Ulaon ni Apostel 10:1-48
10 Adong ma di Kaesarea sahalak bawa na margoar si Kornelius. Ibana sahalak perwira* di pasukan tentara* Italia.
2 Halak na makkabiari Debata do ibana songon i nang keluargana. Godang do diurupi ibana akka na pogos jala toktong do ibana martangiang tu Debata.
3 Di sada tikki hira-hira jam tolu botari,*+ mandapot parnidaan ma si Kornelius. Diida ibana ma ro suru-suruan ni Debata manjuppangi ibana. Didok suru-suruan i ma, “Kornelius!”
4 Mabiar ma ibana mangida suru-suruan i, didok ma, “Aha i Tuan?” Didok suru-suruan i ma, “Ditangihon Debata do sude tangiangmi+ jala las do rohana mangida ho. Diida Ibana do songon dia burjum mangurupi akka na pogos.
5 Saonari, suru ma halak tu Joppe lao manjou sahalak bawa na margoar si Simon na laos digoari si Petrus.
6 Di jabu ni si Simon tukkang kulit na di topi laut i do ibana tinggal* nuaeng.”
7 Dung lao suru-suruan i, hatop ma dijou si Kornelius dua halak hatobanna dohot sahalak tentarana na makkabiari Debata.
8 Dipaboa si Kornelius ma sude na masa i tu nasida jala disuru ma nasida tu Joppe.
9 Marsogotna i, tikki di pardalanan dope nasida jala nungnga jonok tu Joppe, nakkok ma si Petrus tu atap* ni jabu lao martangiang. Hira-hira jam 12 arian* do tikki i.
10 Alai male situtu ma ibana jala naeng mangan. Tikki diparade sipanganonna, mandapot parnidaan ma ibana.+
11 Diida ibana ma bukka langit, dung i adong ma na songon kain linen na bidang turun tu tano on. Herbang do kain i.
12 Adong do diida ibana di bagasan ni kain i sude ragam ni binatang siopat pat, binatang na mangissir, dohot akka pidong.
13 Dung i adong ma soara na mandok tu ibana, “Jongjong ma ho Petrus, seat ma akka binatang i jala allang ma!”
14 Alai ninna si Petrus ma, “Dang olo au Tuan! Ai dang hea dope huallang sipanganon na ramun* dohot na so diloas allangon mangihutton patik.”+
15 Alai tarbege ma muse soara i mandok, “Molo dung didok Debata ias, dang boi be dohononmu i ramun.”
16 Tolu hali ma mulak-ulak masa songon i, dung i pittor tarangkat ma muse kain i tu langit.
17 Dang diboto si Petrus dope aha lapatan ni parnidaan i, bingung do ibana. Alai tikki marpikkiri dope ibana, nungnga dapot ni halak na disuru si Kornelius i jabu ni si Simon jala nungnga jongjong nasida di gerbang ni jabuna.+
18 Dijou nasida ma parjabu i, disukkun ma manang na adong disi si Simon na digoari si Petrus.
19 Tikki i sai dipikkiri si Petrus dope taringot tu parnidaan i. Alai marhite tondi parbadia+ didok Debata ma, “Ida ma! Adong tolu bawa na mangalului ho.
20 Jongjong ma ho, turun ma ho tu toru, ihutton ma nasida. Unang pola ragu ho, ai Au do na manuru nasida.”
21 Turun ma si Petrus mandapotton nasida. Didok ibana ma, “Au do halak na dilului hamu. Adong na boi huurupi?”
22 Ninna nasida ma, “Perwira Kornelius+ do na manuru hami tuson. Halak na mangulahon na sittong do ibana, makkabiari Debata, jala sude do halak Jahudi mamuji ibana. Dijalo ibana do tudu-tudu sian Debata marhite suru-suruan na badia asa ro ho tu jabuna, asa ditangihon ibana ho.”
23 Ditogihon si Petrus ma nasida masuk tu jabu jala disi ma nasida marborngin.
Marsogotna i borhat ma si Petrus rap dohot nasida. Dohot do piga-piga halak dongan sahaporseaon na di Joppe mangihutton ibana.
24 Marsogotna i sahat ma nasida di Kaesarea. Nungnga dipaima si Kornelius haroro ni si Petrus. Jala nungnga dijou ibana asa marpungu keluargana dohot akka ale-alena.
