Poda 12:1-28
12 Halak na lomo rohana diajar-ajari, makkaholongi parbinotoan,+Alai halak na oto,+ sogo do rohana molo dipissang.
2 Lomo do roha ni Jahowa tu halak na burju,Alai dihukum Ibana do halak na marsakkap mambahen na jahat.+
3 Dang na lao marhasil halak alani hajahatonna,+Alai anggo halak na tigor marroha, dos do songon hau na so boi diuppat.
4 Istri na denggan parangena dos do songon mahkota di suamina,+Alai istri na pailahon dos do songon sahit na mambahen busuk holi-holi ni suamina.+
5 Sittong do pikkiran ni halak na tigor marroha,Alai mambahen lilu do poda ni halak na jahat.
6 Dos songon jorat na pamatehon do hata ni halak na jahat,+Alai parohon haluaon do hata ni halak na tigor marroha.+
7 Dang adong be parjahat molo dung dipamate nasida,Alai dang na lao maruppak+ jabu ni halak na tigor marroha.
8 Dipuji do halak molo marbisuk mandok hatana,+Alai na lao dipaila do halak na licik.+
9 Tumagon ma dang sangap diida halak alai adong parkarejona,Sian apala patimbo-timbohon diri hape dang mangan.+
10 Diparrohahon halak na tigor marroha do binatang na dipiaro ibana,+Alai kejam do halak na jahat.*
11 Na lao butong do halak na mangula tanona,+Alai na oto do halak na mangalului akka na so marguna.
12 Late do roha ni parjahat tu parjahat na asing na marhasil mangarampok,Alai halak na tigor marroha dos do songon hau na togu uratna jala na marparbue.
13 Na lao tarjorat do halak na jahat alani hatana na jahat i,+Alai na lao malua do halak na tigor marroha sian hasusaan.
14 Dihilala halak do akka na denggan+ sian hata na nidokna,Jala dapotan upa do ibana sian na niulana.
15 Tigor do dalan ni halak na oto di rohana,+Alai dijalo halak na marbisuk do poda.+
16 Halak na oto do na pittor patuduhon jut ni rohana,+Alai marbisuk do halak na so olo mamikkiri hata ni halak na mangaleai.
17 Dihatahon saksi na setia do na sittong,Alai margabus do saksi na munafik.
18 Dos songon podang na manikkam do akka hata na asal dipandok,Alai pamaluppon do hata ni halak na marbisuk.+
19 Na lao martahan do hata* na sittong saleleng ni lelengna,+Alai parsatokkinan do anggo gabus.*+
20 Holan na mangoto-otoi do halak na marsakkap na jahat,Alai marlas ni roha do halak siboan dame.*+
21 Dang na lao marjea halak na tigor marroha,+Alai sai na marjea do halak na jahat.+
22 Magigi+ do Jahowa tu pargabus,Alai lomo do rohana tu halak na setia.
23 Ditabunihon halak na marbisuk do na binotona,Alai dipatudu-tudu halak na oto do haotoonna.+
24 Na lao mamaretta do halak na ringgas,+Alai gabe hatoban do halak na malas.+
25 Gabe metmet do roha+ molo holsoan,Alai boi do i tarapul alani akka hata na denggan.+
26 Manat do dilului halak na tigor marroha inganan parmahanan na dumenggan,Alai lilu do halak na jahat di dalanna sandiri.
27 Dang olo halak na malas manakkup binatang lao allangonna,+Alai dos songon arta do halak na ringgas.
28 Tu hangoluan do dalan ni halak na tigor marroha,+Jala dang adong hamatean di dalan i.
Surat na di toru
^ As. “kejam do asi ni roha ni halak na jahat”.
^ As. “bibir”.
^ As. “dila na mandok gabus”.
^ As. “halak na mangajarhon asa mardame”.
