasida, “Jahat do sundut on jala dang setia.* Sai mangido tanda halongangan do nasida, alai dang adong be tanda halongangan silehonon asing ni tanda halongangan na masa tu Panurirang Jona.+
40 Songon si Jona na di bagasan butuha ni dekke na balga tolu ari tolu borngin,+ dos songon i ma Anak ni jolma i di bagasan kuburan tolu ari tolu borngin.+
41 Di Ari Panguhuman i, paheheonna do halak Ninive dohot sundut on. Halak Ninive ma na patuduhon na marsala sundut on. Ai anggo halak Ninive dipauba do roha ni nasida dung dibege barita ni si Jona.+ Alai, adong do dison na umbalga sian si Jona.+
42 Di Ari Panguhuman, hehe ma ratu sian selatan rap dohot sundut on. Ratu i ma na patuduhon na marsala sundut on. Ai ro do ibana sian ujung ni tano on lao mambege habisukon ni si Salomo.+ Alai, adong do dison na umbalga sian si Salomo.+
43 “Molo kaluar suru-suruan na jahat* sian sahalak jolma, bolusonna ma inganan na harsang lao mangalului ingananna maradian. Alai molo dang adong dapotna,+
44 ninna ma, ‘Mulak nama au tu jabu inganakku hian’. Dung sahat ibana, diida ma kosong jabu i, alai nungnga ias disapu jala denggan dibahen.
45 Gabe lao ma ibana muse jala ditogihon ma pitu nai suru-suruan na unjahat sian ibana. Masuk ma nasida tu jabu i jala maringanan disi. Ujungna, gabe unjahat ma jolma i sian tikki di mulana.+ Songon i ma na lao masa tu sundut na jahat on.”
46 Tikki makkatai dope Jesus tu akka halak na disi, jongjong do di luar omak ni Jesus dohot akka anggina+ lao makkatai tu ibana.+
47 Dung i, adong ma na paboahon tu Jesus, “Jongjong do di luar omakmu dohot akka anggim lao makkatai tu ho.”
48 Didok Jesus ma tu halak na paboahon i, “Ai ise do omakku jala ise do akka anggikku?”
49 Huhut ditudu doppak akka siseanna, ninna ma, “Nasida do omakku jala nasida do akka anggikku!+
50 Ai manang ise na mangulahon lomo ni roha ni Damang na di banua ginjang, i do anggikku, i do ibotokku, jala i do omakku.”+
Surat na di toru
^ Manang “na lumpu”.
^ Goar na dibahen tu Sibolis.
^ Manang “juru tulis”.
^ Manang “mukjizat”.
^ Manang “jala pangalakkup”.
