Poda 20:1-30
20 Gabe pangarehei do halak alani anggur,+ dang boi be dirajai halak dirina alani alkohol.+Dang marbisuk manang ise na lilu alani i.+
2 Dos songon na mabiar tu singa na marauang do rakyat na mabiar tu raja.+Manang ise na mambahen raja muruk, na mangalului jea do i.+
3 Sangap do halak na so olo marbada,+Alai halak na oto do na sai naeng marbada.+
4 Dang olo sigurbak ulu mangula tanona tikki musim dingin,Gabe mangido-ido ma ibana tikki musim panen ala dang adong agia aha di ibana.*+
5 Dos songon aek na bagas do sakkap ni roha* ni jolma,Alai boi do halak na marbisuk manimba i.
6 Godang do halak na mandok dirina patuduhon holong,*Alai maol do mangalului halak na tutu marholong ni roha.
7 Toktong do setia halak na tigor marroha,+
Jala marlas ni roha do akka gellengna.*+
8 Molo hundul raja di tahtana lao mangadili,+Manat do dipareso ibana saluhutna asa unang adong be na jahat.+
9 Ise ma na boi mandok, “Nungnga hupaias be rohakku,+Jala nungnga ias au sian dosakku?”+
10 Manang ise na so jujur tikki manimbang dohot mangukkur,Magigi do Jahowa mangida i.+
11 Haru dakdanak pe boi do tandaon sian pangalahona,Atik na tulus do ibana jala denggan pangalahona.+
12 Pinggol do na mambege jala mata do na mangida,Alai Jahowa do na mambahen i duassa.+
13 Unang ma holan na modom ho, asa unang marpogos ho.+
Dungo ma ho asa godang siallangonmu.+
14 Sai didok panuhor do, “Dang bagak on, dang bagak on!”Alai dung lao ibana, dipuji-puji ibana do dirina.+
15 Nang pe adong mas ni halak, jala godang koralna,*Alai ummarga do hata ni halak na marbisuk.+
16 Molo dijamini sasahalak utang ni halak na so ditanda,+ buat ma jaminan* i,Alai molo dijamini ibana utang ni boru-boru na so hasea,* unang paulak jaminan i.+
17 Molo dapot ni halak sipanganon ala mangoto-otoi, tabo do i diallang ibana,Alai dukkon i, gabe hira na gok ma batu karikkil di babana.+
18 Saut do sakkap ni roha molo godang na mamodai,+Jala molo marporang ho ihutton ma poda sian halak na marbisuk.+
19 Halak na jotjot mandok hata na so sittong, dipaboa-boa do rahasia ni donganna.+Unang ma mardongan tu siganjang dila.
20 Manang ise na mamburai omakna dohot bapakna,Na lao mittop do lampuna tikki holom.+
21 Olo do halak na jahat gabe na parjolo mandapot parbagianan,Alai dang na lao parohon pasu-pasu i di ujungna.+
22 Unang ma dok, “Ikkon balosokku do pambahenanna na jahat i!”+
Alai marpos ni roha ma ho tu Jahowa,+ urupanna do ho.+
23 Magigi do Jahowa tu halak na so jujur tikki mamakke timbangan.*Jala dang denggan molo mamakke timbangan na so pas.
24 Jahowa do na manottuhon tudia jolma ikkon mangalakka,+Alani i dang tolap jolma mamboto tudia ibana mangalakka.
25 Hona jorat do halak na marjanji tu Debata so jolo dipikkiri,+
Hape dung pe di pudian ni ari dipikkiri ibana sumpana i.+
26 Songon eme na digiling di inganan pardegean asa pulik lakkatna+Songon i ma raja na marbisuk papulikkon akka parjahat asa unang adong be nasida.+
27 Dos songon lampu ni Jahowa do pambahenan* ni sasahalak,I do na patuduhon na di bagasan rohana.
28 Molo setia sahalak raja jala dipatuduhon holong ni roha,* i ma na manjaga ibana,+
Molo toktong ibana patuduhon holong,* gabe hot ma tahtana.+
29 Hasangapon ni na poso, i ma gogona,+Jala hasangapon ni na matua, i ma ubanna.+
30 Molo dibahen hukuman,* dang adong be hajahaton,+Jala boi do dipaias roha ni jolma sian na jahat molo diajar-ajari.*
Surat na di toru
^ Manang boi do “Dilului ibana do sipanganon tikki musim panen, alai dang adong dapotna manang aha”.
^ As. “poda”.
^ As. “anakna”.
^ Manang “halak na so ditanda”.
^ As. “abit”.
^ Manang “mamakke dua timbangan na so sarupa”.
^ As. “hosa”.
^ As. “Molo adong lukka na marsalaon”.
^ As. “diattuk”.