25 Dung sahat si Petrus, ro ma si Kornelius mandapotton ibana. Marsinggang ma ibana tu pat ni si Petrus jala marsomba.
26 Alai ditogu si Petrus ma ibana, ninna ma, “Jongjong ma ho, ai au pe jolma do.”+
27 Huhut makkatai nasida, masuk ma si Petrus tu jabu i jala diida ma nungnga godang jolma marpungu disi.
28 Didok si Petrus ma tu nasida, “Takkas do diboto hamu, diorai do halak Jahudi mardongan manang ro mandapotton halak na sian bangso na asing.+ Alai, nungnga dipatuduhon Debata tu au na so boi dohonokku manang ise pe ramun manang dang ias.+
29 Alani i, dang borat rohakku tikki dijou hamu au ro tuson. Alai husukkun ma jo hamu, ‘Boasa dijou hamu au tuson?’”
30 Dung i didok si Kornelius ma, “Opat ari naung salpu, hira-hira jam tolu botari* songon on, martangiang ma au di jabukku. Toppu ma jongjong di jolokku sasahalak na marpakkean na massai bottar.
31 Jala ninna ma tu au, ‘Kornelius, nungnga ditangihon Debata sude tangiangmi jala las do rohana mangida ho. Diida Ibana do songon dia burjum mangurupi akka na pogos.
32 Suru ma halak tu Joppe manjou si Simon na digoari si Petrus. Di jabu ni si Simon tukkang kulit na di topi ni laut i do ibana tinggal nuaeng.’+
33 Alani i do pittor husuru halak mangalap ho, jala burju do roham ro tuson. Saonari marpungu do hami sude dison, di jolo ni Debata lao manangihon sude hata ni Jahowa* na lao dipasahat ho tu hami.”
34 Dung i didok si Petrus ma, “Nungnga takkas be huboto saonari, na so marimbar jolma di jolo ni Debata.+
35 Lomo do roha ni Debata mangida ganup halak na makkabiari Ibana jala na mangulahon na sittong, dang soal sian bangso na dia pe nasida.+
36 Nungnga dipaboa Debata tu halak Israel barita na uli taringot tu hadameon+ na boi masa marhite Jesus Kristus, Tuan ni saluhutna.+
37 Takkas do diboto hamu, dung dibaritahon si Johannes taringot tu pandidion, adong do barita na dihatai di sude luat Judea, mulai ma i sian Galilea,+
38 i ma taringot tu Jesus na sian Nasaret na dipillit Debata marhite tondi parbadia.+ Dilehon Debata do tu ibana huaso. Didalani ibana do sude luat i lao mangulahon na denggan. Jala dipamalum ibana do sude na dirajai Sibolis,+ ai Debata do na mandongani ibana.+
39 Diida hami do sude na dibahen ibana di luat ni halak Jahudi dohot di Jerusalem. Alai dibunu nasida do ibana, dipakkuhon* di sada hau.
40 Nang pe songon i, dipahehe Debata do ibana di ari patoluhon+ jala diloas do ibana pataridahon dirina,
41 alai dang tu sude jolma. Holan tu akka saksi naung dipillit Debata hian do, i ma hami naung rap mangan minum dohot ibana dung dipahehe ibana sian na mate.+
42 Disuru ibana do hami marbarita tu akka halak jala paboahon+ naung dipillit Debata ibana lao manguhumi na mangolu dohot na mate.+
43 Taringot tu ibana do na dipaboa sude panurirang.*+ Dipaboa nasida do, ganup halak na porsea tu ibana boi mandapot hasesaan ni dosa marhite goarna.”+
44 Tikki makkatai dope si Petrus, mandapot tondi parbadia ma sude halak na manangihon hata i.+
45 Gabe heran ma akka halak Jahudi na porsea* na ro rap dohot si Petrus i. Ai nungnga dilehon Debata silehon-lehon tu akka halak na sian bangso na asing, i ma tondi parbadiana.
46 Dibege akka sisean i do nasida mamuji Debata jala makkatai di marragam bahasa.+ Dung i didok si Petrus ma,
47 “Nungnga manjalo tondi parbadia nasida songon hita. Adong dope halak na boi mangabbati nasida dididi+ dohot aek?”
48 Gabe disuru si Petrus ma asa dididi nasida di bagasan goar ni Jesus Kristus.+ Dung i dipangido nasida ma asa tinggal ibana piga-piga ari nai disi.
Surat na di toru
^ Na mamimpin 100 tentara.
^ Sada pasukan tentara ni Rom godangna 600 tentara.
^ As. “jam pasiahon”.
^ Manang “marborngin”.
^ Godang jabu atapna dosdos jala somal do disi nasida mangulahon akka ulaon.
^ As. “jam paonomhon”.
^ As. “jam pasiahon”.
^ Ida Lampiran A5.
^ As. “digattukkon”.
^ As. “akka sisean na marsunat”.
