Barita na uli na paboahon boi mangolu salelenglelengna jolma di tano on tarsurat di Bibel. (Psalmen 37:29) Bibel on adong 66 buku. Debata do marsuru hirahira 40 baoa laho manurathonsa. Lima buku na parjolo disurat si Musa hirahira 3.500 taon naung salpu. Buku na parpudi disurat si Johannes lobi sian 1.900 taon naung salpu. Pingkiran ni ise do dipatolhas angka na manurat Bibel i? Debata do paboahon tu angka sisurat Bibel marhite tondi porbadia. (2 Samuel 23:2) Nasida manurathon pingkiran ni Debata, ndang pingkiran nasida sandiri. Alani i, Jahowa do Pangarang ni Bibel.​—Jaha 2 Timoteus 3:16; 2 Petrus 1:20, 21.

Tonton ma video Ise do Pangarang ni Bibel?

Porsea do hita Bibel on ro sian Debata alana surirangna taringot tu ari sogot mansai toho jala tingkos. Ndang adong jolma na boi mangulahon i. (Josua 23:14) Holan Debata pargogo na so hatudosan do na tolap mangida ari sogot ni jolma manisia, jala mansai toho.​—Jaha Jesaya 42:9; 46:10.

Buku na sian Debata ingkon imbar sian buku na asing, jala ingkon nian songon i. Nunga marmilyar Bibel naung dibahen tu marratus hata naung tarsar di godang inganan. Nang pe buku naung leleng, Bibel on sadalan dohot sains naung diparhatutu hatoranganna. Asing ni i, aha na sinurat ni si 40 halak i sude domu ndang maralo. * Disurat Bibel do muse taringot holong, parange na holan boi dipatorang Debata parholong. Margogo do buku on laho padengganhon ngolu ni jolma. Sude on patuduhon tu marjuta halak Bibel on Hata ni Debata.​—Jaha Jesaya 40:8; 1 Tessalonik 2:13.

Tonton ma video Songon dia do Hita Boi Porsea na Sintong Isi ni Bibel?

Bibel papatarhon barita na uli na paboahon bagabaga ni Debata laho mangalehon ari na denggan tu joloan on tu angka jolma. Dipatorang Bibel adong do tingkina jolma boi mangolu di Paradeiso naung mago na jolo di masa ni jolma na parjolo i, jala paulionNa do muse Paradeiso i haduan.​—Jaha Pangungkapon 21:4, 5.

Hata ni Debata on marisi uhum, prinsip, dohot poda. Asing ni i, tarsurat do di Bibel songon dia Debata maradophon jolma manisia, na patuduhon songon dia parange ni Debata. Bibel on pe patoranghon songon dia ma asa boi gabe alealeNa.​—Jaha Psalmen 19:8, 12; Jakobus 2:23; 4:8.

Songon Jesus mangajar, buku on maniru ibana, laho mangurupi hita mangantusi hata ni Bibel. Dienet do godang ayat laho patoranghon lapatan ni angka surat na badia.​—Jaha Lukas 24:27, 45.

Ndang adong na rumingkot sian barita na uli na sian Debata. Alai godang do halak na so marparrohahon, na deba sogo rohana umbegesa. Unang gabe ganggu roha muna. Hita boi mandapot hangoluan salelenglelengna molo tatanda Debata.​—Jaha Johannes 17:3.